اردو حاشیہ:
میت کو غسل دیتے وقت جب میت پر آخری مرتبہ پانی بہانا ہو تو اس میں کچھ کافور ملا لیا جائے تاکہ اس کے بدن کو ٹھنڈک پہنچے اور وہ خوشبودار ہو جائے۔ اس کا یہ بھی فائدہ ہے کہ کافور استعمال کرنے سے جسم خراب نہیں ہوتا اور اسے حشرات الارض نقصان نہیں پہنچا سکتے، یعنی وہ موذی چیزوں سے بھی محفوظ ہو جاتا ہے۔ واضح رہے کہ کافور کے علاوہ کوئی بھی خوشبودار کیمیکل استعمال کیا جا سکتا ہے، عطر وغیرہ بھی اس پر چھڑکا جا سکتا ہے۔