جامع ترمذی: كتاب: نماز کے احکام ومسائل (باب: آدمی صلاۃ بھول جائے تو کیا کرے؟​)

ترجمۃ الباب:

178.

انس بن مالک ؓ کہتے ہیں کہ رسول اللہ ﷺ نے فرمایا : ’’جو شخص نماز بھول جائے تو چاہئے کہ جب یاد آئے پڑھ لے‘‘۔
امام ترمذی کہتے ہیں:
۱- انس ؓ کی حدیث حسن صحیح ہے۔
۲- اس باب میں سمرہ اور ابو قتادہ ؓ سے بھی احادیث آئی ہیں۔
۳- علی بن ابی طالب ؓ سے روایت کی جاتی ہے کہ انہوں نے اس شخص کے بارے میں جو نماز بھول جائے کہا کہ وہ پڑھ لے جب بھی اسے یاد آئے خواہ وقت ہو یا نہ ہو۔ یہی شافعی، احمد اور اسحاق بن راہویہ کا بھی قول ہے، اور ابو بکرہ ؓ سے مروی ہے کہ وہ عصر میں سو گئے اور سورج ڈوبنے کے وقت اٹھے، تو انہوں نے نماز نہیں پڑھی جب تک کہ سورج ڈوب نہیں گیا۔ اہل کوفہ کے کچھ لوگ اسی طرف گئے ہیں۔ رہے ہمارے اصحاب یعنی محدثین تو وہ علی بن ابی طالب ؓ ہی کے قول کی طرف گئے ہیں۔