سنن ابو داؤد: کتاب: وتر کے فروعی احکام و مسائل (باب: قرآن مجید سات حروف پر اتارا گیا ہے)

ترجمۃ الباب:

1475.

عبدالرحمٰن بن عبدالقاری کہتے ہیں کہ میں نے سیدنا عمر بن خطاب ؓ کو سنا، وہ بیان کرتے تھے کہ میں نے ہشام بن حکیم بن حزام کو سورۃ الفرقان پڑھتے سنا، مگر اس کی قراءت اس کے خلاف تھی جو میں پڑھتا تھا اور رسول اللہ ﷺ ہی نے مجھے یہ سورت پڑھائی تھی۔ قریب تھا کہ میں اس پر جلدی کرتا (اور جھپٹ پڑتا) مگر میں نے اس کو مہلت دی حتیٰ کہ وہ فارغ ہوا، پھر میں نے اس کی گردن اپنی چادر سے پکڑ لی اور رسول اللہ ﷺ کی خدمت میں لے آیا۔ میں نے کہا: اے اللہ کے رسول! میں نے اس کو سورۃ الفرقان پڑھتے سنا ہے اور یہ اس کے خلاف پڑھتا ہے جو آپ نے مجھے پڑھائی ہے، تو رسول اللہ ﷺ نے اس سے فرمایا: ”پڑھو“ چنانچہ اس نے اسی قراءت میں پڑھی جو میں نے اس سے سنی تھی۔ رسول اللہ ﷺ نے فرمایا: ”اسی طرح اتاری گئی ہے۔“ پھر مجھے فرمایا: ”پڑھو۔“ چنانچہ میں نے بھی پڑھی، تو آپ ﷺ نے فرمایا: ”ایسے ہی اتاری گئی ہے۔“ پھر فرمایا: ”بلاشبہ یہ قرآن سات حروف پر نازل کیا گیا ہے، تو اس سے جو آسان لگے پڑھو۔“