جامع ترمذی: كتاب: قرآن کریم کی قرأت وتلاوت کے بیان میں (باب: کتنے دنوں میں قرآن مکمل کیا جائے؟)

ترجمۃ الباب:

2946.

عبداللہ بن عمرو ؓ کہتے ہیں کہ میں نے کہا: اللہ کے رسولﷺ! میں کتنے دنوں میں قرآن پڑھ ڈالوں؟ آپﷺ نے فرمایا: ’’مہینے میں ایک بار ختم کرو‘‘، میں نے کہا میں اس سے بڑھ کر (یعنی کم مدت میں) ختم کرنے کی طاقت رکھتا ہوں۔ آپﷺ نے فرمایا: ’’تو بیس دن میں ختم کرو‘‘۔ میں نے کہا: میں اس سے زیادہ کی یعنی اور بھی کم مدت میں ختم کرنے کی طاقت رکھتا ہوں۔ آپﷺ نے فرمایا: ’’پندرہ دن میں ختم کر لیا کرو‘‘۔ میں نے کہا: میں اس سے بھی زیادہ کی طاقت رکھتا ہوں۔ آپﷺ نے کہا: ’’دس دن میں ختم کر لیا کرو‘‘۔ میں نے کہا: میں اس سے بھی زیادہ کی طاقت رکھتا ہوں، آپﷺ نے فرمایا: ’’پانچ دن میں ختم کر لیا کرو‘‘۔ میں نے کہا: میں اس سے بھی زیادہ کی طاقت رکھتا ہوں۔ تو آپﷺ نے مجھے پانچ دن سے کم مدت میں قرآن ختم کرنے کی اجازت نہیں دی۔
امام ترمذی کہتے ہیں:
۱۔ یہ حدیث اس سند سے حسن صحیح غریب ہے۔
۲۔ یہ حدیث بطریق: (أبی بردۃ، عن عبداللہ بن عمرو) غریب سمجھی گئی ہے۔
۳۔ یہ حدیث کئی سندوں سے عبداللہ بن عمرو سے مروی ہے۔ عبداللہ بن عمرو سے مروی ہے کہ نبی اکرمﷺ نے فرمایا: ’’جس نے قرآن تین دن سے کم مدت میں پڑھا، اس نے قرآن کو نہیں سمجھا‘‘۔
۴۔ عبداللہ بن عمرو سے (یہ بھی) مروی ہے کہ نبی اکرم ﷺ نے ان سے فرمایا: ’’قرآن چالیس دن میں پڑھ ڈالا کرو‘‘۔
۵۔ اسحاق بن ابراہیم بن راہویہ کہتے ہیں: ہم اس حدیث کی بنا پر کسی آدمی کے لیے یہ پسند نہیں کرتے کہ اس پر چالیس دن سے زیادہ گزر جائیں اور وہ قرآن پاک ختم نہ کر چکا ہو۔
۶۔ اس حدیث کی بنا پر جو نبی اکرمﷺ سے مروی ہے بعض اہل علم کہتے ہیں کہ تین دن سے کم مدت میں قرآن پڑھ کر نہ ختم کیا جائے۔

۷۔ اور بعض اہل علم نے اس کی رخصت دی ہے۔

۸۔ اور عثمان بن عفان سے متعلق ہے مروی ہے کہ وہ وتر کی ایک رکعت میں پورا قرآن پڑھ ڈالتے تھے۔

۹۔ سعید بن جبیر سے مروی ہے کہ انہوں نے کعبہ کے اندر ایک رکعت میں پورا قرآن پڑھا۔

۱۰۔ قرأت میں ترتیل (ٹھہرٹھہرکر پڑھنا) اہل علم کے نزدیک پسندیدہ ہے۔