جامع ترمذی: كتاب: قرآن کریم کی تفسیر کے بیان میں (باب: سورہ الحدید سے بعض آیات کی تفسیر​)

ترجمۃ الباب:

3298.

ابوہریرہ ؓ کہتے ہیں: اس دوران کہ نبی اکرمﷺاور صحابہ بیٹھے ہوئے تھے ، ان پر ایک بدلی آئی، نبی اکرمﷺنے ان سے فرمایا: ’’کیا تم جانتے ہو یہ کیا ہے؟‘‘ انہوں نے کہا: اللہ اور اس کے رسول زیادہ جانتے ہیں، آپﷺ نے فرمایا: ’’یہ بادل ہے اور یہ زمین کے گوشے وکنارے ہیں۔ اللہ تعالیٰ اس بادل کو ایک ایسی قوم کے پاس ہانک کر لے جا رہا ہے جو اس کی شکر گزار نہیں ہے اور نہ ہی اس کو پکارتے ہیں‘‘، پھرآپﷺ نے فرمایا: ’’کیا تم جانتے ہو تمہارے اوپر کیا ہے؟‘‘ لوگوں نے کہا: اللہ اور اس کے رسول زیادہ جانتے ہیں، آپﷺ نے فرمایا: ’’یہ آسمان رقیع ہے، ایسی چھت ہے جو (جنوں سے) محفوظ کر دی گئی ہے، ایک ایسی (لہر) ہے جو (بغیر ستون کے) روکی ہوئی ہے، پھر آپﷺ نے پوچھا: ’’کیا تم جانتے ہو کہ کتنا فاصلہ ہے تمہارے اور اس کے درمیان؟‘‘ لوگوں نے کہا: اللہ اور اس کے رسول زیادہ جانتے ہیں۔ آپﷺ نے فرمایا: ’’تمہارے اور اس کے درمیان پانچ سو سال مسافت کی دوری ہے‘‘۔ پھر آپﷺ نے پوچھا: کیا تمہیں معلوم ہے اور اس سے اوپر کیا ہے؟ لوگوں نے کہا: اللہ اور اس کے رسول کو زیادہ معلوم ہے، آپﷺ نے فرمایا: ’’اس کے اوپر دو آسمان ہیں جن کے بیچ میں پانچ سو سال کی مسافت ہے۔ ایسے ہی آپﷺ نے سات آسمان گنائے، اور ہر دو آسمان کے درمیان وہی فاصلہ ہے جو آسمان وزمین کے درمیان ہے، پھر آپ نے پوچھا: اوراس کے اوپر کیا ہے؟‘‘ لوگوں نے کہا: اللہ اوراس کے رسول زیادہ جانتے ہیں، اور اس کے بعد آپﷺ نے فرمایا: ’’اس کے اوپر عرش ہے، عرش اور آسمان کے درمیان اتنی دوری ہے جتنی دوری دو آسمانوں کے درمیان ہے‘‘، آپﷺ نے پوچھا : کیا تم جانتے ہو تمہارے نیچے کیا ہے؟ لوگوں نے کہا: اللہ اور اس کے رسول زیادہ جانتے ہیں: آپﷺ نے فرمایا:' یہ زمین ہے‘‘، آپﷺ نے فرمایا: ’’کیا تم جانتے ہو اس کے نیچے کیا ہے؟‘‘ لوگوں نے کہا: اللہ اوراس کے رسول زیادہ جانتے ہیں آپﷺ نے فرمایا: ’’اس کے نیچے دوسری زمین ہے۔ ان دونوں کے درمیان پانچ سو سال کی مسافت کی دوری ہے، اس طرح آپﷺ نے سات زمینیں شمار کیں، اور ہر زمین کے درمیان پانچ سو سال کی مسافت کی دوری بتائی‘‘، پھر آپﷺ نے فرمایا: ’’قسم ہے اس ذات کی جس کے ہاتھ میں محمد کی جان ہے! اگر تم کوئی رسی زمین کی نچلی سطح تک لٹکاؤ تو وہ اللہ ہی تک پہنچے گی‘‘، پھر آپﷺ نے آیت ﴿هُوَ الأَوَّلُ وَالآخِرُ وَالظَّاهِرُ وَالْبَاطِنُ وَهُوَ بِكُلِّ شَيْئٍ عَلِيمٌ﴾۱؎ پڑھی۔
امام ترمذی کہتے ہیں:
۱۔ یہ حدیث اس سند سے غریب ہے۔
۲۔ ایوب، یونس بن عبید اور علی بن زید سے مروی ہے، ان لوگوں نے کہا ہے کہ حسن بصری نے ابوہریرہ سے نہیں سنا ہے۔
۳۔ بعض اہل علم نے اس حدیث کی تفسیر کرتے ہوئے کہا: مراد یہ ہے کہ وہ رسی اللہ کے علم پر اتری ہے، اور اللہ اور اس کی قدرت وحکومت ہر جگہ ہے اور جیسا کہ اس نے اپنی کتاب (قرآن مجید) میں اپنے متعلق بتایا ہے وہ عرش پر مستوی ہے۔