Sahi-Bukhari | صحیح بخاری

موضوعات

شجرۂ موضوعات

ایمان (21673)

اقوام سابقہ (2922)

سیرت (18010)

قرآن (6272)

اخلاق و آداب (9761)

عبادات (51486)

کھانے پینے کے آداب و احکام (4155)

لباس اور زینت کے مسائل (3633)

نجی اور شخصی احوال ومعاملات (6547)

معاملات (9225)

عدالتی احکام و فیصلے (3431)

جرائم و عقوبات (5046)

جہاد (5356)

علم (9419)

قسم الحديث (القائل): مرفوع ، اتصال السند: متصل ، قسم الحديث: صفات و شمائل للنبیﷺ

‌صحيح البخاري: كِتَابُ التَّوْحِيدِ وَالرَدُّ عَلَی الجَهمِيَةِ وَغَيرٌهُم (بَابُ {وَكَانَ عَرْشُهُ عَلَى المَاءِ} [هود: 7]، {وَهُوَ رَبُّ العَرْشِ العَظِيمِ} [التوبة: 129])

حکم : أحاديث صحيح البخاريّ كلّها صحيحة

ترجمة الباب: قَالَ أَبُو العَالِيَةِ: {اسْتَوَى إِلَى السَّمَاءِ} [البقرة: 29]: «ارْتَفَعَ»، {فَسَوَّاهُنَّ} [البقرة: 29]: «خَلَقَهُنَّ» وَقَالَ مُجَاهِدٌ: {اسْتَوَى} [البقرة: 29]: «عَلاَ» {عَلَى العَرْشِ} [الأعراف: 54] وَقَالَ ابْنُ عَبَّاسٍ: {المَجِيدُ} [ق: 1]: «الكَرِيمُ»، وَ {الوَدُودُ} [البروج: 14]: «الحَبِيبُ»، يُقَالُ: «حَمِيدٌ مَجِيدٌ، كَأَنَّهُ فَعِيلٌ مِنْ مَاجِدٍ، مَحْمُودٌ مِنْ حَمِدَ»

7496 . وَقَالَ الْمَاجِشُونُ عَنْ عَبْدِ اللَّهِ بْنِ الْفَضْلِ عَنْ أَبِي سَلَمَةَ عَنْ أَبِي هُرَيْرَةَ عَنْ النَّبِيِّ صَلَّى اللَّهُ عَلَيْهِ وَسَلَّمَ قَالَ فَأَكُونُ أَوَّلَ مَنْ بُعِثَ فَإِذَا مُوسَى آخِذٌ بِالْعَرْشِ

صحیح بخاری:

کتاب: اللہ کی توحید اس کی ذات اور صفات کے بیان میں اور جهميہ وغیرہ کی تردید

(

باب: ( سورۃ ہود میں اللہ کا فرمان ) اور اس کا عرش پانی پر تھا ، اور وہ عرش عظیم کا رب ہے،،

)

مترجم: ١. شیخ الحدیث حافظ عبد الستار حماد (دار السلام)

ترجمۃ الباب:

ابوالعالیہ نے بیان کیا کہ «استوى إلى السماء‏» کا مفہوم یہ ہے کہ وہ آسمان کی طرف بلند ہوا۔ «فسواهن‏» یعنی پھر انہیں پیدا کیا۔ مجاہد نے کہا کہ «استوى‏» بمعنی «على العرش‏.‏» ہے۔ ابن عباس ؓ نے فرمایا کہ «مجيد» بمعنی «كريم» ۔ «الودود» بمعنی«الحبيب‏.‏» بولتے ہیں۔ «حميد» ، «مجيد» ۔ گویا یہ فعیل کے وزن پر ماجد سے ہے اور «محمود» ، «حميد‏.‏» سے مشتق ہے۔

7496. سیدنا ابو ہریرہ ؓ سے روایت ہے وہ نبی ﷺ سے بیان کرتے ہیں کہ آپ نے فرمایا: ”قیامت کے دن میں سب سے پہلے والا ہون گا تو دیکھوں گا کہ موسٰی ؑ عرش کا پایہ تھامے ہوئے ہیں۔“

تشریح:

1۔ایک روایت میں ہے کہ رسول اللہ صلی اللہ علیہ وسلم نے فرمایا: ’’اب میں نہیں جانتا کہ وہ پہلے صور پر بے ہوش ہی نہیں ہوئے یا دوسرے صور پر مجھ سے پہلے ہوش میں آجائیں گے۔ (کیونکہ وہ دنیا میں ایک دفعہ بے ہوش ہو چکے تھے)‘‘ (صحیح البخاري، الخصومات، حدیث: 2411) قرآنی آیات سے معلوم ہوتا ہے کہ تین دفعہ صورمیں پھونکا جائے گا۔ ©پہلی مرتبہ صور میں پھونکے جانے پر گھبراہٹ واقع ہوگی۔ ©دوسری مرتبہ لوگ بے ہوش ہو جائیں گے۔ اور مر جائیں گے۔ ©تیسری مرتبہ صورمیں پھونکے جانے پر سب انسان زندہ ہو کر اپنے پروردگار کے حضور پیش ہوں گے۔ (الزمر:39۔68 والکهف:18۔99) بعض نے پہلی اور دوسری مرتبہ کو ایک ہی شمارکیا ہے۔
2۔امام بخاری رحمۃ اللہ علیہ نے اللہ تعالیٰ کے عرش کے بارے میں جو احادیث پیش کی ہیں ان سے معلوم ہوتا ہے کہ اللہ تعالیٰ کا محل استواء ہے۔ ©وہ تمام مخلوقات کے اوپرہے۔ ©اسے فرشتوں نے اٹھارکھا ہے۔ © قیامت کے دن خصوصی طور پر آٹھ فرشتے اسے اُٹھائیں گے۔ ©اللہ تعالیٰ کے مقرب فرشتے اس کا طواف کرتے ہیں۔ ©زمین و آسمان کی تخلیق سے پہلے وہ پانی پر موجود تھا۔ ©اس کے پائے ہیں یعنی وہ کروی (گول) شکل کا نہیں ہے۔ ©اللہ تعالیٰ نے اسے عظیم کریم اور مجید کہا ہے۔ ©اللہ تعالیٰ نے اپنی تعریف کی ہے کہ عرش کا مالک ہے۔ ©وہ انتہائی وزنی ہے۔ (صحیح مسلم، الذکر والدعاء، حدیث: 6913(2726) ©فردوس اعلیٰ کی چھت عرش الٰہی کی ہے۔
3۔عرش کے حوالے سے دو باتوں کا ذکر انتہائی ضروری ہے۔ ذات باری تعالیٰ کے متعلق لوگوں کے مختلف نظریات ہیں۔ مثلاً: (ا)اللہ تعالیٰ حضرت آدم علیہ السلام کے اندر تھےاسی لیے فرشتوں نے آدم علیہ السلام کو سجدہ کیا۔ (ب) اللہ تعالیٰ نے رسول اللہ صلی اللہ علیہ وسلم کی صورت میں ظہور کیا۔ (ج) اللہ تعالیٰ ہر نوع انسان کے صورت میں موجود ہے۔ (و) اللہ تعالیٰ ہر نوع کی مخلوق میں موجود ہے۔ یہ مختلف نظریات لوگوں کی تصانیف میں موجود ہیں اور اس قدر مشہور ہیں کہ ان کے حوالہ جات کی ضرورت نہیں لیکن یہ جھوٹ اور بہتان پر مبنی ہیں۔اللہ تعالیٰ نے اپنی ذات کا تعارف اس طورپر کر دیا ہے کہ وہ اپنی ذات و صفات اور افعال میں یکتا ہے۔ آسمانوں کے اوپرعرش پر مستوی ہے اور جملہ کائنات سےالگ کسی میں حلول نہیں ہے البتہ اپنے علم اور قدرت کے اعتبار سے تمام کائنات کو گھیرے میں لیے ہوئے ہے۔ کتاب وسنت کے نصوص کا خلاصہ یہی ہے۔
4۔لوگوں میں مشہور ہے کہ جب رسول اللہ صلی اللہ علیہ وسلم معراج کی رات عرش پر گئے تو جوتے اتارنے لگے اللہ تعالیٰ کی طرف سے حکم ہوا کہ تم جوتے سمیت آجاؤ۔ یہ حکایت گپ ہے۔ اس کا کہیں بھی ثبوت نہیں بلکہ قرآنی آیات اس کی تکذیب کرتی ہیں چنانچہ ارشاد باری تعالیٰ ہے۔ ’’آپ ان سے کہیں کہ اگر اللہ کے ساتھ کوئی اور معبود ہوتے جیسا کہ مشرک کہتے ہیں تو وہ اللہ عرش تک پہنچنے کے لیے ضرور کوئی راہ نکالتے ۔‘‘ (بني إسرائیل:17۔42) اس آیت سے معلوم ہوا کہ اللہ تعالیٰ عرش پر ہے اور وہاں کوئی نہیں پہنچ سکتا نیز وہ اپنی مخلوق سے الگ ہے چہ جائیکہ وہ ہر چیز کا جز ہو یا ہر چیز میں سرایت کیے ہوئے ہو جیسا کہ بعض گمراہ فرقوں کا عقیدہ ہے۔ اس سے بھی مذکورہ حکایت کے جھوٹ ہونے کا پتا چلتا ہے چنانچہ امام نجم الدین اپنے رسالہ معراج میں لکھتے ہیں سوال میں رسول اللہ صلی اللہ علیہ وسلم کے جوتوں سمیت عرش پر چڑھنے کا ذکر ہے۔ اللہ تعالیٰ اس خود ساختہ قصہ بیان کرنے والے کو مارے دہ کس قدر بے حیا اور بے ادب ہے۔ (توحید خالص از شیخ بدیع الدین، ص:35)

Sharing Link: https://mohaddis.com/View/Sahi-Bukhari/T1/7496

ترقیم کوڈ	اسم الترقيم	نام ترقیم	رقم الحديث (حدیث نمبر)
١	ترقيم موقع محدّث	ویب سائٹ محدّث ترقیم	7496
٢	ترقيم فؤاد عبد الباقي (المكتبة الشاملة)	ترقیم فواد عبد الباقی (مکتبہ شاملہ)	7428
٣	ترقيم العالمية (برنامج الكتب التسعة)	انٹرنیشنل ترقیم (کتب تسعہ پروگرام)	6877.01
٤	ترقيم فتح الباري (برنامج الكتب التسعة)	ترقیم فتح الباری (کتب تسعہ پروگرام)	7428.01
٥	ترقيم د. البغا (برنامج الكتب التسعة)	ترقیم ڈاکٹر البغا (کتب تسعہ پروگرام)	6991.01
٦	ترقيم شركة حرف (جامع خادم الحرمين للسنة النبوية)	ترقیم حرف کمپنی (خادم الحرمین الشریفین حدیث ویب سائٹ)	7152.01
٧	ترقيم دار طوق النّجاة (جامع خادم الحرمين للسنة النبوية)	ترقیم دار طوق النجاۃ (خادم الحرمین الشریفین حدیث ویب سائٹ)	7428
٨	ترقيم فؤاد عبد الباقي (دار السلام)	ترقیم فواد عبد الباقی (دار السلام)	7428
١٠	ترقيم فؤاد عبد الباقي (داود راز)	ترقیم فواد عبد الباقی (داؤد راز)	7428

دین اسلام میں سب سے زیادہ اہم فرض عقائد کی درستی ہے۔تمام انبیائے کرام علیہ السلام نے لوگوں کو سب سے پہلے اصلاح عقیدہ کی دعوت دی۔اس کے بعد عبادات واحکام اور فرائض وواجبات کی بجاآوری ،اس کے بعد معاملات،پھر ظاہری اور باطنی اخلاق کی اصلاح کا درجہ ہے۔مذکورہ شعبہ جات کو اپنے اپنے مقام پر رکھنا بہت ضروری ہے،چنانچہ اصول وعقائد اور فرائض وواجبات میں سے کسی ایک کا انکار انسان کو دائرہ اسلام سے خارج کردیتاہے،البتہ اخلاق میں گراوٹ اور عمل میں کوتاہی سے کوئی شخص ملتِ اسلام سے خارج نہیں ہوتا۔لغوی طور پر لفظ توحید مصدر ہے۔اس کے معنی کسی ذات کے متعلق یکتا اور منفرد ہونے کایقین کرنا ہیں۔شرعی اصطلاح میں اس بات کا اقرارویقین کرناکہ اللہ تعالیٰ اپنی ذات وصفات،الوہیت وربوبیت،عبودیت وحاکمیت اور تمام اختیارات میں یکتا ویگانہ ہے،اسے توحید کہتے ہیں۔اس توحید کی کئی قسمیں ہیں۔ان میں سے ایک انتہائی اہم قسم توحید اسماء وصفات ہے کیونکہ اللہ تعالیٰ کی کامل معرفت،اللہ تعالیٰ کے اسماء وصفات اور اس کےافعال کا ذکر دیگراحکام کے ذکر سے کہیں زیادہ ہے۔حافظ ابن قیم رحمۃ اللہ علیہ لکھتے ہیں:"بندے کی تمام ترسعادت اللہ تعالیٰ کی ذات وصفات کی معرفت کے ساتھ قائم ہے جبکہ اسماء وصفات سے جہالت ،شقاوت وبدبختی کی بنیاد ہے۔"(مفتاح دارالسعادۃ 1/86)توحید اسماء وصفات کی اہمیت کا اندازہ اس امر سے بھی بخوبی لگایا جاسکتا ہے کہ انسان کے لیے اس وقت تک مکمل طریقے کے مطابق اللہ تعالیٰ کی عبادت ممکن نہیں جب تک اسے اللہ تعالیٰ کے اسماء وصفات کا علم نہ ہو۔اس معرفت کی بدولت وہ بڑی بصیرت کے ساتھ اللہ تعالیٰ کی عبادت کرسکتا ہے۔ارشاد باری تعالیٰ ہے:"اللہ تعالیٰ ہی کے نام سب سے اچھے ہیں۔انھی ناموں سے اسے پکارو اور ایسے لوگوں کو چھوڑ دو جو اس کے ناموں کے بارے میں سیدھے راستے سے ہٹتے ہیں۔جوکچھ وہ کرتے ہیں جلد ہی انھیں اس کا بدلہ مل جائے گا۔"(الاعراف 7/180)اس آیت کریمہ میں اللہ تعالیٰ کے ناموں کےساتھ دعا کرنے کا حکم ہے۔اس دعا سے مراد دعائے مسئلہ اور دعائے عبادت دونوں ہیں۔دعائے مسئلہ کی صورت یہ ہے کہ جب اللہ تعالیٰ کے سامنے اپنی ضروریات وحاجت پیش کریں تو ایسے ناموں کا واسطہ دیں جو ہماری حاجت اور ضرورت کے مناسب ہوں جبکہ دعائے عبادت یہ ہے کہ ہم ان اسماء وصفات کے تقاضوں کو مد نظر رکھتے ہوئے اس ذات کی بندگی بجالاسکیں۔اس آیت میں اللہ تعالیٰ نے ان لوگوں کی مذمت فرمائی ہے جو اس کے ناموں میں کج روی اور بےدینی کا شکار ہیں۔اس کج روی کو الحاد کہا جاتا ہے۔اس کی کچھ قسمیں حسب ذیل ہیں:©۔جو صفات اللہ تعالیٰ کے لیے خاص ہیں انھیں کسی مخلوق میں تسلیم کرنا،جیسے:وہ داتا،روزی رساں،حاجت روا،مشکل کشا اور کارساز ہے۔ان صفات کا حامل کسی مخلوق میں تسلیم کرنا،جیسے:وہ داتا،روزی رساں،حاجت روا،مشکل کشا اور کارساز ہے۔ان صفات کا حامل کسی مخلوق کو قراردینا بدترین قسم کا الحاد ہے۔©۔ان ناموں سے استدلال کرکے باطل چیزوں کے امکان پر بحث کرنا،مثلاً:اللہ تعالیٰ سب کچھ جانتا ہے،لہذا وہ جادو کا علم بھی رکھتا ہے۔وہ ہرچیز قادر ہے ،لہذا وہ جھوٹ بولنے پر بھی قدرت رکھتا ہے۔العیاذباللہ۔©۔ان صفات میں فلسفیانہ موشگافیاں پیداکرنا،جیسے:اللہ تعالیٰ کی صفات حادث ہیں یا قدیم؟کلام کرنا اللہ تعالیٰ کی صفت ہے اور قرآن اللہ تعالیٰ کا کلام ہے،یہ مخلوق ہے یا غیر مخلوق؟©۔اللہ تعالیٰ ہر جگہ موجود ہے اور ہر شخص کی شہ رگ سے بھی قریب ہے تو وہ عرش پر کیسے مستوی ہوسکتا ہے؟©۔اللہ تعالیٰ کی صفات کا سرے سے انکار کردینا جیسا کہ جہم بن صفوان نے تشبیہ کے خود ساختہ مفروضے سے بچنے کے لیے اللہ تعالیٰ کی صفات کا انکار کردیا اور کہا:اللہ تعالیٰ کوئی چیز نہیں ہے۔اس انکار کو تعطیل کہتے ہیں۔اس عقیدے کے حاملین کو مُعَطْلہ اور جَہمیہ کہا جاتا ہے۔©۔اللہ تعالیٰ کی صفات کو مخلوق کی صفات جیسی قراردینا،حالانکہ ارشاد باری تعالیٰ ہے:"کوئی چیز اس کے مشابہ نہیں اور وہی سب کچھ سننے والا،سب کچھ دیکھنے والا ہے۔"(الشوریٰ 11/42)اس عقیدے کا بانی مقاتل بن سلیمان ہے۔اس کے پیروکار مُشتَبہ کہلاتے ہیں،جو اللہ تعالیٰ کی صفات کو مخلوق کی صفات کے مشابہ قراردیتے تھے۔©۔اللہ تعالیٰ کی صفات کو جوں کا توں ماننے کے بجائے ان کے متعلق تاویلات کا سہارالینا،اللہ تعالیٰ کی صفات کے متعلق تاویل کا فتنہ تعطیل سے زیادہ خطرناک ہے کیونکہ اس کے تسلیم کرلینے سے قرآن وحدیث کے ظاہری مفہوم سے انحراف لازم آتا ہے جو بدترین تحریف ہے۔اللہ تعالیٰ کے اسماء وصفات میں الحاد کی ان تمام صورتوں نے سلف صالحین کو حیرت میں مبتلا کردیا،چنانچہ انھوں نے ان ملحدین وبے دین لوگوں کے اقوال کو یہودونصاریٰ اور مشرکین کے اقوال سے بھی زیادہ خطرناک قراردیا ہے،پھر وہ ان مزعومہ عقائد ونظریات کی تردید کے لیے کمر بستہ ہوگئے۔اس تردید کی بنیاد درج ذیل فرمان نبوی ہے:"جس نے ہمارے دین میں کوئی نئی چیز ایجاد کی وہ تردید کے قابل ہے۔"(صحیح البخاری الصلح حدیث 2697)چنانچہ امام بخاری رحمۃ اللہ علیہ نے کتاب الایمان میں مرجیہ،کتاب القدر میں تقدیر کے منکرین قدریہ،کتاب الفتن اور کتاب الاحکام میں خوارج وروافض اور آخر میں جہمیہ ،مشبہ اور تمام اہل تاویل کی تردید کے لیے کتاب التوحید کا عنوان قائم کیا۔کتاب التوحید میں امام بخاری رحمۃ اللہ علیہ کااسلوب یہ ہے کہ پہلے وہ قرآنی آیت کا حوالہ دیتے ہیں،پھر وہ احادیث بیان کرتے ہیں جن میں صفات باری تعالیٰ کاذکر ہے۔انھوں نے یہ اسلوب اس لیے اختیار کیا کہ کچھ لوگ عقائد کے باب میں خبر واحد کو حجت خیال نہیں کرتے۔ان کی تردید مقصود ہے کہ اس قسم کی اخبار آحاد قرآنی آیات کے ذیل میں آتی ہیں،جو شخص عقائد میں ان کی حجت سے انکار کرتا ہے وہ گویا قرآن وسنت دونوں کاانکار کرتا ہے۔امام بخاری رحمۃ اللہ علیہ نے اس عنوان کے تحت چند ایک مسائل ذکر کیے ہیں جن کی تفاصیل حسب ذیل ہیں:1۔پہلے توحید باری تعالیٰ کو ثابت کیا ہے کیونکہ کچھ لوگوں نے اللہ تعالیٰ کی وحدانیت کا انکار کرکے(وحدة الوجود) کا نظریہ پیش کیا اورکہا کہ کائنات کی ہر چیز اللہ تعالیٰ ہے۔یہ نظریہ پیش کرنے والے ابن عربی اور حسین بن منصور حلاج ہیں۔©۔اسمائے حسنیٰ اور صفات علیا کا اثبات وصفات باری تعالیٰ کی چارقسمیں ہیں:©۔صفات ذاتیہ عقلیہ،مثلاً:حیات،علم ،قدرت،ارادہ ،سمع اور بصر وغیرہ©۔صفات فعلیہ عقلیہ ،مثلاً رحمۃ اللہ علیہ :پیدا کرنا،رزق دینا،زندہ کرنا،مارنا،معاف کرنا اور سزا دینا وغیرہ۔©۔صفات ذاتیہ سمعیہ،مثلاً:وجہ،ید،عین،نفس اور شخص وغیرہ۔©۔صفات فعلیہ سمعیہ،مثلاً:اتیان،مجئی اور نزول وغیرہ۔3۔مسئلہ علو اور (اسْتَوَى عَلَى العَرش)4۔روئیت باری تعالیٰ۔5۔مسئلہ تکوین6۔تلاوت اور مَتلُو میں فرق۔7۔خلق افعال العباد۔8۔صفت کلام۔اسے آخر میں بیان کیا ہے۔امام بخاری رحمۃ اللہ علیہ نے اس سلسلے میں 245 مرفوع احادیث پیش کی ہیں جن میں 55 معلق اور 190 موصول ہیں۔ان میں(71) مکرر ہیں جن کی تعداد 234ہے۔باقی صرف 11 احادیث خالص ہیں۔چار(4) احادیث کو امام مسلم رحمۃ اللہ علیہ نے بھی بیان کیا ہے۔باقی 241 احادیث بیان کرنے میں امام بخاری رحمۃ اللہ علیہ منفرد ہیں۔مرفوع احادیث کے علاوہ مختلف صحابہ کرام رضوان اللہ عنھم اجمعین اور تابعین رحمۃ اللہ علیہ سے 36 آثار بھی بیان کیے ہیں،پھر ان احادیث وآثار پر اٹھاون(58) عنوان قائم کیے ہیں جن کی تفصیل آئندہ بیان کی جائےگی۔باذن اللہ تعالیٰ۔اسماء وصفات کے متعلق امام بخاری رحمۃ اللہ علیہ کا موقف یہ ہے کہ کتاب وسنت میں جو اسماء وصفات وارد ہیں ان پر ایمان لانا واجب ہے اور انھیں بلاتکہیف وتمثیل ،اور بلاتعطیل وتحریف،اللہ تعالیٰ کے شایانِ شان مبنی برحقیقت تسلیم کیا جائے۔یہ اقرار وایمان کسی قسم کی بے جاتاویل کے بغیر ہو۔اس انداز اتباع سے آپ نے ہمیں یہ پیغام دیا ہے کہ قرآن وحدیث میں کسی قسم کی غلطی کا امکان نہیں،دونوں وضاحت کے ساتھ حق بیان کرتی ہیں۔اس حق سے وہی دور ہوئے ہیں جنھوں نے اپنے لیے اسلام کا راستہ چھوڑ کر ایک نئی راہ کا انتخاب کیا ہے جو ان کی گمراہی کا باعث ہے،ایک مسلمان کو چاہیے کہ وہ ان دونوں کو مضبوطی سے تھام لےاور اس کے خلاف ہرچیز کوچھوڑ دے۔اللہ تعالیٰ نے ہماری طرف اپنا نمائندہ بھیجا ،جس نے ہر چیز کو کھول کر بیان کردیا،ہم اس کے بعد کسی چیز کے محتاج نہیں ہیں اگر ہم نے اس سے روگردانی کی تو شیاطین ہمیں گہری کھائیوں میں پھینک دیں گے جیسا کہ ارشاد باری تعالیٰ ہے:"جو شخص رحمٰن کے ذکر سے آنکھیں بند کرلیتا ہے ہم اس پر ایک شیطان مسلط کردیتے ہیں جو اس کا ساتھی بن جاتا ہے اور ایسے شیطان انھیں سیدھی راہ سے روک دیتے ہیں جبکہ وہ یہ سمجھ رہے ہوتے ہیں کہ وہ ٹھیک راستے پر جارہے ہیں۔"(الزخرف 43/36)امام بخاری رحمۃ اللہ علیہ نےٹھیک ٹھیک اسلاف کی ترجمانی کی ہے لیکن شارحین نے اس سلسلے میں حق ادا نہیں کیا بلکہ انھوں نےاجماع اُمت کی آڑ میں صفات باری تعالیٰ کا انکارکیا یا انھیں مبنی برحقیقت تسلیم کرنے کے بجائے دوراز کارتاویلات کا سہارا لیا،چنانچہ امام بخاری رحمۃ اللہ علیہ نے ایک عنوان ان الفاظ میں ذکر کیا ہے:)باب قَوْلِ النَّبِيِّ صَلَّى اللَّهُ عَلَيْهِ وَسَلَّمَ لَا شَخْصَ أَغْيَرُ مِنْ اللَّهِ("کوئی شخص اللہ تعالیٰ سے زیادہ غیرت مند نہیں۔"(صحیح البخاری الصلح حدیث 20)اس سے امام بخاری رحمۃ اللہ علیہ نےثابت کیا ہے کہ لفظ"شخص" کا اطلاق ذات باری تعالیٰ پر ہوسکتا ہے،لیکن شارحین کی اکثریت اشعری مکتب فکر سے متعلق ہے،اس لیے ان کی تشریحات ملاحظہ فرمائیں:©۔شارح صحیح بخاری ابن بطال لکھتے ہیں کہ امت کا اس بات پر اجماع ہے یہ لفظ اللہ تعالیٰ کے حق میں نہیں بولا جاسکتا کیونکہ حدیث میں اس کی کوئی صراحت نہیں ہے۔(شرح ا بن بطال 10/442)©۔شارح صحیح بخاری علامہ خطابی رحمۃ اللہ علیہ فرماتے ہیں کہ اللہ تعالیٰ کے لیے لفظ شخص کا اطلاق صحیح نہیں کیونکہ شخص وہ ہے جو مرکب جسم رکھتا ہو۔اس طرح کی صفت اللہ تعالیٰ کی شان کے لائق نہیں۔جن احادیث میں یہ لفظ وارد ہے وہ راویوں کی تصحیف کا نتیجہ ہے۔(اعلام الحدیث 4/2344)©۔حافظ ابن حجر رحمۃ اللہ علیہ چونکہ حافظ الدنیا ہیں،اس لیے کثرت روایات کے پیش نظر اس اطلاق کا انکار تو نہیں کرتے،البتہ انھوں نے اس سلسلے میں دور اذکار کا سہارا لیا ہے۔( فتح الباری 13/491)©۔علامہ عینی نے متقدمین کے اقوال نقل کرنے اور حافظ ابن حجر رحمۃ اللہ علیہ پر اعتراض کرنے کے علاوہ اپنی طرف سے اس صفت کے اثبات یا نفی میں کوئی تبصرہ نہیں کیا۔(عمدۃ القاری 16/612)اللہ تعالیٰ استاذ محترم الشیخ عبداللہ بن محمد الغنیمان رحمۃ اللہ علیہ کو اجر عظیم عطا فرمائے،انھوں نے کتاب التوحید کی شرح کا حق ادا کیا۔ہم آئندہ احادیث کے فوائد اسی شرح سے مرتب کریں گے اور اس کےساتھ ساتھ دیگر شروعات سے بھی استفاذہ کیا جائے گا۔واللہ اعلم۔واضح رہے کہ برصغیر میں تاویل صفات کے جمود کو توڑنے میں استاذ محترم ،شیخ العرب والعجم سید بدیع الدین شاہ راشدی رحمۃ اللہ علیہ نے نمایاں کردار اداکیا۔انھوں نے"توحید خالص" نامی کتاب لکھ کر توحید اسماء وصفات کا حق ادا کیا۔الغرض توحید اسماء وصفات کے متعلق عافیت کا راستہ یہی ہے کہ کتاب وسنت میں اللہ تعالیٰ کے متعلق جوصفات وارد ہیں انھیں بلاتکہیف وتمثیل اس کی شان کے لائق مبنی برحقیقت تسلیم کیا جائے۔انھیں ظاہر معنی پرمحمول کرتے ہوئے ان کے متعلق کسی بھی قسم کی تاویل سے گریز کیا جائے۔اس کے علاوہ الحاد کی جتنی بھی صورتیں ہیں سب کفر وشرک اور گمراہی کی طرف لے جانے والی ہیں،لہذا ایک مسلمان کو کبھی بھی اللہ تعالیٰ کی صفات کو زیر بحث لاکر ان کی تہ تک پہنچنے کی کوشش نہیں کرنی چاہیے کیونکہ یہ انسانی بساط سے باہر ہے۔پھر یہ اعتقادی بیماریاں ایک تو آگے منتقل ہوتی جاتی ہیں ،دوسرے زندگی کا رخ غلط راہوں پرڈال دیتی ہیں۔دعا ہے کہ اللہ تعالیٰ ہمیں اس سلسلے میں صراط مستقیم پر گامزن رکھے۔آمین۔

اس عنوان سے مقصود عرش باری تعالیٰ کا اثبات ہے اور اللہ تعالیٰ کا اس پر مستوی ہونا پھر استواء کے معنی بیان کرنا ہے،نیز اس امر کی طرف اشارہ کرنا ہے کہ عرش بھی اللہ تعالیٰ کی ایک مخلوق ہے۔ امام بخاری رحمۃ اللہ علیہ نے تیسرامسئلہ یعنی استواء اور علوباری تعالیٰ کو بیان کیا ہے۔ اس مسئلے کے لیے یکے بعد دیگر دو عنوان قائم کیے ہیں۔ اس عنوان کے تحت استواء علی العرش اور اس کے بعد ذات باری کی طرف عروج الملائکہ بیان ہو گا اس مقام پر دو آیات کو بطور عنوان منتخب کیا ہے اس انتخاب میں امام بخاری رحمۃ اللہ علیہ نے وقت فہم اور قوت استنباط کو ملحوظ رکھا ہے کیونکہ کچھ لوگوں کا خیال ہے کہ اللہ تعالیٰ کا عرش بھی قدیم اور خالق ہے۔ دوسری آیت کریمہ سے پتا چلتا ہے کہ عرش مربوب یعنی مخلوق ہے۔ اس سے ثابت ہوا کہ عرش خالق نہیں اور نہ قدیم ہی ہے بلکہ عرش اللہ تعالیٰ کا پیدا کیا ہوا ہے استواء کے معنی میں علماء کا اختلاف ہے معتزلہ کہتے ہیں کہ اس کے معنی استیلاءیعنی قہر اور غلبے کے ہیں لیکن یہ قول درست نہیں کیونکہ جب کوئی پہلے غالب نہ ہو پھر اسے غلبہ مل جائے تو اس وقت استیلاء کا لفظ بولا جاتا ہے جبکہ اللہ تعالیٰ کے متعلق یہ معنی درست نہیں کیونکہ وہ تو ازل سے ابد تک غالب ہے۔ اس لفظ کے معنی کے متعلق حافظ ابن قیم رحمۃ اللہ علیہ لکھتے ہیں عربی زبان میں لفظ استواءدو طرح سے مستعمل ہے۔©مطلق©مقید،مطلق یہ ہے کہ اس کا استعمال کسی قسم کے حرف کے ساتھ نہیں ہے مثلاً:ارشاد باری تعالیٰ ہے:(وَلَمَّا بَلَغَ أَشُدَّهُ وَاسْتَوَىٰ) (القصص 28۔14)"اور جب موسیٰ اپنی جوانی کو پہنچے اور پورے توانا ہو گئے۔" اس کے معنی پورا مکمل ہونا ہیں۔ مقید یہ ہےکہ اس کے ساتھ کسی دوسرے حرف کو استعمال کیا گیا ہو اس کی دو قسمیں ہیں۔©حرف (إِلَى)کے ساتھ یہ لفظ استعمال ہوتا ہے مثلاً: (ثُمَّ اسْتَوَى إِلَى السَّمَاء ( (البقرہ ۔2/29) اس کے معنی بلند ہونا ہیں۔ اس معنی پر سلف کا اجماع ہے۔©(عَلَى)کے ساتھ اسے استعمال کیا جاتا ہے مثلاً: (الرَّحْمَنُ عَلَى العَرْشِ اسْتَوَى) (طٰہ20۔25)"رحمن نے عرش پر قرار پکڑا "اس کے معنی بلند ہونا قرار پکڑنا ہیں استوالی یعنی قہراورغلبے کے معنی میں یہ لفظ مستعمل نہیں ہے چنانچہ ابن الاعرابی سے سوال ہوا کہ استوی کے معنی استولی، یعنی غلبہ آتے ہیں؟ تو انھوں نے جواب دیا عرب اس معنی کو نہیں جانتے۔(مختصر الصواعق ص:320)ابن الاعرابی کہتے ہیں کہ مجھ سے احمد بن ابو داود نے مطالبہ کیا کہ لغت عرب میں استوی یعنی استولی تلاش کروں میں نے انھیں جواب دیا: اللہ تعالیٰ کی قسم! مجھے یہ لفظ اس معنی میں نہیں ملا۔(فتح الباری:13/500)حافظ ابن قیم رحمۃ اللہ علیہ نے اپنی کتاب "الصواعق المرسلہ"میں ثابت کیا ہے کہ استوی کے معنی استولی نہیں ہیں۔ اس کے بطلان پر انھوں نے بیالیس وجوہات ذکر کی ہیں۔ انھوں نے علامہ خطابی کے حوالے سے لکھا ہے بعض لوگوں کا خیال ہے کہ اس جگہ استواء کے معنی استیلاء یعنی غلبہ ہیں اس معنی کے لیے ایک غیر معروف شاعر کا شعرپیش کیا جاتا ہےاگر اس مقام پر استوی کے معنی غلبہ ہوں تو کلام بالکل بے فائدہ بن جاتا ہے کیونکہ اللہ تعالیٰ کا علم اور اس کی قدرت ہر چیز کو محیط ہے۔ کائنات کا ذرہ ذرہ اس کی تعریف میں ہے تو صرف عرش پر اس کے استیلاء اور غلبے کے کیا معنی ؟ استیلاء کے معنی تو یہ ہیں کہ کسی کو ایک چیز سے روکا جا رہا ہے اور وہ اس پر بزور غالب آ جائے اور قبضہ کر لے۔ اس مقام پر اللہ تعالیٰ کے لیے کون سا امر مانع ہے کہ اسے استیلاء سے موصوف کیا جائے؟(الصواعق:المرسلۃ)بہر حال استوی علی العرش کے معنی ہیں کہ اس نے عرش پر قرار پکڑا جبکہ بعض عقل پرست اس کے معنی"عرش پر متمکن ہو گیا یا کائنات کے نظام پر غالب آگیا یا اس نے زمام اقتدار سنبھال لی وغیرہ کرتے ہیں یعنی ان کے نزدیک استوی کے معنی استولی ہیں اس کے متعلق امام ابن قیم رحمۃ اللہ علیہ نے اپنے قصیدہ نونیہ میں لکھا ہے۔( نونُ اليهودِ ولامُ جهميٍّ هما في وحيِ ربِّ العرشِ زائدتانِ)"یہودیوں کا نون یعنی (حِطَّةٌ)کے بجائے (حنطة) کہنا اور فرقہ جہمیہ کا لام یعنی استوی کے بجائے استولی خیال کرنا دونوں باتیں وحی سے زائد ہیں۔"امام بخاری رحمۃ اللہ علیہ نے آخر میں عرش باری تعالیٰ کی عظمت و رفعت بیان کرنے کے لیے حضرت ابن عباس رضی اللہ تعالیٰ عنہ کا ایک اثر پیش کیا ہے جسے ابن ابی حاتم نے متصل سند سے بیان کیا ہےاس میں عرش مقدس کی نسبت اللہ تعالیٰ کی طرف ہے یعنی عرش کی عظمت اس بنا پر ہےکہ خصوصیت کے ساتھ اس کا تعلق اللہ تعالیٰ سے ہے۔ حضرت ابن عباس رضی اللہ تعالیٰ عنہ نے مجید کے معنی کریم کیے ہیں عرش باری تعالیٰ کا یہ وصف ایک دوسرے مقام پر بیان کیا گیا ہےفرمایا:"اللہ تعالیٰ بہت بلند شان والا ہے۔ وہی حقیقی بادشاہ ہے اس کے سوا کوئی معبود بر حق نہیں وہی عرش کریم کا مالک ہے۔"(المومنون23۔116)عرش کے کریم ہونے کے معنی یہ ہیں۔کہ وہ بلند یا یہ تمام کائنات سے وسیع تر ہے۔(شرح کتاب التوحید للغنیمان1/371)

ترجمۃ الباب:

حدیث ترجمہ:

سیدنا ابو ہریرہ ؓ سے روایت ہے وہ نبی ﷺ سے بیان کرتے ہیں کہ آپ نے فرمایا: ”قیامت کے دن میں سب سے پہلے والا ہون گا تو دیکھوں گا کہ موسٰی ؑ عرش کا پایہ تھامے ہوئے ہیں۔“

حدیث حاشیہ:

ترجمۃ الباب:

ابو عالیہ نے کہا:( استوی إلی السماء)کا مفہوم یہ ہےکہ وہ آسمان کی طرف بلند ہوا اور (فسوّٰی) کے معنیٰ ہیں: اس نے پیدا کیا ¤مجاہد نے کہا: (استوی علی العرش) کے معنیٰ ہیں: وہ عرش پر بلند ہوا¤سیدنا ابن عباس ؓ نے فرمایا: (ذو العرش المجید) میں مجید کے معنی ہیں: کریم۔اور الودود کے معنی ہیں: حبیب جیسے حمید مجید کہا جاتا ہے گویا مجید ماجد سے ہے اور حمید محمود ،حمد سے ہے

حدیث ترجمہ:

اور ماجشون نے عبداللہ بن فضل سے روایت کی، ان سے ابوسلمہ نے اور ان سے ابوہریرہ ؓ نے کہ نبی کریم ﷺ نے فرمایا پھر میں سب سے پہلے اٹھنے والا ہوں گا اور دیکھوں گا کہ موسیٰ ؑ عرش کا پایہ تھامے ہوئے ہیں۔

حدیث حاشیہ:

باب سے یہ مناسبت ہے کہ اس میں عرش کا ذکر ہے۔ عرش کی تاویل کرنے والے طریقہ سلف کےخلاف بولتے ہیں۔ غفراللہ لھم (آمین)

حدیث ترجمہ:

Abu Hurairah (RA) said: The Prophet (ﷺ) said, "I will be the first person to be resurrected and will see Moses (ؑ) holding the Throne."

اسم العالم	الحكم
إجماع علماء المسلمين

موضوعات

المواضيع

Topics

المواضيع

موضوعات

Topics

رابطہ کریں

ہمارے دیگر پراجیکٹ

موضوعات

المواضيع

Topics

المواضيع

موضوعات

Topics

تمہید کتاب

تمہید باب

الحكم على الحديث