التخريج

قسم الحديث (القائل): مرفوع ، اتصال السند: متصل ، قسم الحديث: قولی

‌صحيح البخاري: كِتَابُ الجِهَادِ وَالسِّيَرِ (بَابُ حَمْلِ الزَّادِ فِي الغَزْوِ)

حکم : أحاديث صحيح البخاريّ كلّها صحيحة 

ترجمة الباب: وَقَوْلِ اللَّهِ تَعَالَى: {وَتَزَوَّدُوا فَإِنَّ خَيْرَ الزَّادِ التَّقْوَى} [البقرة: 197]

2982. حَدَّثَنَا بِشْرُ بْنُ مَرْحُومٍ، حَدَّثَنَا حَاتِمُ بْنُ إِسْمَاعِيلَ، عَنْ يَزِيدَ بْنِ أَبِي عُبَيْدٍ، عَنْ سَلَمَةَ رَضِيَ اللَّهُ عَنْهُ، قَالَ: خَفَّتْ أَزْوَادُ النَّاسِ وَأَمْلَقُوا، فَأَتَوُا النَّبِيَّ صَلَّى اللهُ عَلَيْهِ وَسَلَّمَ، فِي نَحْرِ إِبِلِهِمْ فَأَذِنَ لَهُمْ، فَلَقِيَهُمْ عُمَرُ فَأَخْبَرُوهُ، فَقَالَ: مَا بَقَاؤُكُمْ بَعْدَ إِبِلِكُمْ؟ فَدَخَلَ عُمَرُ عَلَى النَّبِيِّ صَلَّى اللهُ عَلَيْهِ وَسَلَّمَ، فَقَالَ: يَا رَسُولَ اللَّهِ، مَا بَقَاؤُهُمْ بَعْدَ إِبِلِهِمْ؟ قَالَ رَسُولُ اللَّهِ صَلَّى اللهُ عَلَيْهِ وَسَلَّمَ: «نَادِ فِي النَّاسِ يَأْتُونَ بِفَضْلِ أَزْوَادِهِمْ»، فَدَعَا وَبَرَّكَ عَلَيْهِ، ثُمَّ دَعَاهُمْ بِأَوْعِيَتِهِمْ، فَاحْتَثَى النَّاسُ حَتَّى فَرَغُوا، ثُمَّ قَالَ رَسُولُ اللَّهِ صَلَّى اللهُ عَلَيْهِ وَسَلَّمَ: «أَشْهَدُ أَنْ لاَ إِلَهَ إِلَّا اللَّهُ، وَأَنِّي رَسُولُ اللَّهِ»

مترجم:

ترجمۃ الباب:

اور اللہ تعالیٰ کا فرمان کہ ’’ اپنے ساتھ توشہ لے جایا کرو‘‘ پس بے شک عمدہ ترین توشہ تقویٰ ہے ۔‘‘

2982.

حضرت سلمہ  ؓسے روایت ہے، انھوں نے بیان کیا کہ ایک مرتبہ دوران سفر میں صحابہ کرام ؓ کا سفری کھانا کم ہو گیا جس سے وہ قلاش ہو گئے۔ انھوں نے نبی ﷺ کی خدمت میں حاضر ہو کر اونٹ ذبح کرنے کی اجازت طلب کی، آپ نے انھیں اجازت دے دی۔ اتنے میں حضرت عمر  ؓ سے ان کی ملاقات ہو گئی تو انھوں نے اس اجازت کی اطلاع انھیں دی۔ انھوں نے فرمایا: ان اونٹوں کے بعد پھر تمھارے پاس کیا باقی رہ جائے گا؟ اس کے بعد حضرت عمر  ؓ نبی ﷺ کی خدمت میں حاضر ہوئے اور عرض کیا: اللہ کے رسول اللہ ﷺ! لوگ اگر اپنے اونٹ ذبح کر دیں تو پھر ان کے پاس باقی کیا رہ جائے گا؟ رسول اللہ ﷺ نے فرمایا: ’’لوگوں میں اعلان کردو کہ وہ اپنا بچا ہوا زاد سفر میرے پاس لائیں۔‘‘ چنانچہ آپ نے اس پر برکت کی دعا فرمائی۔ پھر آپ نے سب لوگوں کو ان کے برتنوں سمیت بلایا۔ سب نے بھر بھر کر کھانا لیا۔ جب فارغ ہو گئے تو رسول اللہ ﷺ نے فرمایا: ’’میں گواہی دیتا ہوں کہ اللہ کےسوا کوئی معبود بر حق نہیں اور میں اللہ کا رسول ہوں۔‘‘

×
ترجمۃ الباب:

ارشاد باری تعالیٰ ہے: "زادراہ ہمراہ رکھو۔  بلا شبہ عمدہ زادراہ تو تقویٰ ہی ہے۔ "


حدیث ترجمہ:

ہم سے بشر بن مرحوم نے بیان کیا، کہا ہم سے حاتم بن اسماعیل نے بیان کیا، ان سے یزید بن ابی عبید نے اور ان سے سلمہ ؓ نے بیان کیا کہ جب لوگوں کے پاس زاد راہ ختم ہونے لگا تو نبی کریم ﷺ کی خدمت میں لوگ اپنے اونٹ ذبح کرنے کی اجازت لینے حاضر ہوئے۔ آپ ﷺ نے اجازت دے دی۔ اتنے میں حضرت عمر ؓ سے ان کی ملاقات ہوئی۔ اس اجازت کی اطلاع انہیں بھی ان لوگوں نے دی۔ عمر ؓ نے سن کر کہا، ان اونٹوں کے بعد پھر تمہارے پاس باقی کیا رہ جائے گا (کیوں کہ انہیں پر سوار ہوکر اتنی دور دراز کی مسافت بھی تو طے کرنی تھی) اس کے بعد عمر ؓ نبی کریم ﷺ کی خدمت میں حاضر ہوئے اور عرض کیا، یا رسول اللہ ! لوگ اگر اپنے اونٹ بھی ذبح کردیں گے۔ تو پھر اس کے بعد ان کے پاس باقی کیا رہ جائے گا؟ آپ ﷺ نے فرمایا پھر لوگوں میں اعلان کردو کہ (اونٹوں کو ذبح کرنے کے بجائے) اپنا بچا کچھا توشہ لے کر یہاں آجائیں۔ (سب لوگوں نے جو کچھ بھی ان کے پاس کھانے کی چیز باقی بچ گئی تھی، آنحضرت ﷺ کے سامنے لا کر رکھ دی) آپ ﷺ نے دعا فرمائی اور اس میں برکت ہوئی۔ پھر سب کو ان کے برتنوں کے ساتھ آپ نے بلایا۔ سب نے بھر بھر کر اس میں سے لیا۔ اور جب سب لوگ فارغ ہو گئے تو رسول اللہ ﷺ نے فرمایا کہ میں گواہی دیتا ہوں کہ اللہ تعالیٰ کے سوا اورکوئی معبود نہیں اور میں اللہ کا رسول ہوں۔

حدیث حاشیہ:
  • یہ معجزہ دیکھ کر خود آپﷺ نے اپنی رسالت پر گواہی دی‘ معجزہ اللہ پاک کی طرف سے ہوتا ہے جسے وہ اپنے رسولوں کی صداقت ظاہر کرنے کے لئے ان کے ہاتھوں سے دکھلایا کرتا ہے۔ حضرت عمر  ؓنے یہ اس لئے فرمایا کہ اونٹ تمام ذبح کر دئیے جاتے تو پھر فوجی مسلمان سواری کس پر کرتے اور سارا سفر پیدل کرنا بے حد مشکل تھا۔ یہ مشورہ صحیح تھا اس لئے آنحضرتﷺ نے اسے قبول فرمایا اور بعد میں سارے فوجیوں کے راشن کو جو باقی رہ گیا تھا آپﷺ نے اکٹھا کرا کر برکت کی دعا فرمائی اور اللہ نے اس میں اتنی برکت دی کہ سارے فوجیوں کو کافی ہوگیا۔ معجزے کا وجود برحق ہے۔ مگر یہ اللہ کی مرضی پر ہے وہ جب چاہے اپنے مقبول بندوں کے ہاتھوں یہ دکھلائے۔ خود رسولوں کو اپنے طور پر اس میں کوئی اختیار نہیں ہے۔ ﴿ذالكَ فضلُ اللہِ یؤتیهِ مَن یشاءُ﴾ اس حدیث کے تحت حافظ ابن حجرؒ فرماتے ہیں: وَفِي الْحَدِيثِ حُسْنُ خُلُقِ رَسُولِ اللَّهِ صَلَّى اللَّهُ عَلَيْهِ وَسَلَّمَ وَإِجَابَتُهُ إِلَى مَا يَلْتَمِسُ مِنْهُ أَصْحَابُهُ وَإِجْرَاؤُهُمْ عَلَى الْعَادَةِ الْبَشَرِيَّةِ فِي الِاحْتِيَاجِ إِلَى الزَّادِ فِي السَّفَرِ وَمَنْقَبَةٌ ظَاهِرَةٌ لِعُمَرَ دَالَّةٌ عَلَى قُوَّةِ يَقِينِهِ بِإِجَابَةِ دُعَاءِ رَسُولَ اللَّهِ صَلَّى اللَّهُ عَلَيْهِ وَسَلَّمَ وَعَلَى حُسْنِ نَظَرِهِ لِلْمُسْلِمِينَ عَلَى أَنَّهُ لَيْسَ فِي إِجَابَةِ النَّبِيِّ صَلَّى اللَّهُ عَلَيْهِ وَسَلَّمَ لَهُمْ عَلَى نَحْرِ إِبِلِهِمْ مَا يَتَحَتَّمُ أَنَّهُمْ يَبْقَوْنَ بِلَا ظَهْرٍ لِاحْتِمَالِ أَنْ يَبْعَثَ اللَّهُ لَهُمْ مَا يَحْمِلُهُمْ مِنْ غَنِيمَةٍ وَنَحْوِهَا لَكِنْ أَجَابَ عُمَرُ إِلَى مَا أَشَارَ بِهِ لِتَعْجِيلِ الْمُعْجِزَةِ بِالْبَرَكَةِ الَّتِي حَصَلَتْ فِي الطَّعَامِ وَقَدْ وَقَعَ لِعُمَرَ شَبِيهٌ بِهَذِهِ الْقِصَّةِ فِي المَاء وَذَلِكَ فِيمَا أخرجه بن خُزَيْمَةَ وَغَيْرُهُ وَسَتَأْتِي الْإِشَارَةُ إِلَيْهِ فِي عَلَامَاتِ النُّبُوَّةِ الخ (فتح الباري) یعنی اس حدیث سے آنحضرتﷺ کے اخلاق فاضلہ پر روشنی پڑتی ہے اور اس پر بھی کہ آپﷺ صحابہ کرامؓ کے کسی بھی بارے میں التماس کرنے پر فوراً توجہ فرماتے اور سفر میں توشہ راشن وغیرہ حاجات انسانی کا ان کے لئے پورا پورا خیال رکھتے تھے۔ اس سے حضرت عمر رضی اللہ عنہ کی فضیلت بھی ثابت ہوئی کہ ان کو آنحضرتﷺ کی دعاؤں کی قبولیت پر کس قدر یقین کامل تھا اور مسلمانوں کے متعلق ان کی کتنی اچھی نظر تھی۔ وہ جانتے تھے کہ آنحضرتﷺ نے ان کے لئے جو اونٹوں کو ذبح کرنے کا مشورہ دیا ہے یہ اس احتمال پر ہے کہ ان کو ذبح کرنے کے بعد بھی اللہ پاک ان کے لئے غنیمت وغیرہ سے سواریوں کا انتظام کرا ہی دے گا۔ لیکن حضرت عمر ؓ نے آنحضرتﷺ کی برکت کی دعاؤں کے لئے عجلت فرمائی تاکہ بطور معجزہ کھانے میں برکت حاصل ہو اور اونٹوں کو ذبح کرنے کی نوبت ہی نہ آنے پائے۔ ایک دفعہ پانی کے قصہ میں بھی حضرت عمر ؓ کو اسی کے مشابہ معاملہ پیش آیا تھا۔ جس کا اشارہ علامات النبوۃ میں آئے گا۔ بعض فقہاء نے اس حدیث سے استنباط کیا ہے کہ گرانی کے وقت امام لوگوں کے فالتو غلہ کے ذخیروں کو بازار میں فروخت کے لئے حکماً نکلوا سکتا ہے۔ اس لئے کہ لوگوں کے لئے اسی میں خیر ہے نہ کہ غلہ کے پوشیدہ رکھنے میں۔
×
ترقیم کوڈاسم الترقيمنام ترقیمرقم الحديث (حدیث نمبر)
١.ترقيم موقع محدّث ویب سائٹ محدّث ترقیم3003
٢. ترقيم فؤاد عبد الباقي (المكتبة الشاملة)ترقیم فواد عبد الباقی (مکتبہ شاملہ)2982
٣. ترقيم العالمية (برنامج الكتب التسعة)انٹرنیشنل ترقیم (کتب تسعہ پروگرام)2760
٤. ترقيم فتح الباري (برنامج الكتب التسعة)ترقیم فتح الباری (کتب تسعہ پروگرام)2982
٥. ترقيم د. البغا (برنامج الكتب التسعة)ترقیم ڈاکٹر البغا (کتب تسعہ پروگرام)2820
٦. ترقيم شركة حرف (جامع خادم الحرمين للسنة النبوية)ترقیم حرف کمپنی (خادم الحرمین الشریفین حدیث ویب سائٹ)2874
٧. ترقيم دار طوق النّجاة (جامع خادم الحرمين للسنة النبوية)ترقیم دار طوق النجاۃ (خادم الحرمین الشریفین حدیث ویب سائٹ)2982
٨. ترقيم فؤاد عبد الباقي (دار السلام)ترقیم فواد عبد الباقی (دار السلام)2982
١٠.ترقيم فؤاد عبد الباقي (داود راز)ترقیم فواد عبد الباقی (داؤد راز)2982

الحكم على الحديث

×
اسم العالمالحكم
١. إجماع علماء المسلمينأحاديث صحيح البخاريّ كلّها صحيحة

تمہید باب

×

حضرت ابن عباس رضی اللہ تعالیٰ عنہ کہتے ہیں کہ اہل یمن حج کے لیے آتے لیکن زادراہ ساتھ لاتے اور کہتے کہ ہم تو اللہ تعالیٰ پر توکل کرتے ہیں پھر مدینہ طیبہ پہنچ کر لوگوں سے مانگنا شروع کر دیتے۔ اس موقع پر یہ آیت نازل ہوئی۔(صحیح البخاری الحج حدیث 1523)مطلب یہ ہے کہ سفر میں جاتے وقت اپنے ساتھ کھانے پینے کا سامان ہمراہ لے لیا کرو تاکہ تمھیں کسی سے مانگنانہ پڑے۔ یہ بہترین توشہ ہے جیسا کے ذریعے سے تم لوگوں سے مانگنا چھوڑدو گے اور تمھیں تقوی حاصل ہو جائے گا۔ حافظ ابن حجر رحمۃ اللہ علیہ کہتے ہیں امام بخاری رحمۃ اللہ علیہ نے اس عنوان سے اشارہ کیا ہے کہ سفر میں زاد سفر ساتھ لے جانا تو کل کے منافی نہیں ۔(فتح الباری:6/157)

تمہید کتاب

×

جہاد،لغوی طور پر جہد سے مشتق ہے۔اس کے معنی کسی مقصد کے حصول کے لیے انتہائی محنت،کوشش اورطاقت صرف کرنے کے ہیں۔لفظ جہد دوطرح سے پڑھا جاتا ہے:اگر اسے جیم کی پیش کے ساتھ پڑھاجائے تو اس کے معنی طاقت صرف کرنا اور اگر جیم کے زبر کے ساتھ پڑھا جائے تو اس کے معنی مشقت اٹھاناہے۔لفظ اجتہاد میں انتہائی ذہنی کوشش کا مفہوم ملحوظ خاطر رکھاجائےگا۔قرآن کریم میں بھی لفظ جہاد اپنے لغوی معنی میں استعمال ہوا ہے۔ارشاد باری تعالیٰ ہے:(وَوَصَّيْنَا الْإِنْسَانَ بِوَالِدَيْهِ حُسْنًا ۖ وَإِنْ جَاهَدَاكَ لِتُشْرِكَ بِي مَا لَيْسَ لَكَ بِهِ عِلْمٌ فَلَا تُطِعْهُمَا ۚ إِلَيَّ مَرْجِعُكُمْ فَأُنَبِّئُكُمْ بِمَا كُنْتُمْ تَعْمَلُونَ)"ہم نے انسان کو اپنے والدین کے ساتھ حسن سلوک کی وصیت کی ہے اور اگر وہ تجھ پر زوردیں کہ تو میرے ساتھ اس چیز کو شریک ٹھہرائے جس کاتجھے کوئی علم نہیں تو ان کا کہنامت مان،تمھیں میری طرف ہی لوٹ کر آناہے،پھر میں تمھیں بتاؤں گا جوتم کیا کرتے تھے۔"(العنکبوت 29/8)شرعی اصطلاح میں جہاد اس محنت وکوشش کانام ہے جو دین اسلام کی سربلندی کے لیے کی جاتی ہے،خواہ یہ کوشش انفرادی ہو یا اجتماعی ،زبانی ہو تحریری اور مالی ہو یا جانی۔لیکن واضح رہے کہ اس انتہائی جدوجہد میں نصب العین دین اسلام کی سربلندی ہوناچاہیے۔اگر یہ مقصود نہیں تو شرعی طور پر ایسی محنت وکوشش کو جہاد قرارنہیں دیا جاسکتا،البتہ غلبہ دین کی مذکورہ صورتوں میں سے جانی جدوجہد(قتال) تمام قسموں سے افضل ہے لیکن اسے ایک ہی صورت(قتال) کے ساتھ خاص کرلینا اسی طرح غلط ہے جس طرح غلبہ سوین کے علاوہ ہر قسم کی کوشش کوجہاد کرنا غلط ہے،چنانچہ قرآن کریم میں لفظ جہاد صرف قتال کے لیے نہیں بلکہ اس وسیع مفہوم کو اداکرنے کے لیے بھی استعمال ہواجس میں غلبہ دین کے لیے کی جانے والی ہرکوشش شامل ہے۔ارشاد باری تعالیٰ ہے:(وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا ۚ وَإِنَّ اللَّهَ لَمَعَ الْمُحْسِنِينَ)"اور وہ لوگ جنھوں نے ہمارے بارے میں پوری کوشش کی ہم انھیں اپنی راہیں ضرور دکھائیں گے اور بلاشبہ اللہ یقیناً نیکی کرنے والوں کےساتھ ہے۔"(العنکبوت:29/69)نیز اللہ تعالیٰ نے فرمایا:(فَلَا تُطِعِ الْكَافِرِينَ وَجَاهِدْهُمْ بِهِ جِهَادًا كَبِيرًا)"آپ ان کافروں کا کہنا مت مانیں اور قرآن کے ذریعے سے ان سے پوری طاقت کے ساتھ جہاد کریں۔"(الفرقان؛25/52)یہ دونوں آیات مکی سورتوں سے تعلق رکھتی ہیں جبکہ جہاد بمعنی قتال مدنی دور کے آغاز میں شروع ہوا۔مکی دور  میں جہاد غلبہ دین کی خاطر دشمنان اسلام کے خلاف کی جانے والی ہرکوشش ومحنت کے لیے عام ہے۔رسول اللہ صلی اللہ علیہ وسلم  کا ارشاد گرامی ہے:"تم مشرکین کے خلاف اپنے مالوں،اپنی جانوں اور اپنی زبانوں سے جہاد کرو۔"(سنن ابی داؤد الجھاد حدیث 2504)زبان سے جہاد کرنے کو کوئی بھی عقل مند قتال نہیں کہتا۔ہمارے رجحان کے مطابق غلبہ دین کے لیے ہر قسم کی جدوجہد جہاد کے دائرے میں آتی ہے،چنانچہ حافظ ابن تیمیہ رحمۃ اللہ علیہ  کہتے ہیں:"جہاد،دل سے ہوتا ہے جیساکہ اسلام پر ثابت قدم رہنے کا پختہ عزم کرنا،لوگوں کو اسلام اور اسلامی شریعت کی طرف دعوت دینا بھی جہاد ہے۔باطل پرستوں کے خلاف حجت قائم کرنا ،حق کا واضح کرنا اورشبہات کو دور کرنا بھی جہاد ہے۔مسلمانوں کے اجتماعی مفاد کے لیے تدبیر وتنظیم کرنا بھی جہاد ہے۔اس کے علاوہ دشمنانِ اسلام کے خلاف جنگ(قتال) کرنابھی جہاد ہے۔اس بنا پر مذکورہ بالاتمام صورتوں میں سے جو صورت بھی ممکن ہواس کے مطابق جہاد کرنا واجب ہے۔(مجموع الفتاویٰ 38/5)حافظ ابن حجر رحمۃ اللہ علیہ  کے نزدیک کفار کے خلاف جنگ لڑنا بھی جہاد ہے اور اس کے علاوہ غلبہ دین کے لیے کی جانے والی ہرجدوجہد بھی جہاد میں شامل ہے،چنانچہ وہ لکھتے ہیں:"کفار کے خلاف جنگ لڑنے کے لیے کوشش اورطاقت صرف کرنا جہاد ہے،اسی طرح نفس،شیطان اور فساق کے خلاف جدوجہد کرنے پر بھی جہاد کااطلاق ہوتا ہے۔جہاد بالنفس یہ ہے کہ دین کی بنیادی تعلیمات کو حاصل کیا جائے،پھر ان پر عمل کیا جائے ،نیز دوسرے لوگوں کو بھی ان کی دعوت دی جائے۔جہاد بالشیطان یہ ہے کہ شیطان کی طرف سے جو شبہات ووساوس پیدا کیے جاتے ہیں انھیں دور کرنے کے لیے محنت اور مشقت اٹھائی جائے،اس کے علاوہ کفار کے خلاف اپنے ہاتھ ،مال،زبان اور دل سے جہاد کیا جائے ،نیز فساق ومنافقین کے خلاف بھی اپنے ہاتھ یا پھر دل اور زبان سے جہاد کیا جائے۔"(فتح الباری 5/6)اس اقتباس سے معلوم ہوتاہے کہ حافظ ابن حجر رحمۃ اللہ علیہ  کے نزدیک جہاد اور قتال دو الگ الگ اصطلاحات ہیں،چنانچہ وہ مزید وضاحت کرتے ہوئے لکھتے ہیں:تحقیقی طور پر یہ بات بھی ثابت ہے کہ کفار کے خلاف  جہاد کرنا ہر مسلمان پر فرض ہے،خواہ وہ اپنے ہاتھ کے ساتھ جہاد کرے یا زبان کے ساتھ یامال کے ساتھ یا اپنے دل کےساتھ۔"(فتح الباری 47/6)ظاہر ہےکہ زبان ،مال اور دل کے ساتھ کی جانے والی جدوجہد کو قتال نہیں کہا جاسکتا۔البتہ اسے جہاد سے تعبیر کیا جاسکتا ہے،نیز ہر مسلمان تو کافروں کے خلاف قتال نہیں کرسکتا،البتہ جہاد کسی نہ کسی صورت میں کیا جاسکتا ہے۔امام ابن قیم رحمۃ اللہ علیہ  نے اس موضوع پر تفصیل سے گفتگو کی ہے۔انھوں نے جہاد کو محض قتال تک محدود کرنے کےبجائے اسے وسیع مفہوم میں استعمال کیاہے۔ان کے نزدیک غلبہ دین کے لیے کی جانے والی ہرکوشش،محنت اور جدوجہد جہاد ہے،چنانچہ وہ لکھتے ہیں:"اللہ کے دشمنوں،یعنی کفار کے خلاف جہاد کرنا اس بات پر منحصر ہے کہ وہ مسلمان پہلے اللہ کے لیے اپنے نفس کے خلاف  جہاد کرے جیسا کہ ارشاد نبوی ہے:"جس نے اللہ کی اطاعت میں رہتے ہوئے اپنے نفس کے خلاف جہاد کیا وہ مجاہد ہے۔"(مسند احمد 22/4)اس کامطلب یہ ہے کہ خارجی دشمن کے خلاف جہاد کرنے سے پہلے اپنے نفس کے خلاف جہاد کرنا انتہائی ضروری ہے کیونکہ جو انسان اپنے نفس کو اللہ کے اوامرونواہی اوردیگر احکام شرعیہ کا پابند نہیں بناتا،اس کے لیے دشمن کے خلاف میدان جنگ میں جہاد کرنا ممکن ہی نہیں رہتا کیونکہ جب وہ اپنے پہلو کے دشمن کے ہاتھوں مغلوب ہواور اس کے خلاف جہاد نہ کرے،وہ خارجی دشمن کے خلاف جہاد کیسے کرسکتا ہے؟علاوہ ازیں ایک تیسرا دشمن بھی ہے جب تک انسان اس کے خلاف علم بغاوت بلند نہ کرے کفار اور نفس کے خلاف جہاد نہیں ہوسکتا اور وہ شیطان ہے جس کے متعلق ارشاد باری تعالیٰ ہے:(إِنَّ الشَّيْطَانَ لَكُمْ عَدُوٌّ فَاتَّخِذُوهُ عَدُوًّا.......)"یقیناً شیطان تمہارا دشمن ہے،لہذا تم اسے دشمن ہی سمجھو۔"(الفاطر 35/6)شیطان کو دشمن خیال کرنے کا اللہ تعالیٰ نے حکم دیاہے،اس کامطلب یہ ہے کہ اس کے خلاف جنگ کرنے میں پوری توانائی صرف کی جائے اور کسی قسم کی کوتاہی نہ کی جائے۔ابن قیم رحمۃ اللہ علیہ  مزید لکھتے ہیں کہ جہاد کے چار مراتب ہیں:1۔نفس کے خلاف جہاد۔2۔شیطان کے خلاف جہاد۔3۔کفار کے خلاف جہاد۔4۔منافقین کے خلاف جہاد۔1۔نفس کے خلاف جہاد کے چاردرجے ہیں:الف۔دین اسلام کی ضروری ہدایات حاصل کرکے اپنے نفس کے خلاف جہاد کرے کیونکہ دینی رشدوہدایت کے بغیر اخروی نجات ممکن نہیں۔ب۔حاصل کردہ بنیاد معلومات پر عمل پیراہوکرنفس کے خلاف جہاد کرے کیونکہ اس علم کا کوئی فائدہ نہیں جس پر عمل نہ کیاجائے۔ج۔پھر حاصل کردہ دینی معلومات ان لوگوں تک پہنچائے جو ان سے بےخبر ہیں بصورت دیگر اسے ان لوگوں میں شمار کیا جائے گا جو علم چھپانے کے مرتکب ہیں۔د۔دعوت حق کے راستے میں جو مشکلات اور تکلیفیں درپیش ہوں انھی خوشی سے برداشت کرتے ہوئے اپنے نفس کے خلاف جہاد کرے۔جب انسان چار مراتب کو مکمل کرلے گا تو اسے علمائے ربانیین میں شمار کیاجائے گا۔2۔شیطان کے خلاف جہاد کے دو مرتبے ہیں:الف۔شیطان کی طرف سے بندے کے ایمان کو ختم کرنے کے لیے اس کے دل میں شکوک وشہات پیدا ہوں ان کو دور کرنے کے لیے جدوجہد کرنا۔ب۔شیطان کی طرف سے بندے کے ایمان کو کمزور کرنے کے لیے جو بری خواہشات اس کے دل میں ڈالی جاتی ہیں ان کے خلاف جہاد کرنا۔پہلے مرتبے کے لیے یقین اور دوسرے مرتبے کے لیے صبر کی انتہائی ضرورت ہے۔ارشاد باری تعالیٰ ہے:"ہم نے ان میں سے کچھ پیشوا بنائے جو ہمارے حکم سے رہنمائی کرتے تھے۔جب انھوں نے صبر کیا اور وہ ہماری آیتوں پر یقین رکھتے تھے۔"صبر کے ذریعے سے شہوات اور یقین کےذریعے شبہات کو دور کیا جاتاہے۔3۔4۔کفار اور منافقین کے خلاف جہاد کرنے کے چار مراتب ہیں:1۔دل سے جہاد کرنا۔2۔زبان سے جہاد کرنا۔3۔مال سے جہادکرنا۔4۔جان سے جہاد کرنا۔ان میں سے دل اور مال کے ذریعے سے کفار اور منافقین دونوں کے خلاف جہاد کیا جاسکتا ہے جبکہ طاقت اور جان کے ساتھ جہاد کرنا کفار کے ساتھ خاص ہے اور منافقین کے ساتھ زبان سے جہاد کیاجائےگا۔ان کے خلاف تلوار نہیں اٹھائی جائےگی۔علاوہ ازیں ظلم پیشہ اور اہل بدعت کے خلاف بھی جہاد کیا جاتا ہے۔اس جہاد کے تین مراتب ہیں:©۔اگر طاقت ہوتو ہاتھ کے ساتھ ان کے خلاف جہاد کیا جائے،یعنی قوت سے انھیں روکاجائے۔©۔اگر ہاتھ سے روکنے کی طاقت نہ ہوتو زبان سے اس برائی کے خلاف اظہار کیاجائے۔©۔اگر زبانی جہاد کی ہمت نہ ہوتو دل سے ان کے خلاف جہادکیا جائے ،یعنی ظلم اور اہل ظلم سے دلی نفرت کی جائے۔اس تفصیل سے معلوم ہوا کہ جہاد کے تیرہ درجات ہیں۔ارشاد نبوی ہے:"جو شخص اس حال میں فوت ہوا کہ اس نے کبھی جہاد نہ کیا اور نہ اس کے دل میں کبھی جہاد کا خیال ہی پیدا ہواتو وہ گویا انفاق کی شاخ پر فوت ہوا ہے۔(صحیح مسلم الامارۃ حدیث 4931(1910)نفس اورشیطان کے خلاف جہاد کرنا ہرمسلمان پر فرض عین ہے جبکہ کفار ومنافقین کے خلاف جہاد کرنا فرج کفایہ ہے۔اگرامت کے کچھ افراد اس میں شریک ہوں تو دوسروں کو بھی کفایت کرجائےگا۔(زادالمعاد 3/9۔11)ہماری اس تفصیل کا مقصد یہ ہے کہ قرآن وحدیث میں بیشتر مقامات پر جہاد" قتال فی سبیل اللہ" کے معنی میں استعمال ہوا ہے کیونکہ اللہ تعالیٰ کے کلمے کی سربلندی کے لیے آخری کوشش مقدس جہاد کی یہی قسم ہے لیکن کتاب وسنت میں جہاد جنگ کے علاوہ تحفظ دین کی دوسری کوششوں پر بھی جابجا بولاگیا ہے۔بالخصوص منافقین سے جہاد کی بیشتر صورتیں تلوار کے بغیر ہیں۔اسی طرح مکی سورتوں میں جہاد کا ذکر قطعاً جنگ کے معنی میں نہیں آیا،اس لیے ہر مقام پر جہاد کو قتال فی سبیل اللہ کے معنی میں لینا اس کی غلط تعبیر ہے۔انسانی سوسائٹی میں حکم اور قانون کا درجہ انسانی خواہشات اور عقل وگمان کو نہیں بلکہ اللہ تعالیٰ کے احکام اور آسمانی تعلیمات کوحاصل ہوناچاہیے۔اورکلمۃ اللہ کی اسی سربلندی کے لیے دین اسلام میں دینی معرکہ آرائی کے تسلسل کو باقی رکھا گیا ہے تاکہ کسی دور میں بھی انسانی خواہشات کو آسمانی تعلیمات پر غلبہ حاصل نہ ہونے پائے۔لیکن دور حاضر میں خواہشات اور محدود عقل نے ہر طرف ڈیرے ڈال رکھے ہیں اور آسمانی تعلیمات سے رہنمائی حاصل کرنے کے بجائے اس کے نشانات کو بھی ختم کرنے کی عالمی سطح پر کوشش شروع ہے۔ایسے حالات میں اللہ کے دین کو سربلند کرنے کے یہ معنی ہیں کہ نسل انسانی کو خواہشات کی غلامی اور عقل محض کی پیروی سے نکالا جائے اور اسے آسمانی تعلیمات کی ضرورت کا احساس دلاتے ہوئے وحی الٰہی کے دائرے میں لانے کی بھر پور کوشش کی جائے ،نیز دنیا کے مختلف خطوں میں مسلمان جس مظلومیت کا شکار ہیں اور انھیں بڑی سنگ دلی کے ساتھ ان کے مذہبی تشخص سے محروم کیاجارہا ہے،ان مسلط قوتوں کے خلاف کلمہ حق بلند کرنا اورمظلوم مسلمانوں کو ظلم وجبر کے ماحول سے نکالنے کے لیے جو کچھ ممکن ہوا سے کرگزرنا بھی اعلائے کلمۃ اللہ کا تقاضاہے ۔ایسے حالات میں جس طرح قتال دفاع دین کے لیے ہوتا ہے اسی طرح کافرانہ معاشرے میں قائم ظلم وزیادتی کے خاتمے کے لیے بھی ہوتاہے۔امام بخاری رحمۃ اللہ علیہ  نے اس بڑے عنوان کے تحت جہاد کے متعلق ایک پورا نظام پیش کیا ہے جس میں جہاد کی فرضیت وفضیلت ،اہمیت وافادیت،غرض وغایت اور اس کے آداب  وشرائط کو بیان کیا ہے۔اس سلسلے میں انھوں نے تین سوچھہتراحادیث ذکر کی ہیں۔جن میں چالیس معلق اور باقی متصل سند سے مروی ہیں۔ان کےعلاوہ ستائیس ےکے قریب صحابہ کرام رضوان اللہ عنھم اجمعین  اور تابعین رحمۃ اللہ علیہ  عظام سے مروی آثار بھی ذکر کیے ہیں۔ان مرفوع احادیث میں دوسوچھیاسٹھ احادیث مکرر اور ایک سودس خالص ہیں،نیز امام بخاری رحمۃ اللہ علیہ  نے روایت کردہ احادیث وآثار پر جہاد کے متعلق دوسو کے لگ بھگ چھوٹے چھوٹے عنوان قائم کیے ہیں،جن سے ان کی دقت فہم اور قوت استنباط کا پتہ چلتا ہے،جن میں جنگ سے پہلے کے آداب ،میدان جنگ کے آداب،جنگ کے بعد کے آداب کو تفصیل سے بیان کیا ہے۔اس کے علاوہ مال غنیمت کے حقوق وشرائط پر،پھر جنگی قیدیوں کے متعلق آداب وشرائط کو بھی ذکر کیا ہے۔جہاد سے متعلق رسول اللہ صلی اللہ علیہ وسلم  سے منقول کچھ پیش گوئیاں بھی بیان کی ہیں۔اُمید ہے کہ امام بخاری رحمۃ اللہ علیہ  کے قائم کردہ عنوان اور پیش کردہ احادیث ہمارے لیے ایمان کی تازگی اور جذبہ جہاد کی بیداری کا باعث ہوں گے۔ہماری پیش کردہ معروضات کو  سامنے رکھتے ہوئے ان احادیث کا مطالعہ کریں تاکہ عاقبت نااندیش مسلم منکرین اور عقل عیار کے پیروکار دانشوروں کے جہاد سے متعلق پھیلائے ہوئے زہریلے شکوک وشبہات کا مداوا ہوسکے ۔دعا ہے کہ اللہ تعالیٰ ہمیں یقین کامل کی نعمت عطا فرمائے تاکہ ہم اپنی کھوئی ہوئی عظمت کو دوبارہ حاصل کرسکیں۔

تمہید باب عربی

×

تمہید کتاب عربی

×