التخريج

قسم الحديث (القائل): مرفوع ، اتصال السند: متصل ، قسم الحديث: قولی

‌صحيح البخاري: كِتَابُ فِي الِاسْتِقْرَاضِ وَأَدَاءِ الدُّيُونِ وَالحَجْرِ وَالتَّفْلِيسِ (بَابُ مَا يُنْهَى عَنْ إِضَاعَةِ المَالِ)

حکم : أحاديث صحيح البخاريّ كلّها صحيحة 

ترجمة الباب: وَقَوْلِ اللَّهِ تَعَالَى: {وَاللَّهُ لاَ يُحِبُّ الفَسَادَ} [البقرة: 205] وَ {لاَ يُصْلِحُ [ص:120] عَمَلَ المُفْسِدِينَ} [يونس: 81] وَقَالَ فِي قَوْلِهِ: (أَصَلَوَاتُكَ تَأْمُرُكَ أَنْ نَتْرُكَ مَا يَعْبُدُ آبَاؤُنَا أَوْ أَنْ نَفْعَلَ فِي أَمْوَالِنَا مَا نَشَاءُ) وَقَالَ: {وَلاَ تُؤْتُوا السُّفَهَاءَ أَمْوَالَكُمُ} [النساء: 5] «وَالحَجْرِ فِي ذَلِكَ، وَمَا يُنْهَى عَنِ الخِدَاعِ»

2408. حَدَّثَنَا عُثْمَانُ حَدَّثَنَا جَرِيرٌ عَنْ مَنْصُورٍ عَنْ الشَّعْبِيِّ عَنْ وَرَّادٍ مَوْلَى الْمُغِيرَةِ بْنِ شُعْبَةَ عَنْ الْمُغِيرَةِ بْنِ شُعْبَةَ قَالَ قَالَ النَّبِيُّ صَلَّى اللَّهُ عَلَيْهِ وَسَلَّمَ إِنَّ اللَّهَ حَرَّمَ عَلَيْكُمْ عُقُوقَ الْأُمَّهَاتِ وَوَأْدَ الْبَنَاتِ وَمَنَعَ وَهَاتِ وَكَرِهَ لَكُمْ قِيلَ وَقَالَ وَكَثْرَةَ السُّؤَالِ وَإِضَاعَةَ الْمَالِ

مترجم:

ترجمۃ الباب:

اور اللہ تعالیٰ نے سورۃ بقرہ میں فرمایا کہ اللہ تعالیٰ فساد کو پسند نہیں کرتا ( اور اللہ تعالیٰ کا ارشاد سورۃ یونس میں کہ ) اور اللہ فسادیوں کا منصوبہ چلنے نہیں دیتا۔ اور اللہ تعالیٰ نے ( سورۃ ہود میں ) فرمایا ہے کیا تمہاری نماز تمہیں یہ بتاتی ہے کہ جسے ہمارے باپ دادا پوجتے چلے آئے ہیں ہم ان بتوں کو چھوڑ دیں۔ یا اپنے مال میں اپنی طبیعت کے مطابق تصرف کرنا چھوڑ دیں۔ اور اللہ تعالیٰ نے ( سورۃ نساءمیں ) ارشاد فرمایا اپنا روپیہ بے وقوفوں کے ہاتھ میں مت دو اور بے وقوفی کی حالت میں حجر کرنا۔ تشریح : بے وقوفوں سے مراد نادان ہیں جو مال کو سنبھال نہ سکیں بلکہ اس کو تباہ اور برباد کردیں جیسے عورت، بچے، کم عقل جوان بوڑھے وغیرہ۔ حجر کا معنی لغت میں روکنا، منع کرنا، اور شرع میں اس کوکہتے ہیں کہ حاکم اسلام کسی شخص کو اس کے اپنے مال میں تصرف کرنے سے روک دے۔ اور یہ دو وجہ سے ہوتا ہے یا تو وہ شخص بے وقوف ہو، اپنا مال تباہ کرتا ہو یا دوسروں کے حقوق کی حفاظت کے لیے۔ مثلاً مدیون مفلس پر حجر کرنا، قرض خواہوں کے حقوق بچانے کے لیے، یا راہن پر یا مریض پر مرتہن اور وارث کا حق بچانے کے لیے۔ اس روکنے کو شرعی اصطلاح میں حجر کہا جاتا ہے۔ آیات قرآنی سے یہ بھی ظاہر ہوا کہ حلال طور پر کمایا ہوا مال بڑی اہمیت رکھتا ہے۔ اس کا ضائع کرنا یا ایسے نادانوں کو اسے سونپنا جو اس کی حفاظت نہ کرسکیں باوجود یہ کہ وہ اس کے حق دار ہیں۔ پھر بھی ان کو ان کے گزارے سے زیادہ دینا اس مال کو گویا ضائع کرنا ہے جو کسی طرح جائز نہ ہوگا۔

2408.

حضرت مغیرہ بن شعبہ  ؓ سے روایت ہے، انھوں نے کہا کہ نبی ﷺ نے فرمایا: ’’اللہ تعالیٰ نے تم پر ماؤں کی نافرمانی اور لڑکیوں کو زندہ درگور کرنا حرام کردیا ہے۔ حقوق ادا نہ کرنا اور دوسروں کے سامنے ہاتھ پھیلانا بھی حرام قراردیا ہے، نیز تمھارے لیے فضول گفتگو، کثرت سوال اور بربادی مال کو ناپسند کیا ہے۔‘‘

×
ترجمۃ الباب:

 

ارشاد باری تعالیٰ ہے: "اور اللہ تعالیٰ فساد کو پسند نہیں کرتا۔ " نیز فرمایا: "اللہ تعالیٰ اہل فساد کا منصوبہ چلنے نہیں دینا۔ "حضرت شعیب کی قوم نے ان سے کہا: "کیا تمھاری نماز تمھیں حکم دیتی ہے کہ ہم ان بتوں کو جنھیں ہمارے باپ دادا پوجتے آئے ہیں چھوڑدیں اور اپنے مال میں اپنی مرضی کرنا ترک کردیں۔ "ارشاد باری تعالیٰ ہے: "تم اپنے مال نادانوں کے حوالے مت کرو" نیز اس میں ان پر تصرف کے متعلق پابندی لگانے اور دھوکا دینے کی ممانعت کا بیان۔

 

 


حدیث ترجمہ:

ہم سے عثمان بن ابی شبیہ نے بیان کیا، ان سے جریر نے بیان کیا، ان سے منصور نے، ان سے شعبی نے، ان سے مغیرہ بن شعبہ کے غلام وراد نے اور ان سے مغیرہ بن شعبہ ؓ نے بیان کیا کہ نبی کریم ﷺ نے فرمایا، اللہ تعالیٰ نے تم پر ماں (اور باپ) کی نافرمانی، لڑکیوں کو زندہ دفن کرنا، (واجب حقوق کی) ادائیگی نہ کرنا اور (دوسروں کا مال ناجائز طریقہ پر) دبالینا حرام قرار دیا ہے۔ اور فضول بکواس کرنے اورکثرت سے سوال کرنے اور مال ضائع کرنے کو مکروہ قرار دیا ہے۔

حدیث حاشیہ:

لفظ ''منع وهات'' کا ترجمہ بعض نے یوں کیا ہے اپنے اوپر جو حق واجب ہے جیسے زکوٰۃ، بال بچوں، ناتے والوں کی پرورش، وہ نہ دینا۔ اور جس کا لینا حرام ہے یعنی پرایا مال وہ لے لینا، قیل و قال کا مطلب خواہ مخواہ اپنا علم جتانے کے لیے لوگوں سے سوالات کرنا۔ یا بے ضرورت حالا ت پوچھنا۔ کیوں کہ یہ لوگوں کو برا معلوم ہوتا ہے۔ بعض بات وہ بیان کرنا نہیں چاہتے۔ اس کے پوچھنے سے ناخوش ہوتے ہیں۔

تشریح : ترجمہ باب لفظ إضاعة المال سے نکلتا ہے یعنی مال ضائع کرنا مکروہ ہے۔ قسطلانی نے کہا مال برباد کرنا یہ ہے کہ کھانے پینے لباس وغیرہ میں بے ضرورت تکلف کرنا۔ باسن پر سونے چاندی کا ملمع کرانا۔ دیوار چھت وغیرہ سونے چاندی سے رنگنا، سعید بن جبیر نے کہا مال برباد کرنا یہ ہے کہ حرام کاموں میں خرچ کرے اور صحیح یہی ہے کہ خلاف شرع جو خرچ ہو، خواہ دینی یا دنیاوی کام میں، وہ برباد کرے میں داخل ہے۔ بہرحال جو کام شرعاً منع ہیں جیسے پتنگ بازی، مرغ بازی، آتش بازی، ناچ رنگ ان میں تو ایک پیسہ بھی خرچ کرنا حرام ہے۔ اور جو کام ثواب کے ہیں مثلاً محتاجوں، مسافروں، غریبوں، بیماروں کی خدمت، قومی کام جیسے مدرسے، پل، سرائے، مسجد، محتاج خانے، شفا خانے بنانا، ان میں جتنا خرچ کرے وہ ثواب ہی ثواب ہے۔ اس کو برباد کرنا نہیں کہہ سکتے۔ رہ گیا اپنے نفس کی لذت میں خرچ کرنا تو اپنی حیثیت اور حالت کے موافق اس میں خرچ کرنا اسراف نہیں ہے۔ اسی طرح اپنی عزت یا آبرو بچانے کے لیے یاکسی آفت کو روکنے کے لیے۔ اس کے سوا بے ضرورت نفسانی خواہشوں میں مال خرچ کرنا مثلاً بے فائدہ بہت سے کپڑے بنا لینا، یا بہت سے گھوڑے رکھنا، یا بہت سا سامان خریدنا یہ بھی اسراف میں داخل ہے۔ 
×
ترقیم کوڈاسم الترقيمنام ترقیمرقم الحديث (حدیث نمبر)
١.ترقيم موقع محدّث ویب سائٹ محدّث ترقیم2427
٢. ترقيم فؤاد عبد الباقي (المكتبة الشاملة)ترقیم فواد عبد الباقی (مکتبہ شاملہ)2408
٣. ترقيم العالمية (برنامج الكتب التسعة)انٹرنیشنل ترقیم (کتب تسعہ پروگرام)2231
٤. ترقيم فتح الباري (برنامج الكتب التسعة)ترقیم فتح الباری (کتب تسعہ پروگرام)2408
٥. ترقيم د. البغا (برنامج الكتب التسعة)ترقیم ڈاکٹر البغا (کتب تسعہ پروگرام)2277
٦. ترقيم شركة حرف (جامع خادم الحرمين للسنة النبوية)ترقیم حرف کمپنی (خادم الحرمین الشریفین حدیث ویب سائٹ)2325
٧. ترقيم دار طوق النّجاة (جامع خادم الحرمين للسنة النبوية)ترقیم دار طوق النجاۃ (خادم الحرمین الشریفین حدیث ویب سائٹ)2408
٨. ترقيم فؤاد عبد الباقي (دار السلام)ترقیم فواد عبد الباقی (دار السلام)2408
١٠.ترقيم فؤاد عبد الباقي (داود راز)ترقیم فواد عبد الباقی (داؤد راز)2408

الحكم على الحديث

×
اسم العالمالحكم
١. إجماع علماء المسلمينأحاديث صحيح البخاريّ كلّها صحيحة

تمہید باب

×

ان قرآنی آیات سے معلوم ہوا کہ حلال اور جائز طریقے سے کمایا ہوا مال بڑی اہمیت کا حامل ہے۔ اسے ضائع کرنا اور ایسے نادانوں کو دینا جو اس کی حفاظت نہ کر سکیں، اس کے متعلق سخت ممانعت ہے۔ مال ضائع کرنے کی دو صورتیں ہیں: ایک یہ کہ اسے حرام کاموں میں خرچ کیا جائے اور دوسری صورت حلال کاموں میں فضول خرچی کی جائے۔ اس عنوان کے تحت امام بخاری رحمہ اللہ نے حجر کا بیان بھی کیا ہے جس کے لغوی معنی روکنے اور منع کرنے کے ہیں۔ شرعی اصطلاح میں حجر یہ ہے کہ حاکمِ وقت کسی کو وقتی طور پر اس کے مال میں تصرف کرنے سے روک دے۔ اس کے عام طور پر تین اسباب ہیں: ٭ کسی میں تصرف (خرچ کرنے) کی صلاحیت ہی نہ ہو جیسا کہ بچہ وغیرہ، اسے اپنے مال میں تصرف سے روکنا چاہیے۔ ٭ تصرف کی صلاحیت تو ہو مگر اسے غلط استعمال کرتا ہے جس سے کوئی معاشرتی بگاڑ پیدا ہوتا ہے جیسا کہ کوئی فضول خرچی کرتا ہے اور اپنی دولت بےجا خرچ کرتا ہے۔ ٭ اگر اس کے تصرف سے دوسروں کو نقصان ہوتا ہو تو اس پر پابندی عائد کی جا سکتی ہے جیسا کہ مقروض آدمی۔ اسے مزید قرض لینے سے روکا جائے، مگر پابندی لگانے کا حق حکومت کو ہے عوام کو نہیں۔

تمہید کتاب

×

امام بخاری رحمہ اللہ کی عام عادت ہے کہ ایک عنوان کے تحت کئی احادیث ذکر کرتے ہیں، لیکن چند عناوین کو ایک جگہ اکٹھا کر دینا ایسا کبھی کبھی ہوتا ہے جب انہیں ان کے مطابق احادیث کم ملی ہوں۔ اس مقام پر انہوں نے چار چیزوں کو ایک عنوان میں جمع کر دیا ہے: (1) استقراض: قرض لینا۔ (2) أداء الديون: قرض ادا کرنا۔ (3) حجر: حاکم وقت کسی شخص کو اپنے مال میں تصرف سے وقتی طور پر روک دے۔ (4) تفليس: حاکم وقت کسی کو مفلس قرار دے کر اسے بقایا املاک میں تصرف سے منع کر دے تاکہ جو کچھ موجود ہے وہ قرض خواہوں کو دے کر ان کے معاملات کو ختم کیا جائے۔اسلام زندگی میں اعتدال پیدا کرنے اور معیشت میں میانہ روی اختیار کرنے کی ہدایت کرتا ہے۔ اس اعتدال اور میانہ روی کا تقاضا یہ ہے کہ کسی مسلمان کو اپنی ضروریات پوری کرنے کے لیے کبھی قرض لینے کی ضرورت ہی پیش نہ آئے کیونکہ ایسا کرنے سے پریشانی لاحق ہوتی ہے اور پھر دن بہ دن اس میں اضافہ ہوتا رہتا ہے۔ ایسے حالات میں دوسرے مسلمانوں کا فرض ہے کہ وہ ایسے ضرورت مند کے ساتھ تعاون کریں اور اس کی ضروریات پوری کرنے کے لیے آگے بڑھیں۔ اللہ تعالیٰ نے ایسے لوگوں کی تعریف کی ہے جو اپنی ضروریات کو نظر انداز کر کے اپنے بھائی کی پیش آمدہ ضروریات پوری کرتے ہیں۔ ارشاد باری تعالیٰ ہے: (وَيُؤْثِرُونَ عَلَىٰ أَنفُسِهِمْ وَلَوْ كَانَ بِهِمْ خَصَاصَةٌ) "وہ دوسروں کو اپنی ذات پر ترجیح دیتے ہیں، خواہ وہ خود فاقے سے ہوں۔" (الحشر9:59) اس سلسلے میں رسول اللہ صلی اللہ علیہ وسلم کا فرمان ہے: "جو شخص اپنے بھائی کی ضرورت پوری کرتا ہے اللہ تعالیٰ اس کی ضروریات کا خیال رکھتا ہے۔" (مسند احمد:4/104)ایک دوسری حدیث میں ہے: "اللہ تعالیٰ آدمی کی اس وقت تک مدد کرتا ہے جب تک وہ اپنے بھائی کی مدد میں لگا رہتا ہے۔" (مسند احمد:2/274) خود رسول اللہ صلی اللہ علیہ وسلم نے بھی قرض لینے کو ناپسند فرمایا ہے کیونکہ اس سے انسان کی پریشانی میں اضافہ ہوتا ہے۔ آپ نماز میں اکثر یہ دعا کیا کرتے تھے: "اے اللہ! میں گناہ سے اور قرض لینے سے تیری پناہ مانگتا ہوں۔" کسی نے دریافت کیا: اللہ کے رسول! کیا بات ہے آپ اکثر قرض سے پناہ مانگتے ہیں؟ آپ نے فرمایا: "آدمی جب مقروض ہو جاتا ہے تو بات بات پر جھوٹ بولتا ہے اور جب وعدہ کرتا ہے تو اس کی خلاف ورزی کرتا ہے۔" (مسند احمد:6/88) ایک دفعہ رسول اللہ صلی اللہ علیہ وسلم نے فرمایا: "جب انسان کا دل مطمئن ہو تو خواہ مخواہ اسے خوفزدہ اور پریشان نہیں کرنا چاہیے۔" لوگوں نے پوچھا: اسے پریشان کرنے والی کیا چیز ہے؟ آپ نے فرمایا: "قرض، یعنی قرض لینے کے بعد انسان خواہ مخواہ پریشان اور پراگندہ حال رہتا ہے۔" (مسند احمد:4/146)ان ہدایات کے پیش نظر ایک مسلمان کو شدید ضرورت کے بغیر قرض نہیں لینا چاہیے اور جب لے تو نیت صاف کر لے اور اسے جلد از جلد ادا کرنے کی کوشش کرے۔ اگر نیت صاف ہے تو اللہ تعالیٰ اس کی ضرور مدد فرماتا ہے اور اس کی ادائیگی کے لیے کوئی نہ کوئی راستہ نکال دیتا ہے جیسا کہ درج ذیل حدیث سے پتہ چلتا ہے: رسول اللہ صلی اللہ علیہ وسلم کا فرمان ہے: "جس شخص نے لوگوں کا مال بطور قرض لیا اور اسے ادا کرنے کا ارادہ بھی کیا تو اللہ تعالیٰ اس کی طرف سے اس کا قرض ادا کر دے گا، یعنی اسے توفیق دے دے گا۔" (مسند احمد:2/361)سیدنا عبداللہ بن جعفر رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: "مقروض شخص کو اللہ تعالیٰ کی معیت حاصل رہتی ہے حتی کہ وہ اپنا قرض ادا کر دے بشرطیکہ وہ قرض اس کام کے لیے نہ ہو جو اللہ کو ناپسند ہو۔" سیدنا عبداللہ بن جعفر رضی اللہ عنہ اپنے خزانچی سے کہتے: جا کر میرے لیے قرض لے آؤ کیونکہ جب سے میں نے رسول اللہ سے یہ سن لیا ہے اس کے بعد میں اللہ تعالیٰ کی معیت کے بغیر رات گزارنا ناپسند کرتا ہوں۔ (سنن ابن ماجہ،الصدقات،حدیث:2409)حضرت میمونہ رضی اللہ عنہا نے بھی قرض لیا، انہیں کہا گیا: آپ قرض لے رہی ہیں جبکہ آپ اسے ادا نہیں کر سکتیں؟ انہوں نے کہا: میں نے رسول اللہ صلی اللہ علیہ وسلم کو یہ فرماتے ہوئے سنا: "جو شخص قرض لیتا ہے اور اللہ تو خوب جانتا ہے کہ یہ ادا کرنا چاہتا ہے، ایسے انسان کے لیے اللہ تعالیٰ (دنیا ہی میں) ادا کرنے کا کوئی راستہ نکال دیتا ہے۔" (مسند احمد:6/332)حضرت عائشہ رضی اللہ عنہا قرض لیا کرتی تھیں۔ جب ان سے دریافت کیا گیا تو فرمایا: میں اس مدد کو حاصل کرنا چاہتی ہوں جس کا وعدہ رسول اللہ صلی اللہ علیہ وسلم کی زبان حق ترجمان سے ہوا ہے۔ آپ نے فرمایا: "جس انسان نے ادائیگی کی نیت سے قرض لیا اسے اللہ کی مدد حاصل ہوتی ہے۔" (مسند احمد:6/99)سیدہ عائشہ رضی اللہ عنہا سے روایت ہے، رسول اللہ صلی اللہ علیہ وسلم نے فرمایا: "جو شخص قرض لیتا ہے اور اس کی ادائیگی کے لیے فکر مند رہتا ہے تو اللہ کی رحمت اس کے شامل حال ہو جاتی ہے۔" (مسند احمد:6/255)ان روایات سے معلوم ہوتا ہے کہ مقروض انسان کی اگر نیت صاف ہو تو اللہ تعالیٰ اسے قرض واپس کرنے کی توفیق ضرور دے گا بلکہ اس کے ساتھ اللہ کی مدد اور رحمت رہتی ہے۔ ایسے حالات میں اگر کوشش کے باوجود اپنا قرض ادا نہیں کر سکا تو قیامت کے دن اللہ تعالیٰ اس کے ساتھ اپنے رحم و کرم والا معاملہ فرمائے گا اور اسے لوگوں کے سامنے ذلیل و خوار نہیں کرے گا۔ مقروض کو چاہیے کہ وہ قرض سے پناہ طلب کرتا رہے اور اس کی ادائیگی کے لیے بکثرت دعائیں کرتا رہے۔ امید ہے کہ ایسا کرنے سے اللہ تعالیٰ ضرور اس کا بوجھ ہلکا کر دے گا۔ ایک صحابی قرض کی وجہ سے بہت پریشان رہتے تھے، انہوں نے سیدنا علی رضی اللہ عنہ سے مدد کی درخواست کی تو انہوں نے فرمایا: میں تمہیں چند کلمات سکھاتا ہوں جو رسول اللہ صلی اللہ علیہ وسلم نے مجھے پڑھنے کی تلقین کی اور فرمایا: "اگر تیرا قرض ایک بڑے پہاڑ جتنا بھی ہو تو وہ بھی ادا ہو جائے گا۔" (دعا یہ ہے: ) (اللهم اكفني بحلالك عن حرامك، و أغنني بفضلك عمن سواك) "اے اللہ! تو میرے لیے رزق حرام کے بجائے رزق حلال کو کافی بنا دے اور اپنی رحمت کے علاوہ مجھے ہر چیز سے بے نیاز کر دے۔" (مسند احمد:1/153،وجامع الترمذی،الدعوات،حدیث:3563)اس کے علاوہ وہ انسان اپنی زبان میں بھی اللہ تعالیٰ کے حضور گریہ و زاری کر سکتا ہے۔ دعا کی کوئی تعداد مقرر نہیں اور نہ یہ کسی خاص وقت کے ساتھ ہی مخصوص ہے۔ مقروض آدمی کو چاہیے کہ اسے جب بھی فرصت ملے بکثرت دعائیں کرتا رہے، خاص طور پر شب خیزی کے وقت نہایت عجز و انکسار سے دعا کرنے کی کوشش کرے۔قرض دار کو چاہیے کہ اللہ تعالیٰ جب اس کے مالی حالات کو اچھا کر دے اور اسے قرض کی ادائیگی کے متعلق وسائل مہیا ہو جائیں تو حسب وعدہ اس معاملے کو انتہائی خوش اسلوبی سے پایۂ تکمیل تک پہنچائے جیسا کہ مندرجہ ذیل احادیث سے معلوم ہوتا ہے:حضرت عرباض بن ساریہ رضی اللہ عنہ کہتے ہیں: میں نے رسول اللہ صلی اللہ علیہ وسلم کو ادھار پر ایک اونٹ دیا، جب میں نے اس کی قیمت کا تقاضا کیا تو آپ نے بڑے اچھے انداز سے اسے ادا فرمایا۔ (مسند احمد:4/127)رسول اللہ صلی اللہ علیہ وسلم نے خصوصی ہدایت فرمائی ہے: "لوگوں میں بہتر وہی انسان ہے جو قرض کی رقم خوش اسلوبی سے ادا کرے۔" (مسند احمد:2/377)رسول اللہ صلی اللہ علیہ وسلم نے ایسے شخص کے بارے میں جنت کی بشارت دی ہے جو فراخ دلی سے تقاضا کرتا ہے اور خوش دلی سے اپنا قرض ادا کرتا ہے۔(مسند احمد:2/210)مقروض کو چاہیے کہ قرض کی ادائیگی کے وقت قرض خواہ کا شکریہ ادا کرے اور اس کے مال و اولاد میں برکت کی دعا بھی کرے۔ رسول اللہ صلی اللہ علیہ وسلم نے غزوۂ حنین کے موقع پر ایک آدمی سے کچھ قرض لیا، ادائیگی کے وقت اس کے لیے ان الفاظ میں دعا فرمائی: (بارك الله لك في اهلك و مالك) "اللہ تعالیٰ تیرے مال و اولاد میں برکت فرمائے۔" نیز آپ نے فرمایا: "قرض کا حق یہ ہے کہ اسے بروقت شکریے کے ساتھ ادا کر دیا جائے۔" (مسند احمد:4/36)ادائیگی کے وقت اگر کسی قسم کی سابقہ شرط کے بغیر اصل رقم کے علاوہ کچھ اضافی رقم دے دی جائے تو اس میں کوئی قباحت نہیں، چنانچہ حضرت جابر رضی اللہ عنہ فرماتے ہیں: میرا کچھ قرض رسول اللہ صلی اللہ علیہ وسلم کے ذمے تھا، آپ نے وہ بھی ادا کیا اور مجھے کچھ مزید رقم بھی دی۔" (مسند احمد:3/302)مقروض کو چاہیے کہ جان بوجھ کر ٹال مٹول سے کام نہ لے کیونکہ شریعت نے گنجائش کے باوجود دیر کرنے کو ظلم سے تعبیر کیا ہے۔ فرمان نبوی ہے: "صاحب حیثیت مقروض کا جان بوجھ کر ٹال مٹول کرنا صریح ظلم ہے۔" (مسند احمد:2/71) ایسے حالات میں قرض خواہ اس کی بے عزتی کرے یا اسے قید کرا دے تو شریعت نے اسے یہ حق دیا ہے۔ رسول اللہ صلی اللہ علیہ وسلم کا ارشاد ہے: "ادائیگی پر قدرت رکھتے ہوئے مقروض کا ٹال مٹول کرنا اس کی بے عزتی اور اسے قید کر دینے کو حلال کر دیتا ہے۔" (مسند احمد:4/222)ایسے حالات میں اگر موت آ گئی تو اللہ کے حضور مزید سنگینی اور تنگی کا اندیشہ ہے جیسا کہ مندرجہ ذیل احادیث سے معلوم ہوتا ہے: حضرت ابو ہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے فرمایا: "ابن آدم کی جان قرض کی وجہ سے معلق رہتی ہے یہاں تک کہ اسے ادا کر دیا جائے۔" (مسند احمد:2/508)رسول اللہ صلی اللہ علیہ وسلم نے ایک دن نماز فجر کے بعد فرمایا: "فلاں قبیلے کا کوئی شخص ادھر موجود ہے؟" لوگوں نے کہا: ہاں، موجود ہے۔ آپ نے فرمایا: "تمہارے ساتھی کو اس کے ذمے قرض کی بنا پر جنت کے دروازے پر روک لیا گیا ہے (لہذا اس کی ادائیگی کا بندوبست کرو)۔" (مسند احمد:5/11)ایک شخص رسول اللہ صلی اللہ علیہ وسلم کے پاس آیا اور عرض کرنے لگا: اللہ کے رسول! اگر میں اللہ کی راہ میں شہید ہو جاؤں تو مجھے کیا ملے گا؟ آپ نے فرمایا: "تجھے جنت ملے گی۔" جب وہ یہ بات سن کر چلا گیا تو آپ نے اسے دوبارہ بلا کر فرمایا: "جبرئیل علیہ السلام نے ابھی ابھی میرے کان میں کہا ہے کہ ایسے حالات میں قرض معاف نہیں ہو گا۔" (مسند احمد:4/139)شریعتِ اسلامیہ نے مقروض انسان کا ہاتھ بٹانے والے کو بہت خیروبرکت سے نوازا ہے بشرطیکہ وہ اس سلسلے میں شرعی آداب کو ملحوظ رکھے۔ اسے چاہیے کہ وہ فراخ دلی اور فیاضی کا مظاہرہ کرے۔ اپنی دی ہوئی رقم کے عوض کسی قسم کا مفاد نہ لے اور نہ اس پر کسی وقت بیگار کا بوجھ ہی ڈالے، نہ اس پر احسان جتلا کر اسے تکلیف ہی پہنچائے بلکہ اگر مقروض تنگ دست ہے تو اسے مزید مہلت دے یا اسے بالکل معاف کر دے۔ قرآن مجید میں اپنے قرض کو مقروض پر صدقہ کر دینے کو بہتر قرار دیا گیا ہے۔ احادیث میں اس کے مندرجہ ذیل فضائل بیان ہوئے ہیں:رسول اللہ صلی اللہ علیہ وسلم نے فرمایا: "قرض، نصف صدقے کے قائم مقام ہے۔" (مسند احمد:1/412) اس کا مطلب یہ ہے کہ جتنی رقم قرض دی ہے، قرض دینے والے کو اتنا ثواب ملے گا گویا اس نے نصف رقم اس مقروض پر صدقہ کر دی ہے۔ اس کی مزید وضاحت درج ذیل حدیث سے ہوتی ہے۔ حضرت بریدہ اسلمی رضی اللہ عنہ کہتے ہیں کہ رسول اللہ صلی اللہ علیہ وسلم نے ایک دفعہ فرمایا: "جو انسان کسی تنگ دست مقروض کو مہلت دے دیتا ہے اسے ہر روز اتنی ہی رقم صدقہ کرنے کا ثواب ملتا ہے (جتنی اس نے قرض دی ہے)۔" پھر آپ نے فرمایا: "جو کسی مفلوک الحال کو اس کے حالات درست ہونے تک مہلت دیتا ہے اسے ہر روز قرض سے دوگنی رقم صدقہ کرنے کا ثواب ملتا ہے۔" اس پر میں نے سوال کیا کہ آپ نے اس قدر ثواب کی کمی بیشی کیونکر بیان فرمائی ہے؟ پھر آپ نے وضاحت کی کہ ادائیگی کے وعدے تک تو قرض کی رقم صدقہ کرنے کا ثواب ملتا ہے۔ اگر وعدے کے بعد مہلت دیتا ہے تو جتنے دن وعدے کے بعد آئیں گے، ان کے عوض ہر روز قرض سے دوگنی رقم صدقہ کرنے کا ثواب دیا جائے گا۔ (مسند احمد:5/360)گویا قرض کی نوعیت کے پیش نظر ثواب میں کمی بیشی ہوتی رہتی ہے۔ رسول اللہ صلی اللہ علیہ وسلم کا فرمان ہے: "جو شخص اپنے مقروض کو کشادگی تک مہلت دیتا ہے یا اسے معاف کر دیتا ہے وہ قیامت کے دن عرش کے سائے تلے ہو گا۔" (مسند احمد:5/300)رسول اللہ صلی اللہ علیہ وسلم نے ایک دعا ان الفاظ میں کی ہے: "اللہ تعالیٰ اس شخص پر رحم و کرم کرے جو خریدوفروخت اور قرض کا تقاضا کرنے میں نرمی اور فیاضی کا مظاہرہ کرتا ہے۔" (صحیح البخاری،البیوع،حدیث:2076)پیش کردہ ان احادیث کی روشنی میں اندازہ کیا جا سکتا ہے کہ کن حالات میں قرض لینا جائز ہے اور قرض لینے کے بعد اسے کیا کرنا چاہیے۔ ہمارے ہاں جو قومی خزانے سے اپنا سیاسی اثرورسوخ استعمال کر کے بڑے بڑے قرضے لینے کا رجحان پایا جاتا ہے پھر اسے مختلف حیلوں، بہانوں کے ذریعے سے معاف کرا لیا جاتا ہے، ان حضرات کا اخروی مستقبل انتہائی مخدوش ہو گا۔ اللہ تعالیٰ اس سے محفوظ رکھے۔ پھر قرض دینے والے حضرات بھی اس کے عوض جو فوائد و ثمرات حاصل کرتے ہیں وہ یقینا سود ہی کے دائرے میں آتے ہیں۔ دین اسلام نے سود لینے دینے کو اللہ اور اس کے رسول کے خلاف جنگ کرنا قرار دیا ہے اور حدیث کے مطابق سود کی کئی ایک شاخیں ہیں، سب سے ہلکا جرم گویا اپنی حقیقی ماں سے زنا کرنا ہے۔ (المعجم الاوسط للطبرانی:8/74،73،حدیث:7147) اللہ تعالیٰ ہمیں ان ہدایات پر عمل کرنے اور اپنی اصلاح کرنے کی توفیق دے، نیز قیامت کے دن ہمیں ہر قسم کی ذلت و رسوائی سے محفوظ رکھے۔ آمینامام بخاری رحمہ اللہ نے اس عنوان میں حجر کو بھی بیان کیا ہے۔ کسی شخص کو عارضی طور پر اس کی ملکیت میں تصرف کرنے سے روک دینا حجر کہلاتا ہے۔ حجر کی دو قسمیں ہیں: ایک یہ کہ جس شخص پر تصرف کی پابندی لگائی جا رہی ہے، یہ پابندی اس کے مفاد اور اس کی خیرخواہی میں ہو جیسا کہ بے وقوف یا فضول خرچ انسان پر پابندی لگائی جاتی ہے۔ دوسری قسم یہ ہے کہ دوسروں کی حق تلفی سے بچانے کے لیے پابندی لگائی جائے جیسا کہ کسی مقروض انسان پر قرض خواہوں کی وجہ سے پابندی لگائی جاتی ہے۔ عام طور پر اس حجر کے تین اسباب ہوتے ہیں: ایک یہ کہ کسی میں تصرف کی صلاحیت ہی نہ ہو، دوسرا یہ کہ صلاحیت تو ہو مگر اس کا استعمال غلط ہو رہا ہو، تیسرا یہ کہ اس کے مال میں تصرف سے دوسرے لوگوں کا نقصان ہو رہا ہو۔ اس کے علاوہ حجر کی مزید صورتیں حسب ذیل ہیں:٭ ایک معلم صحیح تعلیم دینے کے بجائے بچوں کو غلط تعلیم دیتا ہے۔ ٭ کوئی شخص لوگوں کے اخلاق سدھارنے کے بجائے بگاڑتا ہے۔ ٭ کوئی ادارہ گندی اور فحش کتابیں شائع کرتا ہے۔ ٭ کوئی مفتی غلط فتوے دیتا اور لوگوں کا دین خراب کرتا ہے۔ ٭ کوئی جاہل حکیم اپنا مطب کھول کر لوگوں کی صحت برباد کرتا ہے۔ ٭ کوئی پیشہ ور لوگوں سے دھوکا اور فراڈ کرتا ہے۔حکومت وقت کو چاہیے کہ ایسے لوگوں پر پابندی عائد کرے۔ عوام، حکومت تک اپنی شکایات پہنچا سکتے ہیں مگر انہیں چاہیے کہ قانون اپنے ہاتھ میں لے کر کوئی ایسا اقدام نہ کریں جس سے بدامنی اور بے چینی پھیلے۔ بہرحال یہ بھی حجر کی اقسام ہیں۔ حکومت کو ایسے لوگوں کا ضرور نوٹس لینا چاہیے۔ امام بخاری رحمہ اللہ نے اس سلسلے میں پچیس مرفوع احادیث بیان کی ہیں جن پر بیس کے قریب چھوٹے چھوٹے عنوان قائم کیے ہیں۔ چیدہ، چیدہ عنوان حسب ذیل ہیں:٭ ادھار پر اشیاء خریدنا۔ ٭ جو شخص مال ادا کرنے یا ہضم کرنے کی نیت سے قرض لے۔ ٭ قرضوں کی ادائیگی کیسے ہو؟ ٭ نرمی سے قرض لینے کا تقاضا کرنا۔ ٭ اچھی طرح سے قرض ادا کرنا۔ ٭ قرض سے پناہ طلب کرنا۔٭ مقروض کا جنازہ نہ پڑھنا۔ ٭ مقروض کا بلاوجہ ادائیگی سے ٹال مٹول کرنا۔ ٭ دیوالیہ یا محتاج کا اثاثہ فروخت کر کے قرض خواہوں میں تقسیم کرنا۔ ٭ قرض میں کمی کے لیے سفارش کرنا۔بہرحال امام بخاری رحمہ اللہ نے قرض کے متعلق بے شمار احکام و مسائل سے ہمیں آگاہ کیا ہے۔ انہوں نے اس سلسلے میں جو احادیث پیش کی ہیں وہ بھی قابل مطالعہ ہیں۔ ہماری گزارشات کو سامنے رکھتے ہوئے انہیں پڑھا جائے۔ اللہ تعالیٰ عمل کی توفیق دے۔ آمین

تمہید باب عربی

×

تمہید کتاب عربی

×