جامع ترمذی: كتاب: روزے کے احکام ومسائل (باب: نفلی روزہ توڑنے پر اس کی قضا لازم ہے​)

ترجمۃ الباب:

735.

ام المومنین عائشہ‬ ؓ ک‬ہتی ہیں کہ میں اور حفصہ دونوں روزے سے تھیں، ہمارے پاس کھانے کی ایک چیز آئی جس کی ہمیں رغبت ہوئی، تو ہم نے اس میں سے کھا لیا۔ اتنے میں رسول اللہ ﷺ آ گئے، تو حفصہ مجھ سے سبقت کر گئیں۔ وہ اپنے باپ ہی کی بیٹی تو تھیں۔ انہوں نے پوچھا: اللہ کے رسول! ہم لوگ روزے سے تھے۔ ہمارے سامنے کھانا آ گیا، تو ہمیں اس کی خواہش ہوئی تو ہم نے اُسے کھا لیا، آپ نے فرمایا: ’’تم دونوں کسی اور دن اس کی قضا کر لینا‘‘۔
امام ترمذی کہتے ہیں:
۱- صالح بن ابی اخضر اور محمد بن ابی حفصہ نے یہ حدیث بسند ’’زہری عن عروہ عن عائشہ‘‘ اسی کے مثل روایت کی ہے۔ اور اسے مالک بن انس، معمر، عبیدا للہ بن عمر، زیاد بن سعد اور دوسرے کئی حفاظ نے بسند ’’الزہری عن عائشہ مرسلاً‘‘ روایت کی ہے اور ان لوگوں نے اس میں عروہ کے واسطے کا ذکر نہیں کیا ہے، اور یہی زیادہ صحیح ہے۔ اس لیے کہ ابن جریج سے مروی ہے کہ میں نے زہری سے پوچھا: کیا آپ سے اسے عروہ نے بیان کیا اور عروہ سے عائشہ نے روایت کی ہے؟ تو انہوں نے کہا: میں نے اس سلسلے میں عروہ سے کوئی چیز نہیں سنی ہے۔ میں نے سلیمان بن عبدالملک کے عہد خلافت میں بعض ایسے لوگوں سے سنا ہے جنہوں نے ایسے شخص سے روایت کی ہے جس نے اس حدیث کے بارے میں عائشہ سے پوچھا۔