فوائد و مسائل:(1) اس حدیث میں وتروں کے بعد گفتگو کرنے اور دو رکعتیں پڑھ کر لیٹ جانے کا ذکر ہے۔ جس سے یہ استدلال کیا جاتا ہے کہ فجر کی دو سنتوں کے بعد لیٹنا سنت نہیں ہے، نبی ﷺ تو یوں ہی استرحت کے لیے لیٹ جاتےتھے، کبھی نماز تہجد کے بعد (جیسا کہ اس حدیث میں ہے ) اور کبھی فجر کی سنتوں کے بعد۔ لیکن یہ استدلال اس لیے صحیح نہیں کہ اس حدیث میں گفتگو کرنے اور وتروں کے بعد لیٹنے والی بات محفوظ نہیں ہے یعنی ایک راوی کو وہم ہواہے، جب کہ دوسرے تمام راویوں نے لیٹنے کا ذکر کی سنتوں کے بعد ہی کیا ہے۔ اس لیے فجر کی سنتوں کے بعد لیٹنے کو غیر مستحب قرار دینا صحیح نہیں ہے۔ ملاحظہ ہو: (فتح الباري، باب من تحدث بعد الرکعتین ولم یضطجع:3/56) علاوہ ازیں شیخ البانی نے بھی فجر کی سنتوں سے پہلے لیٹنے اور گفتگو کرنے کو شاذ قرار دیا ہے۔ (ضعیف ابو داؤد) اس سے یہ بھی معلوم ہوا کہ وتروں کے بعد دو رکعتین نفل پڑھنا بھی جائز ہے اور نبی ﷺ نے جو یہ فرمایا ہے کہ ’’تم وتر کو اپنی رات کی آخری نماز بناؤ۔‘‘  تویہ حکم وجوب کے طور پر نہیں، استحباب کے طور پر ہے۔ (مرعاة المفاتیح)