1۔ قرآن مجید میں ہے۔ (إِنَّ اللَّـهَ وَمَلَائِكَتَهُ يُصَلُّونَ عَلَى النَّبِيِّ ۚ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا ﴿٥٦﴾ (الاحزاب:56) بلا شبہ اللہ تعالیٰ اپنے نبی پر رحمت نازل کرتا ہے۔ اور فرشتے آپ ﷺ کے لئے دعا کرتے ہیں۔اے ایمان والو! تم بھی نبی ﷺ پر درود بھیجو۔ اور سلام کو سلام کہنا۔ لغت عربی میں صلاۃ کا معنی ہے دعائے رحمت ومغفرت اور حسن ثناء۔ اس کی نسبت جب اللہ کی طرف ہوتی ہے۔ تو اس کا ترجمہ ہوتا ہے کہ اللہ اپنے بندے پر اپنی رحمت نازل فرماتا ہے۔ اس کے درجات بلند کرتا ہے۔ اور ملکوت میں اس کی ثناء فرماتا ہے۔ اور جب اس کی نسبت ملائکہ یا مومنین کی طرف ہوتی ہے۔ تو اس کا مفہوم ان امور کی طلب اور دعا ہوتی ہے۔ رسول اللہﷺ کے لئے صلاۃ میں آپ کی رفعت ذکر وشان۔ اظہاردعوت۔ ابقاء شریعت۔ تکثیراجر ثواب۔ اور بعثت مقام محمود سبھی شامل ہیں۔ اور ان سب مفاہیم کو ہماری اردو زبان میں فارسی لفظ درود سے تعبیر کیا جاتا ہے۔ اس مسئلے کی شرح وبسط کے لئے علامہ خفاجی کی نسیم الریاض شرح شفا قاضی عیاض اور امام ابن القیم کی جلاء الافہام دیکھنی چاہیے۔ اس کا اردو ترجمہ جو قاضی سلمان پوری نے کیا تھا۔ اسے دارالسلام نے الصلواۃ والسلام علیٰ رسول اللہ ﷺ کے عنوان سے نہایت دیدہ زیب انداز میں شائع کیا۔ (فأما السلام فقد عرفنا) سلام کہنا تو ہم نے جان لیا ہے یعن جیسے کہ آپ ﷺ نے ہمیں تعلیم فرمایا ہے۔ ملاقات کے موقع پر (السلام علیك یارسول اللہ) کہنا اور نماز میں (السلام علیك أیھاالنبي ورحمة اللہ وبرکاته) پڑھنا۔