سنن ابو داؤد: کتاب: نماز شروع کرنے کے احکام ومسائل (باب: چوتھی رکعت میں تورک کا بیان ( یعنی سرین پر بیٹھنا))

ترجمۃ الباب:

966.

جناب عباس یا عیاش (عیاش بن سہل ساعدی) بن سہل ساعدی بیان کرتے ہیں کہ وہ بھی اس مجلس میں موجود تھے جس میں ان کے والد حاضر تھے۔ اس میں بیان کیا کہ پس سجدہ کیا اور جب اٹھے تو اپنی دونوں ہتھیلیوں، گھٹنوں اور اپنے پاؤں کے پنجوں پر اٹھے، دراں حالیکہ آپ بیٹھے ہوئے تھے۔ پھر آپ نے تورک کیا (یعنی اپنی سرین پر بیٹھے) اور دوسرے پاؤں کو کھڑا کر لیا۔ پھر تکبیر کہی اور سجدہ کیا۔ پھر تکبیر کہی اور کھڑے ہو گئے اور تورک نہ کیا۔ اور دوسری رکعت پڑھی اور اسی طرح تکبیر کہی، پھر بیٹھ گئے۔ دو رکعتوں کے بعد حتیٰ کہ جب کھڑے ہونے کا ارادہ کیا تو تکبیر کہہ کر کھڑے ہو گئے اور پھر دوسری دو رکعتیں پڑھیں اور جب سلام کیا تو اپنی دائیں اور بائیں جانب سلام کیا۔ امام ابوداؤد ؓ فرماتے ہیں کہ عیسیٰ بن عبداللہ نے وہ کچھ ذکر نہیں کیا جو کچھ کہ عبدالحمید نے تورک اور دو رکعتوں سے اٹھتے وقت رفع یدین کا ذکر کیا ہے۔