لغوی تشریح:

 (طُھُور) پر پیش ہو تو یہ مصدر ہو گا اور معنی ہوں گے: طہارت (پاکیزگی)۔ اور طا پر زبر ہو تو  ہوں گے: وہ چیز جس سے طہارت حاصل کی جاتی ہے، مثلاً: پانی یا مٹی۔ یہاں مصدری معنی مراد ہیں-

(غُلُول) مال عنیمت میں خیانت کرنا، اور پھر یہ لفظ کسی قید کے بغیر مطلقہ خیانت کے معنی میں استعمال ہونے لگا۔ اس سے ہر وہ کمائی یا آمدنی مراد ہے جو ناجائز طریقے سے حاصل کی جائے۔ اس سے صدقہ قبول نہیں ہوتا۔

فوائدو مسائل:

1. طہارت نماز کے لیے فرض ہے کیونکہ اس کے بغیر نماز ہوتی ہی نہیں۔ طہارت سے مراد ہے: پاکیزگی حاصل کرنا، یعنی ہر چھوٹی بڑی نیر ظاہری اور حکمی نجاست دور کرنا، چونکہ پاکیزگی اور طہارت نماز کے لیے شرط ہے، اس لئے نمازی کے لیے ضروری ہے کہ وہ ہر قسم کی نجاست اور چھوٹے بڑے حدث سے پاک ہو۔ ظاہری نجاست تو صرف جسم یا کپڑے وغیرہ کے اس حصے کو دھونے سے ختم ہو جاتی ہے جہاں گندگی موجود ہو۔ جب کہ حکمی نجاست، یعنی حدثِ اصغر وضو سے اور حدث اکبر غسل کرنے سے دور ہوتے ہیں۔ انسان کا ایسی حالت میں ہونا کہ جس سے نکلنے کے لئے وضو یا غسل کرنا ضروری ہو، حکمی نجاست یا حدث کہلاتا ہے۔
2. (أَصَحُّ شَىْءٍ فِى هَذَا الْبَابِ) ’’یہ حدیث اس مسئلے میں سب سے زیادہ صحیح ہے۔‘‘ یہ امام صاحب نے مختلف احادیث کے بارے میں یہ الفاظ استعمال کیے ہیں ان کا مقصد یہ ہوتا ہے ان کے نزدیک اس مسئلے میں سب سے بہتر اور عمدہ سند کے ساتھ یہ روایت منقول ہے، لیکن ضروری نہیں کہ وہ حدیث فی نفسہ صحیح ہو۔ وہ صحیح بھی ہوسکتی ہے جس طرح کے مذکورہ بالا حدیثہے نے حسن بھی ہو سکتی ہیں بلکہ بعض دفعہ ضعیف بھی ہوتی ہے۔
3. (فِى هَذَا الْبَابِ) امام ترمذی رحمہ اللہ اس عنوان کے تحت جن صحابہ کرام رضوان اللہ علیہم کا نام درج کرتے ہیں ان سے ایسی احادیث منقول ہیں جو باب میں مذکور مسئلے پر صراحتاً یا کنایتاً روشنی ڈالی ہیں بلکہ بعض مواقع پر ان کا مضمون حدیث کے متضاد بھی ہوتا ہے۔ مزید برآں اس سے امام صاحب کا یہ مطلب بھی نہیں ہوتا کہ ان سے یہی حدیث انھی الفاظ میں مروی ہے بلکہ اس مسئلے اور موضوع کا کسی نہ کسی طرح نفی یا اثبات میں یا قیداً یا شرطاً تعلق ہے۔

4. یہ حدیث اس بات کی صریح دلیل ہے کہ ناجائز ذرائع سے حاصل شدہ اورحرام مال سے کیا ہوا صدقہ بارگاہِ الہی میں قطعاً قبول نہیں ہوتا یعنی جو مال بذریعہ چوری، ڈاکہ زنی، رشوت ستانی، خیانت غصب، بھتا، سود اور دوسرے کسی بھی ناجائز طریقے سے حاصل کیا گیا ہو اس مال سے کیا ہوا صدقہ وخیرات یا کوئی بھی نیکی کا کام اللہ تعالی کے ہاں شرفِ قبولیت حاصل نہیں کرسکتا۔ مزید برآں قبولیتِ صدقہ و خیرات کے لئے یہ بھی ضروری ہے کہ صدقہ کرنے والے کا تعلق متقین کے گروہ سے ہو کیونکہ قرآن پاک میں ہے: ﴿ إِنَّمَا يَتَقَبَّلُ اللَّهُ مِنَ الْمُتَّقِينَ﴾ (المائدة، 5 :25) یعنی ’’اللہ تعالی صرف متقین کا صدقہ قبول فرماتا ہے۔‘‘

فوائد الحدیث: (1) طہارت کا لفظ عام ہے جس میں ظاہری و باطنی ہر قسم کی طہارت شامل ہے۔

’’عقائد کی طہارت و پاکیزگی‘‘۔ جو شرک، کفر اور نفاق کی غلاظت سے پاک ہو۔ ’’اعمال کی پاکیزگی‘‘۔ جو بدعات کی آمیزش سے محفوظ ہو۔ لباس، جگہ اور خیالات کی پاکیزگی بھی اس میں شامل ہے۔ (2) البتہ اس حدیث میں لفظ ’’طہور‘‘ سے مراد ’’وضو‘‘ ہے۔ (3) ’’غلول‘‘ سے مراد وہ مال ہے جو حرام اور ناجائز طریقے سے حاصل کیا گیا ہو۔ مثلًا کسی کا حق غَصب کر کے، رشوت، جھوٹ، فراڈ، چوری اور ڈاکے وغیرہ کے ذریعے۔ (4) وضو ہر قسم کی نماز کے لیے شرط ہے خواہ وہ فرض ہو یا نفل، جنازہ، عیدین، کسوف اور خسوف وغیرہ۔