جامع ترمذی: كتاب: جہاد کےفضائل کےبیان میں (باب: اللہ تعالیٰ کے نزدیک شہیدوں کی فضیلت کا بیان​)

ترجمۃ الباب:

1644.

عمربن خطاب ؓ کہتے ہیں کہ میں نے رسول اللہ ﷺکو فرماتے ہوئے سنا: ’’شہید چارطرح کے ہیں: پہلا وہ اچھے ایمان والامومن جو دشمن سے مقابلہ اوراللہ سے کئے گئے وعدہ کوسچ کردکھائے یہاں تک کہ شہید ہوجائے، یہی وہ شخص ہے جس کی طرف قیامت کے دن لوگ اس طرح آنکھیں اٹھا کر دیکھیں گے اور (راوی فضالہ بن عبید نے اس کی کیفیت کو بیان کر نے کے لئے کہا) اپنا سراٹھایا یہاں تک کہ ٹوپی (سرسے) گرگئی‘‘، راوی ابویزیدخولانی کہتے ہیں: مجھے نہیں معلوم فضالہ نے عمر ؓ کی ٹوپی مراد لی یا نبی اکرمﷺ کی، آپﷺ نے فرمایا: ’’دوسرا وہ اچھے ایمان والامومن جو دشمن کا مقابلہ اس طرح کرے گویا کہ بزدلی کی وجہ سے اس کی جلد (کھال) طلح (ایک بڑاخارداردرخت) کے کاٹے سے زخمی ہوگئی ہو، پیچھے سے (ایک انجان) تیر آ کراسے لگے اورمارڈالے، یہ دوسرے درجہ میں ہے، تیسرا وہ مومن جو نیک عمل کے ساتھ براعمل بھی کرے ، جب دشمن سے مقابلہ کرے تو اللہ سے کئے گئے وعدہ کو سچ کردکھائے (یعنی بہادری سے لڑتارہے) یہاں تک کہ شہید ہوجائے ، یہ تیسرے درجہ میں ہے، چوتھا وہ مومن شخص جو اپنے نفس پرظلم کرے (یعنی کثرت گناہ کی وجہ سے، اور بہادری سے لڑتارہے) یہاں تک کہ شہید ہوجائے، یہ چوتھے درجہ میں ہے‘‘۔
امام ترمذی کہتے ہیں: یہ حدیث غریب ہے، ہم اسے صرف عطاء بن دینار ہی کی روایت سے جانتے ہیں، میں نے محمد بن اسماعیل بخاری کو کہتے سنا: یہ حدیث سعید بن ابی ایوب نے عطاء بن دینارسے روایت کی ہے اورانہوں نے خولان کے مشائخ سے روایت کی ہے اس میں انہوں نے ابویزید کا ذکرنہیں کیا، اور عطاء بن دینار نے کہا: (کہ اس حدیث میں) کچھ حرج نہیں ہے ۔