1۔ یہ حدیث صحیح ہے‘ مگر بعض روایات میں ’’فصاعدا‘‘ کا لفظ منقول ہے۔ اس لفظ کے لگانے کا فائدہ یہ ہے کہ کم از کم سورہ فاتحہ پڑھنے یا اس سے کچھ زیادہ پڑھے۔ سورہ فاتحہ سے کم نہ پڑھے ٭یعنی سورہ فاتحہ کا پڑھنا بہر حال ضروری ہے۔ باقی رہا سفیان رحمہ اللہ کا بیان کہ یہ اکیلے کے لیے ہے تو یہ ان کی رائے ہے اور تس مسئلے میں ان لوگوں کے درمیان اختلاف رہا ہے ۔
2 (لاصلاة) میں لائے نفی جنس ہے‘ نفی کمال کا نہیں۔ شاہ ولی اللہ رحمہ اللہ نے کیا خوب ہے کہ نبی ﷺکےالفاظ اس کے رکن ہونے پر دلالت کرتے ہیں۔ (لاصلوٰةَ إِلّا بفاتحةِالكتابِ) اور (لاتُجزئُ صلوٰةُ رجلٍ حتی یُقيمَ ظھرَہُ في الرّکوعِ و السّجودِ) آدمی کی نماز جائز نہیں ہوتی جب تک کہ رکوع اور سجود میں اپنی کمر سیدھی نہ کر لے۔ جس عمل کو شارع علیہ السلام نے ’’صلوٰۃ‘‘سے تعبیر فرمایا ہےاس میں تنبیہ بلیغ ہے کہ یہ نماز میں رکن ہے۔ (حجةاللہ البالغة: 4/2) اس کا دوسرا مفہوم یہ بھی بیان کیا جاتا ہے کہ یہ لا نہی ہے- اس معنی میں کہ (لاصلاةَ إِلّا بقراءۃفاتحۃ الکتاب) یعنی فاتحہ کے بغیر نماز مت پڑھو‘‘ جیسے کہ فرمایا (لا صلوٰةَ بحضرةِ الطعامِ) (صحیح مسلم‘ حدیث نمبر : 560) کھانا تیار ہوتو نماز نہیں۔۔
3۔ خیال رہے کہ کچھ لوگ کہہ دیتے ہیں کہ حدیث ’’لاصلوٰة‘‘ کے الفاظ سے سورہ فاتحہ کا فرض ہونا لازم آتا ہے اور یہ قرآن اضافہ ہے یعنی قرآن مجید میں ہے کہ جب قرآن مجید کی تلاوت ہو رہی ہو تو خاموشی اختیار کرو۔ اور حدیث میں ہے کہ جو شخص سورہ فاتحہ نہ پڑھےاس کی نماز نہیں۔ یعنی سورہ فاتحہ کا پڑھنا لازم ہے۔ جب کہ (ان کے نزدیک) سنت سے قرآن پر اضافہ جائز نہیں۔ حالانکہ حقیقت یہ ہے کہ یہ خانہ سازاصول ہے۔ اسے قرآن پر اضافے سے تعبیر کرنا ہی یکسر غلط اور حدیث کو مسترد کرنے کا ایک طریقہ ہے۔ اسی من گھڑت اصول کی بابت امام شوکانی رحمہ اللہ نے فرمایا ہے کہ اس طرح کی بات کرنا ایک فاسد خیال ہے۔ جس کا نتیجہ بہت سی پاکیزہ سنتوں کے ترک کی صورت میں نکلتا ہے۔