جامع ترمذی: كتاب: قرآن کریم کی تفسیر کے بیان میں (باب: سورہ مائدہ کی تفسیر)

ترجمۃ الباب:

3047.

عبداللہ بن مسعود رضی الله عنہ سے روایت ہے کہ رسول اللہ صلی الله علیہ وسلم نے فرمایا: ’’جب بنی اسرائیل گناہوں میں مبتلا ہو گئے تو انہیں ان کے علماء نے روکا مگر وہ لوگ باز نہ آئے، اس کے باوجود وہ (علماء) ان کی مجلسوں میں ان کے ساتھ بیٹھتے، ان کے ساتھ مل کر کھاتے پیتے تو اللہ نے بعض کے دل بعض سے ملا دیئے۱؎  اور ان پر داؤد اور عیسیٰ بن مریم ؑ کی زبان سے لعنت بھیجی، اور ایسا اس وجہ سے ہوا کہ وہ نافرمانی کرتے تھے اور مقررہ حدود سے آگے بڑھ جاتے تھے، پھر رسول اللہ صلی الله علیہ وسلم سنبھل کر بیٹھ گئے۔ حالانکہ آپﷺ ٹیک لگا کر بیٹھے ہوئے تھے، آپﷺ نے فرمایا: ’’نہیں، قسم اس ذات کی جس کے قبضے میں میری جان ہے! تم اس وقت تک نجات نہ پاؤ گے جب تک کہ (تم ان بدکاروں کو برائی سے روک نہ دو)۔ ان کو بھلائی کی طرف موڑ نہ دو‘‘۔
امام ترمذی کہتے ہیں:
۱۔ یہ حدیث حسن غریب ہے۔
۲۔ عبداللہ بن عبدالرحمن دارمی کہتے ہیں: یزید نے کہا کہ سفیان ثوری اس روایت میں عبداللہ بن مسعود کا نام نہیں لیتے ہیں۔
۳۔ یہ حدیث محمد بن مسلم بن ابی الوضاح سے بھی روایت کی گئی ہے، وہ علی بن بذیمہ سے، علی بن بذیمہ ابو عبیدہ سے اور ابو عبیدہ عبداللہ بن مسعود رضی الله عنہ کے واسطہ سے نبی اکرم صلی الله علیہ وسلم سے اسی طرح روایت کرتے ہیں۔
۴۔ بعض راوی اسے ابو عبیدہ کے واسطہ سے نبی اکرم صلی الله علیہ وسلم سے مرسل روایت کرتے ہیں۔