جامع ترمذی: كتاب: قرآن کریم کی تفسیر کے بیان میں (باب: سورہ توبہ سے بعض آیات کی تفسیر​)

ترجمۃ الباب:

3086.

عبداللہ بن عباس رضی الله عنہ کہتے ہیں: میں نے عثمان بن عفان رضی الله عنہ سے کہا کہ کس چیز نے آپ کو آمادہ کیا کہ سورہ انفال کو جو مثانی میں سے ہے اور سورہ برأۃ کو جو مئین میں سے ہے دونوں کو ایک ساتھ ملا دیا، اور ان دونوں سورتوں کے بیچ میں(بِسْمِ اللَّهِ الرَّحْمَنِ الرَّحِيمِ) کی سطر بھی نہ لکھی۔ اور ان دونوں کو سبع طوال (سات لمبی سورتوں) میں شامل کر دیا۔ کس سبب سے آپ نے ایسا کیا؟ عثمان رضی الله عنہ نے کہا: رسول اللہ صلی الله علیہ وسلم پر زمانہ آتا جا رہا تھا اور آپﷺ پر متعدد سورتیں نازل ہو رہی تھیں، تو جب آپﷺ پر کوئی آیت نازل ہوتی تو وحی لکھنے والوں میں سے آپﷺ کسی کو بلاتے اور کہتے کہ ان آیات کو اس سورہ میں شامل کر دو جس میں ایسا ایسا مذکور ہے۔ اور پھر جب آپﷺ پر کوئی آیت اترتی تو آپﷺ فرماتے اس آیت کو اس سورہ میں رکھ دو جس میں اس اس طرح کا ذکر ہے۔ سورہ انفال ان سورتوں میں سے ہے جو مدینہ میں آنے کے بعد شروع شروع میں نازل ہوئی ہیں۔ اور سورہ برأت قرآن کے آخر میں نازل ہوئی ہے۔ اور دونوں کے قصوں میں ایک دوسرے سے مشابہت تھی تو ہمیں خیال ہوا کہ یہ اس کا ایک حصہ (وتکملہ) ہے۔ پھر رسول اللہ صلی الله علیہ وسلم نے ہمیں یہ بتائے بغیر کہ یہ سورہ اسی سورہ کا جزو حصہ ہے اس دنیا سے رحلت فرما گئے۔ اس سبب سے ہم نے ان دونوں سورتوں کو ایک ساتھ  ملا دیا اور ان دونوں سورتوں کے درمیان ہم نے (بِسْمِ اللَّهِ الرَّحْمَنِ الرَّحِيمِ) نہیں لکھا اور ہم نے اسے سبع طوال میں رکھ دیا (شامل کر دیا)۔
امام ترمذی کہتے ہیں:
۱۔ یہ حدیث حسن صحیح ہے۔
۲۔ اسے ہم صرف عوف کی روایت سے جانتے ہیں، جسے وہ یزید فارسی کے واسطہ سے ابن عباس سے روایت کرتے ہیں، اور یزید فارسی تابعین میں سے ہیں، انہوں نے ابن عباس سے کئی حدیثیں روایت کی ہیں۔ اور کہا جاتا ہے کہ وہ یزید بن ہرمز ہیں۔ اور یزید رقاشی یہ یزید بن اُبان رقاشی ہیں، یہ تابعین میں سے ہیں اور ان کی ملاقات ابن عباس سے نہیں ہے۔ انہوں نے صرف انس بن مالک سے روایت کی ہے، اور یہ دونوں ہی بصرہ والوں میں سے ہیں۔ اور یزید فارسی، یزید رقاشی سے متقدم ہیں۔