1۔ یہ روایت شیخ البانی کے نزدیک صحیح ہے۔ حدیث 866 اس کی مویئد ہے۔
2۔ قیامت کے روز اعمال کا محاسبہ حق ہے۔
3۔ شہادتین کے بعد نماز دین کا اہم ترین رکن ہے۔ اور حقوق اللہ میں سے اسی کا سب سے پہلے حساب ہوگا۔ (سنن نسائی، حدیث۔ 466) جب کہ حقوق العباد میں سب سے پہلے خونوں کا حساب لیا جائے گا۔ (صحیح بخاری، حدیث:6533 وصحیح مسلم،  حدیث: 1678)
4۔ فرائض کی ادائگی میں کسی بھی تقصیر سے انسان کو محتاط رہنا چاہیے۔ نیز نوافل کا بھی خوب اہمتام کرنا چاہیے۔ کیونکہ ان ہی سے فرضوں کی کمی پوری کی جائے گی۔
5۔ نوافل خصوصا سنن راتبہ (موکد) رسول اللہ ﷺکی سنت متواترہ ہیں۔ سفر کے علاوہ آپ نے کبھی انھیں ترک نہیں فرمایا بلکہ بعض اوقات تاخیر ہونے پر ان کی قضا بھی ادا کی ہے۔ کچھ صالحین کا کہنا ہے کہ سنن و نوافل کی پابندی فرائض پر پابندی کے لئے مہمیز کا کام دیتی ہے۔ اور جو شخص سنن میں غفلت کرتا ہے۔ عین ممکن ہے فرائض میں غفلت کا مرتکب ہوجائے۔
6۔ وہ احادیث جن میں رسول اللہ ﷺنے کچھ نو مسلم بدووں کو صرف فرائض کی پابندی کے عہد پر انہیں جنت کی خوش خبری دی۔ وہ اول تو ابتدائے اسلام کی بات ہے۔ یہی لوگ جوں جوں حق کو سمجھتے گئے۔ نوافل میں بہت آگے بڑھتے چلے گئے۔ جیسے کہ ان کی سیرتیں واضح کرتی ہیں۔ دوسرے رسول اللہ ﷺکی صحبت مبارکہ سے انھیں ایسا تزکیہ حاصل ہوجاتا تھا۔ کہ ان کے فرائض ہی سے اس اعلیٰ پائے کہ ہوجاتے تھے کہ وہ نوافل بھی پڑھتے تو ان کی کامیابی کی ضمانت اور خوشخبری زبان رسالت سے جاری ہوگئی تھی۔ لہذا دیگر مسلمانوں کا اس معاملے میں اپنے آپ کو ان پر قیاس کرنا صحیح نہیں ہے۔ اور صرف فرائض پر تکیہ کرنا ٹھیک نہیں ہے۔ بلکہ یوم الحسرۃ کو پیش نظررکھتے ہوئے مذید در مذید تقرب الیٰ اللہ۔ کو شش کرنی چاہیے۔ وباللہ التوفیق۔ ہاں بعض اوقات کسی عذر کی بنا پر سنتیں رہ جایئں تو ان کی قضا کرنا واجب نہیں ہے۔