جامع ترمذی: كتاب: قرآن کریم کے فضائل ومناقب کے بیان میں (باب: سورہ بقرہ اور آیت الکرسی کی فضیلت کابیان​)

ترجمۃ الباب:

2876.

ابوہریرہ ؓ کہتے ہیں: رسول اللہ ﷺ نے گنتی کے کچھ لشکری بھیجے (بھیجتے وقت) ان سے (قرآن) پڑھوایا، تو ان میں سے ہر ایک نے جسے جتنا قرآن یاد تھا پڑھ کرسنایا۔ جب ایک نوعمر نوجوان کا نمبر آیا توآپﷺ نے اس سے کہا: اے فلاں! تمہارے ساتھ کیا ہے یعنی تمہیں کون کون سی سورتیں یاد ہیں؟ اس نے کہا: مجھے فلاں فلاں اور سورہ بقرہ یاد ہے۔ آپﷺ نے کہا: ’’کیا تمہیں سورہ بقرہ یاد ہے؟‘‘ اس نے کہا: ہاں، آپﷺ نے فرمایا: ’’جاؤ تم ان سب کے امیر ہو‘‘۔ ان کے شرفاء میں سے ایک نے کہا: اللہ کے رسولﷺ! قسم اللہ کی! میں نے سورہ بقرہ صرف اسی ڈر سے یاد نہ کی کہ میں اسے (نماز تہجد میں) برابر پڑھ نہ سکوں گا۔ آپﷺ نے فرمایا: ’’قرآن سیکھو، اسے پڑھو اور پڑھاؤ۔ کیوں کہ قرآن کی مثال اس شخص کے لیے جس نے اسے سیکھا اور پڑھا، اور اس پرعمل کیا اس تھیلی کی ہے جس میں مشک بھری ہوئی ہو اور چاروں طرف اس کی خوشبو پھیل رہی ہو، اور اس شخص کی مثال جس نے اسے سیکھا اور سو گیا اس کا علم اس کے سینے میں بند رہا۔ اس تھیلی کی سی ہے جو مشک بھر کر سیل بند کردی گئی ہو‘‘۔
امام ترمذی کہتے ہیں:
۱۔ یہ حدیث حسن ہے۔