جامع ترمذی: كتاب: قرآن کریم کی تفسیر کے بیان میں (باب: سورہ احزاب سے بعض آیات کی تفسیر​)

ترجمۃ الباب:

3205.

نبی اکرمﷺکے پرودہ عمربن ابی سلمہ ؓ کہتے ہیں: جب آیت ﴿إِنَّمَا يُرِيدُ اللَّهُ لِيُذْهِبَ عَنْكُمْ الرِّجْسَ أَهْلَ الْبَيْتِ وَيُطَهِّرَكُمْ تَطْهِيرًا﴾۱؎ ام سلمہ ؓ کے گھر میں رسول اللہ ﷺ پر نازل ہوئی تو آپﷺ نے فاطمہ وحسن حسین  ؓ کو بلایا اور انہیں ایک چادر کے نیچے ڈھانپ دیا، علی ؓ آپﷺ کی پیٹھ کے پیچھے تھے آپﷺ نے انہیں بھی چادر کے نیچے کر لیا، پھر فرمایا: ’’اے اللہ یہ ہیں میرے اہل بیت، میرے گھر والے، ان سے ناپاکی دورکر دے اور انہیں ہر طرح کی آلائشوں سے پوری طرح پاک وصاف کر دے‘‘،
ام سلمہ کہتی ہیں: اور میں بھی انہیں کے ساتھ ہوں اے اللہ کے رسولﷺ؟ آپﷺ نے فرمایا: ’’تم اپنی جگہ ہی ٹھیک ہو، تمہیں خیر ہی کا مقام ودرجہ حاصل ہے‘‘۲؎۔
امام ترمذی کہتے ہیں: یہ حدیث اس سند سے جسے عطاء عمر بن ابی سلمہ سے روایت کرتے ہیں غریب ہے۔