التخريج

قسم الحديث (القائل): مرفوع ، اتصال السند: متصل ، قسم الحديث: تقریری

‌صحيح البخاري: كِتَابُ الجِهَادِ وَالسِّيَرِ (بَابُ الكَافِرِ يَقْتُلُ المُسْلِمَ، ثُمَّ يُسْلِمُ، فَيُسَدِّدُ بَعْدُ وَيُقْتَلُ)

حکم : أحاديث صحيح البخاريّ كلّها صحيحة 

2827. حَدَّثَنَا الحُمَيْدِيُّ، حَدَّثَنَا سُفْيَانُ، حَدَّثَنَا الزُّهْرِيُّ، قَالَ: أَخْبَرَنِي عَنْبَسَةُ بْنُ سَعِيدٍ، عَنْ أَبِي هُرَيْرَةَ رَضِيَ اللَّهُ عَنْهُ، قَالَ: أَتَيْتُ رَسُولَ اللَّهِ صَلَّى اللهُ عَلَيْهِ وَسَلَّمَ وَهُوَ بِخَيْبَرَ بَعْدَ مَا افْتَتَحُوهَا، فَقُلْتُ: يَا رَسُولَ اللَّهِ، أَسْهِمْ لِي، فَقَالَ بَعْضُ بَنِي سَعِيدِ بْنِ العَاصِ: لاَ تُسْهِمْ لَهُ يَا رَسُولَ اللَّهِ، فَقَالَ أَبُو هُرَيْرَةَ: «هَذَا قَاتِلُ ابْنِ قَوْقَلٍ»، فَقَالَ ابْنُ سَعِيدِ بْنِ العَاصِ: وَاعَجَبًا لِوَبْرٍ، تَدَلَّى عَلَيْنَا مِنْ قَدُومِ ضَأْنٍ، يَنْعَى عَلَيَّ قَتْلَ رَجُلٍ مُسْلِمٍ أَكْرَمَهُ اللَّهُ عَلَى يَدَيَّ، وَلَمْ يُهِنِّي عَلَى يَدَيْهِ، قَالَ: «فَلاَ أَدْرِي أَسْهَمَ لَهُ أَمْ لَمْ يُسْهِمْ لَهُ»، قَالَ سُفْيَانُ: وَحَدَّثَنِيهِ السَّعِيدِيُّ، عَنْ جَدِّهِ، عَنْ أَبِي هُرَيْرَةَ، قَالَ: «أَبُو عَبْدِ اللَّهِ السَّعِيدِيُّ هُوَ عَمْرُو بْنُ يَحْيَى بْنِ سَعِيدِ بْنِ عَمْرِو بْنِ سَعِيدِ بْنِ العَاصِ»

مترجم:

2827.

حضرت ابوہریرۃ  ؓسےروایت ہے، وہ بیان کرتے ہیں کہ میں رسول اللہ ﷺ کی خدمت میں اس وقت حاضر ہوا جب آپ فتح خیبر کے بعد وہاں تشریف فرماتھے۔ میں نے عرض کیا: اللہ کے رسول ﷺ ! مجھے بھی غنیمت سے حصہ دیں تو اس پر سعید بن عاص کے ایک بیٹے (ابان بن سعید ؓ) نے کہا: اللہ کے رسول ﷺ ! انھیں مال غنیمت سے کچھ نہ دیں۔ حضرت ابوہریرہ  ؓنے کہا: یہ تو ابن قوقل کاقاتل ہے۔ سعید بن عاص کے بیٹے نے کہا: واہ!مجھے اس وبر جیسے پست قد پر تعجب ہے جو ابھی ابھی اس پہاڑ کی چوٹی سے ہمارے پاس آیا ہے اور مجھ پر اس آدمی کی موت کا عیب لگاتا ہے جو مسلمان تھا اور اسے اللہ تعالیٰ نے میرے ہاتھوں عزت و تکریم سے نوازا (کہ وہ شہید ہوا) اور مجھے اس کے ہاتھوں ذلیل نہیں کیا (کہ میں اس کے ہاتھوں قتل نہیں ہوا)۔ راوی کہتا ہے کہ مجھے معلوم نہیں کہ آپ نے انھیں حصہ دیا یانہ دیا۔ سفیان کہتے ہیں کہ مجھ سے سعیدی نے، اس نے اپنے دادا سے اور اس نے حضرت ابوہریرہ رضی اللہ تعالیٰ عنہ سے بیان کیا۔ (امام بخاری  ؒفرماتے ہیں کہ) سعیدی عمرو بن یحییٰ بن سعید بن عمرو سعید بن عاص کی اولاد سے ہے۔

×
حدیث ترجمہ:

ہم سے حمیدی نے بیان کیا‘ کہا کہ مجھے عنبسہ بن سعید نے خبردی اوران سے ابو ہریرہ ؓ نے بیان فرمایا کہ میں جب رسول اللہ ﷺ کی خدمت میں حاضر ہوا تو آپ ﷺ خیبر میں ٹھہرے ہوئے تھے اور خیبر فتح ہوچکا تھا ، میں نے عرض کیا یارسول اللہ ! میرا بھی ( مال غنیمت میں ) حصہ لگائیے ۔ سعید بن العاص کے ایک لڑکے ( ابان بن سعید ؓ ) نے کہا یا رسول اللہ ! ان کا حصہ نہ لگائیے ۔ اس پر ابو ہریرہ ؓ بولے کہ یہ شخص تو ابن قوقل ( نعمان بن مالک ؓ ) کا قاتل ہے ۔ ابان بن سعید ؓ نے کہا کتنی عجیب بات ہے کہ یہ جانور ( یعنی ابوہریرہ ابھی تو پہاڑ کی چوٹی سے بکریاں چراتے چراتے یہاں آگیا ہے اورایک مسلمان کے قتل کا مجھ پرالزام لگاتا ہے ۔ اس کو یہ خبر نہیں کہ جسے اللہ تعالیٰ نے میرے ہاتھوں سے ( شہادت ) عزت دی اور مجھے اس کے ہاتھوں سے ذلیل ہونے سے بچالیا ( اگر اس وقت میں مارا جاتا ) تو دوزخی ہوتا‘ عنبسہ نے بیان کیا کہ اب مجھے یہ نہیں معلوم کہ آپ ﷺ نے ان کابھی حصہ لگایا یا نہیں ۔ سفیان نے بیان کیا‘ کہا کہ مجھ سے سعیدی نے اپنے دادا کے واسطے سے بیان کیا اورانہوں نے ابوہریرہ ؓ سے ۔ ابو عبداللہ ( امام بخاری  ؒ) نے کہا کہ سعیدی سے مراد عمرو بن یحیٰ بن سعید بن عمرو بن سعید بن عاص ہیں ۔

حدیث حاشیہ:

روایت میں ابن قوقل سے مراد نعمان بن مالک ابن ثعلبہ بن احرم بن فہر بن غنم صحابی ہیں‘ قوقل ان کے دادا ثعلبہ کا لقب تھا‘ وہ احد کے دن ابان کے ہاتھ سے شہید ہوئے تھے۔ کہتے ہیں انہوں نے اس دن یہ دعا کی تھی کہ یا اللہ! سورج ڈوبنے سے پہلے میں جنت کی سیر کروں‘ اللہ نے ان کی یہ دعا قبول فرمائی اور وہ سورج غروب ہونے سے پہلے ہی شہید ہوگئے۔ وبر عرب میں بلی سے چھوٹا ایک جانور جس کی دم اور کان چھوٹے ہوتے ہیں۔ قدوم اور ضان جو لفظ آیا ہے بعضوں نے کہا یہ ایک پہاڑ کا نام ہے جو قبیلہ دوس کے قریب تھا حضرت ابوہریرہ ؓ ادھر ہی کے باشندے تھے گویا ابان بن سعید نے حضرت ابوہریرہ  ؓ پر یہ طعن کیا‘ ان کے پستہ قد ہونے کو وبر سے تشبیہ دی اور بکریوں کا گڈریا قرار دیتے ہوئے اپنے جرم کا اقرار بھی کیا مگر یہ کہ اس وقت وہ مسلمان نہیں ہوئے تھے بعد میں اللہ نے دولت اسلام سے سرفراز کردیا۔ حافظ صاحب ؒ فرماتے ہیں : والمراد منه  ھھنا قول أبان أکرمه اللہ علی یدي ولم بھنی علی یدیه و أراد بذالك أن النعمان استشھد بیر ابان فأکرمه اللہ بالشھادة ولم یقتل أبان علی کفرہ فیدخل النار وھو المراد بالإھانة بل عاش أبان حتی تاب و أسلم وکان إسلامه قبل خیبر بعد الحدبیة وقال ذالك الکلام بحضرة النبي صلی اللہ علیه وسلم وأقرہ علیه وموافق لما تضنمة للعرجمة (فتح الباري) قول ابان سے یہاں مراد یہ کہ اللہ نے میرے ہاتھ پر ان کو عزت شہادت دی اور ان کے ہاتھوں سے قتل کرا کر مجھ کو ذلیل نہیں کیا‘ جس سے مراد لیا کہ نعمانؓ ابانؓ کے ہاتھ سے شہید ہوئے پس اللہ نے ان کا اکرام فرمایا اور ابان کفر پر نہیں مرا ورنہ دوزخ میں جاتا۔ اللہ نے ان کو حدیبیہ کے بعد اسلام نصیب فرمایا۔ ابان نے یہ باتیں آنحضرتﷺ کے سامنے بیان کیں آپؐ خاموش رہے‘ اس سے ترجمہ باب ثابت ہوا۔ آپؐ نے حضرت ابوہریرہ ؓ کا حصہ نہیں لگایا۔ اس پر حافظ صاحب ؒ فرماتے ہیں واحتج به من قال إن من حضر بعد فراغ الوقعة ولو کان خرج مددا لھم أن لا بشارك من حضرھا وھو قول الجمھور (فتح الباري) یعنی اس سے دلیل لی اس نے جس نے کہا کہ جو شخص جنگ ہونے کے بعد حاضر ہو اگرچہ وہ مدد کرنے کے ہی لئے آیا ہو‘ اس کو حاضر ہونے والوں کے ساتھ حصوں میں شریک نہیں کیا جائے گا۔ جمہور کا یہی قول ہے۔
×
ترقیم کوڈاسم الترقيمنام ترقیمرقم الحديث (حدیث نمبر)
١.ترقيم موقع محدّث ویب سائٹ محدّث ترقیم2847
٢. ترقيم فؤاد عبد الباقي (المكتبة الشاملة)ترقیم فواد عبد الباقی (مکتبہ شاملہ)2827
٣. ترقيم العالمية (برنامج الكتب التسعة)انٹرنیشنل ترقیم (کتب تسعہ پروگرام)2615
٤. ترقيم فتح الباري (برنامج الكتب التسعة)ترقیم فتح الباری (کتب تسعہ پروگرام)2827
٥. ترقيم د. البغا (برنامج الكتب التسعة)ترقیم ڈاکٹر البغا (کتب تسعہ پروگرام)2672
٦. ترقيم شركة حرف (جامع خادم الحرمين للسنة النبوية)ترقیم حرف کمپنی (خادم الحرمین الشریفین حدیث ویب سائٹ)2725
٧. ترقيم دار طوق النّجاة (جامع خادم الحرمين للسنة النبوية)ترقیم دار طوق النجاۃ (خادم الحرمین الشریفین حدیث ویب سائٹ)2827
٨. ترقيم فؤاد عبد الباقي (دار السلام)ترقیم فواد عبد الباقی (دار السلام)2827
١٠.ترقيم فؤاد عبد الباقي (داود راز)ترقیم فواد عبد الباقی (داؤد راز)2827

الحكم على الحديث

×
اسم العالمالحكم
١. إجماع علماء المسلمينأحاديث صحيح البخاريّ كلّها صحيحة

تمہید باب

×

تمہید کتاب

×

جہاد،لغوی طور پر جہد سے مشتق ہے۔اس کے معنی کسی مقصد کے حصول کے لیے انتہائی محنت،کوشش اورطاقت صرف کرنے کے ہیں۔لفظ جہد دوطرح سے پڑھا جاتا ہے:اگر اسے جیم کی پیش کے ساتھ پڑھاجائے تو اس کے معنی طاقت صرف کرنا اور اگر جیم کے زبر کے ساتھ پڑھا جائے تو اس کے معنی مشقت اٹھاناہے۔لفظ اجتہاد میں انتہائی ذہنی کوشش کا مفہوم ملحوظ خاطر رکھاجائےگا۔قرآن کریم میں بھی لفظ جہاد اپنے لغوی معنی میں استعمال ہوا ہے۔ارشاد باری تعالیٰ ہے:(وَوَصَّيْنَا الْإِنْسَانَ بِوَالِدَيْهِ حُسْنًا ۖ وَإِنْ جَاهَدَاكَ لِتُشْرِكَ بِي مَا لَيْسَ لَكَ بِهِ عِلْمٌ فَلَا تُطِعْهُمَا ۚ إِلَيَّ مَرْجِعُكُمْ فَأُنَبِّئُكُمْ بِمَا كُنْتُمْ تَعْمَلُونَ)"ہم نے انسان کو اپنے والدین کے ساتھ حسن سلوک کی وصیت کی ہے اور اگر وہ تجھ پر زوردیں کہ تو میرے ساتھ اس چیز کو شریک ٹھہرائے جس کاتجھے کوئی علم نہیں تو ان کا کہنامت مان،تمھیں میری طرف ہی لوٹ کر آناہے،پھر میں تمھیں بتاؤں گا جوتم کیا کرتے تھے۔"(العنکبوت 29/8)شرعی اصطلاح میں جہاد اس محنت وکوشش کانام ہے جو دین اسلام کی سربلندی کے لیے کی جاتی ہے،خواہ یہ کوشش انفرادی ہو یا اجتماعی ،زبانی ہو تحریری اور مالی ہو یا جانی۔لیکن واضح رہے کہ اس انتہائی جدوجہد میں نصب العین دین اسلام کی سربلندی ہوناچاہیے۔اگر یہ مقصود نہیں تو شرعی طور پر ایسی محنت وکوشش کو جہاد قرارنہیں دیا جاسکتا،البتہ غلبہ دین کی مذکورہ صورتوں میں سے جانی جدوجہد(قتال) تمام قسموں سے افضل ہے لیکن اسے ایک ہی صورت(قتال) کے ساتھ خاص کرلینا اسی طرح غلط ہے جس طرح غلبہ سوین کے علاوہ ہر قسم کی کوشش کوجہاد کرنا غلط ہے،چنانچہ قرآن کریم میں لفظ جہاد صرف قتال کے لیے نہیں بلکہ اس وسیع مفہوم کو اداکرنے کے لیے بھی استعمال ہواجس میں غلبہ دین کے لیے کی جانے والی ہرکوشش شامل ہے۔ارشاد باری تعالیٰ ہے:(وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا ۚ وَإِنَّ اللَّهَ لَمَعَ الْمُحْسِنِينَ)"اور وہ لوگ جنھوں نے ہمارے بارے میں پوری کوشش کی ہم انھیں اپنی راہیں ضرور دکھائیں گے اور بلاشبہ اللہ یقیناً نیکی کرنے والوں کےساتھ ہے۔"(العنکبوت:29/69)نیز اللہ تعالیٰ نے فرمایا:(فَلَا تُطِعِ الْكَافِرِينَ وَجَاهِدْهُمْ بِهِ جِهَادًا كَبِيرًا)"آپ ان کافروں کا کہنا مت مانیں اور قرآن کے ذریعے سے ان سے پوری طاقت کے ساتھ جہاد کریں۔"(الفرقان؛25/52)یہ دونوں آیات مکی سورتوں سے تعلق رکھتی ہیں جبکہ جہاد بمعنی قتال مدنی دور کے آغاز میں شروع ہوا۔مکی دور  میں جہاد غلبہ دین کی خاطر دشمنان اسلام کے خلاف کی جانے والی ہرکوشش ومحنت کے لیے عام ہے۔رسول اللہ صلی اللہ علیہ وسلم  کا ارشاد گرامی ہے:"تم مشرکین کے خلاف اپنے مالوں،اپنی جانوں اور اپنی زبانوں سے جہاد کرو۔"(سنن ابی داؤد الجھاد حدیث 2504)زبان سے جہاد کرنے کو کوئی بھی عقل مند قتال نہیں کہتا۔ہمارے رجحان کے مطابق غلبہ دین کے لیے ہر قسم کی جدوجہد جہاد کے دائرے میں آتی ہے،چنانچہ حافظ ابن تیمیہ رحمۃ اللہ علیہ  کہتے ہیں:"جہاد،دل سے ہوتا ہے جیساکہ اسلام پر ثابت قدم رہنے کا پختہ عزم کرنا،لوگوں کو اسلام اور اسلامی شریعت کی طرف دعوت دینا بھی جہاد ہے۔باطل پرستوں کے خلاف حجت قائم کرنا ،حق کا واضح کرنا اورشبہات کو دور کرنا بھی جہاد ہے۔مسلمانوں کے اجتماعی مفاد کے لیے تدبیر وتنظیم کرنا بھی جہاد ہے۔اس کے علاوہ دشمنانِ اسلام کے خلاف جنگ(قتال) کرنابھی جہاد ہے۔اس بنا پر مذکورہ بالاتمام صورتوں میں سے جو صورت بھی ممکن ہواس کے مطابق جہاد کرنا واجب ہے۔(مجموع الفتاویٰ 38/5)حافظ ابن حجر رحمۃ اللہ علیہ  کے نزدیک کفار کے خلاف جنگ لڑنا بھی جہاد ہے اور اس کے علاوہ غلبہ دین کے لیے کی جانے والی ہرجدوجہد بھی جہاد میں شامل ہے،چنانچہ وہ لکھتے ہیں:"کفار کے خلاف جنگ لڑنے کے لیے کوشش اورطاقت صرف کرنا جہاد ہے،اسی طرح نفس،شیطان اور فساق کے خلاف جدوجہد کرنے پر بھی جہاد کااطلاق ہوتا ہے۔جہاد بالنفس یہ ہے کہ دین کی بنیادی تعلیمات کو حاصل کیا جائے،پھر ان پر عمل کیا جائے ،نیز دوسرے لوگوں کو بھی ان کی دعوت دی جائے۔جہاد بالشیطان یہ ہے کہ شیطان کی طرف سے جو شبہات ووساوس پیدا کیے جاتے ہیں انھیں دور کرنے کے لیے محنت اور مشقت اٹھائی جائے،اس کے علاوہ کفار کے خلاف اپنے ہاتھ ،مال،زبان اور دل سے جہاد کیا جائے ،نیز فساق ومنافقین کے خلاف بھی اپنے ہاتھ یا پھر دل اور زبان سے جہاد کیا جائے۔"(فتح الباری 5/6)اس اقتباس سے معلوم ہوتاہے کہ حافظ ابن حجر رحمۃ اللہ علیہ  کے نزدیک جہاد اور قتال دو الگ الگ اصطلاحات ہیں،چنانچہ وہ مزید وضاحت کرتے ہوئے لکھتے ہیں:تحقیقی طور پر یہ بات بھی ثابت ہے کہ کفار کے خلاف  جہاد کرنا ہر مسلمان پر فرض ہے،خواہ وہ اپنے ہاتھ کے ساتھ جہاد کرے یا زبان کے ساتھ یامال کے ساتھ یا اپنے دل کےساتھ۔"(فتح الباری 47/6)ظاہر ہےکہ زبان ،مال اور دل کے ساتھ کی جانے والی جدوجہد کو قتال نہیں کہا جاسکتا۔البتہ اسے جہاد سے تعبیر کیا جاسکتا ہے،نیز ہر مسلمان تو کافروں کے خلاف قتال نہیں کرسکتا،البتہ جہاد کسی نہ کسی صورت میں کیا جاسکتا ہے۔امام ابن قیم رحمۃ اللہ علیہ  نے اس موضوع پر تفصیل سے گفتگو کی ہے۔انھوں نے جہاد کو محض قتال تک محدود کرنے کےبجائے اسے وسیع مفہوم میں استعمال کیاہے۔ان کے نزدیک غلبہ دین کے لیے کی جانے والی ہرکوشش،محنت اور جدوجہد جہاد ہے،چنانچہ وہ لکھتے ہیں:"اللہ کے دشمنوں،یعنی کفار کے خلاف جہاد کرنا اس بات پر منحصر ہے کہ وہ مسلمان پہلے اللہ کے لیے اپنے نفس کے خلاف  جہاد کرے جیسا کہ ارشاد نبوی ہے:"جس نے اللہ کی اطاعت میں رہتے ہوئے اپنے نفس کے خلاف جہاد کیا وہ مجاہد ہے۔"(مسند احمد 22/4)اس کامطلب یہ ہے کہ خارجی دشمن کے خلاف جہاد کرنے سے پہلے اپنے نفس کے خلاف جہاد کرنا انتہائی ضروری ہے کیونکہ جو انسان اپنے نفس کو اللہ کے اوامرونواہی اوردیگر احکام شرعیہ کا پابند نہیں بناتا،اس کے لیے دشمن کے خلاف میدان جنگ میں جہاد کرنا ممکن ہی نہیں رہتا کیونکہ جب وہ اپنے پہلو کے دشمن کے ہاتھوں مغلوب ہواور اس کے خلاف جہاد نہ کرے،وہ خارجی دشمن کے خلاف جہاد کیسے کرسکتا ہے؟علاوہ ازیں ایک تیسرا دشمن بھی ہے جب تک انسان اس کے خلاف علم بغاوت بلند نہ کرے کفار اور نفس کے خلاف جہاد نہیں ہوسکتا اور وہ شیطان ہے جس کے متعلق ارشاد باری تعالیٰ ہے:(إِنَّ الشَّيْطَانَ لَكُمْ عَدُوٌّ فَاتَّخِذُوهُ عَدُوًّا.......)"یقیناً شیطان تمہارا دشمن ہے،لہذا تم اسے دشمن ہی سمجھو۔"(الفاطر 35/6)شیطان کو دشمن خیال کرنے کا اللہ تعالیٰ نے حکم دیاہے،اس کامطلب یہ ہے کہ اس کے خلاف جنگ کرنے میں پوری توانائی صرف کی جائے اور کسی قسم کی کوتاہی نہ کی جائے۔ابن قیم رحمۃ اللہ علیہ  مزید لکھتے ہیں کہ جہاد کے چار مراتب ہیں:1۔نفس کے خلاف جہاد۔2۔شیطان کے خلاف جہاد۔3۔کفار کے خلاف جہاد۔4۔منافقین کے خلاف جہاد۔1۔نفس کے خلاف جہاد کے چاردرجے ہیں:الف۔دین اسلام کی ضروری ہدایات حاصل کرکے اپنے نفس کے خلاف جہاد کرے کیونکہ دینی رشدوہدایت کے بغیر اخروی نجات ممکن نہیں۔ب۔حاصل کردہ بنیاد معلومات پر عمل پیراہوکرنفس کے خلاف جہاد کرے کیونکہ اس علم کا کوئی فائدہ نہیں جس پر عمل نہ کیاجائے۔ج۔پھر حاصل کردہ دینی معلومات ان لوگوں تک پہنچائے جو ان سے بےخبر ہیں بصورت دیگر اسے ان لوگوں میں شمار کیا جائے گا جو علم چھپانے کے مرتکب ہیں۔د۔دعوت حق کے راستے میں جو مشکلات اور تکلیفیں درپیش ہوں انھی خوشی سے برداشت کرتے ہوئے اپنے نفس کے خلاف جہاد کرے۔جب انسان چار مراتب کو مکمل کرلے گا تو اسے علمائے ربانیین میں شمار کیاجائے گا۔2۔شیطان کے خلاف جہاد کے دو مرتبے ہیں:الف۔شیطان کی طرف سے بندے کے ایمان کو ختم کرنے کے لیے اس کے دل میں شکوک وشہات پیدا ہوں ان کو دور کرنے کے لیے جدوجہد کرنا۔ب۔شیطان کی طرف سے بندے کے ایمان کو کمزور کرنے کے لیے جو بری خواہشات اس کے دل میں ڈالی جاتی ہیں ان کے خلاف جہاد کرنا۔پہلے مرتبے کے لیے یقین اور دوسرے مرتبے کے لیے صبر کی انتہائی ضرورت ہے۔ارشاد باری تعالیٰ ہے:"ہم نے ان میں سے کچھ پیشوا بنائے جو ہمارے حکم سے رہنمائی کرتے تھے۔جب انھوں نے صبر کیا اور وہ ہماری آیتوں پر یقین رکھتے تھے۔"صبر کے ذریعے سے شہوات اور یقین کےذریعے شبہات کو دور کیا جاتاہے۔3۔4۔کفار اور منافقین کے خلاف جہاد کرنے کے چار مراتب ہیں:1۔دل سے جہاد کرنا۔2۔زبان سے جہاد کرنا۔3۔مال سے جہادکرنا۔4۔جان سے جہاد کرنا۔ان میں سے دل اور مال کے ذریعے سے کفار اور منافقین دونوں کے خلاف جہاد کیا جاسکتا ہے جبکہ طاقت اور جان کے ساتھ جہاد کرنا کفار کے ساتھ خاص ہے اور منافقین کے ساتھ زبان سے جہاد کیاجائےگا۔ان کے خلاف تلوار نہیں اٹھائی جائےگی۔علاوہ ازیں ظلم پیشہ اور اہل بدعت کے خلاف بھی جہاد کیا جاتا ہے۔اس جہاد کے تین مراتب ہیں:©۔اگر طاقت ہوتو ہاتھ کے ساتھ ان کے خلاف جہاد کیا جائے،یعنی قوت سے انھیں روکاجائے۔©۔اگر ہاتھ سے روکنے کی طاقت نہ ہوتو زبان سے اس برائی کے خلاف اظہار کیاجائے۔©۔اگر زبانی جہاد کی ہمت نہ ہوتو دل سے ان کے خلاف جہادکیا جائے ،یعنی ظلم اور اہل ظلم سے دلی نفرت کی جائے۔اس تفصیل سے معلوم ہوا کہ جہاد کے تیرہ درجات ہیں۔ارشاد نبوی ہے:"جو شخص اس حال میں فوت ہوا کہ اس نے کبھی جہاد نہ کیا اور نہ اس کے دل میں کبھی جہاد کا خیال ہی پیدا ہواتو وہ گویا انفاق کی شاخ پر فوت ہوا ہے۔(صحیح مسلم الامارۃ حدیث 4931(1910)نفس اورشیطان کے خلاف جہاد کرنا ہرمسلمان پر فرض عین ہے جبکہ کفار ومنافقین کے خلاف جہاد کرنا فرج کفایہ ہے۔اگرامت کے کچھ افراد اس میں شریک ہوں تو دوسروں کو بھی کفایت کرجائےگا۔(زادالمعاد 3/9۔11)ہماری اس تفصیل کا مقصد یہ ہے کہ قرآن وحدیث میں بیشتر مقامات پر جہاد" قتال فی سبیل اللہ" کے معنی میں استعمال ہوا ہے کیونکہ اللہ تعالیٰ کے کلمے کی سربلندی کے لیے آخری کوشش مقدس جہاد کی یہی قسم ہے لیکن کتاب وسنت میں جہاد جنگ کے علاوہ تحفظ دین کی دوسری کوششوں پر بھی جابجا بولاگیا ہے۔بالخصوص منافقین سے جہاد کی بیشتر صورتیں تلوار کے بغیر ہیں۔اسی طرح مکی سورتوں میں جہاد کا ذکر قطعاً جنگ کے معنی میں نہیں آیا،اس لیے ہر مقام پر جہاد کو قتال فی سبیل اللہ کے معنی میں لینا اس کی غلط تعبیر ہے۔انسانی سوسائٹی میں حکم اور قانون کا درجہ انسانی خواہشات اور عقل وگمان کو نہیں بلکہ اللہ تعالیٰ کے احکام اور آسمانی تعلیمات کوحاصل ہوناچاہیے۔اورکلمۃ اللہ کی اسی سربلندی کے لیے دین اسلام میں دینی معرکہ آرائی کے تسلسل کو باقی رکھا گیا ہے تاکہ کسی دور میں بھی انسانی خواہشات کو آسمانی تعلیمات پر غلبہ حاصل نہ ہونے پائے۔لیکن دور حاضر میں خواہشات اور محدود عقل نے ہر طرف ڈیرے ڈال رکھے ہیں اور آسمانی تعلیمات سے رہنمائی حاصل کرنے کے بجائے اس کے نشانات کو بھی ختم کرنے کی عالمی سطح پر کوشش شروع ہے۔ایسے حالات میں اللہ کے دین کو سربلند کرنے کے یہ معنی ہیں کہ نسل انسانی کو خواہشات کی غلامی اور عقل محض کی پیروی سے نکالا جائے اور اسے آسمانی تعلیمات کی ضرورت کا احساس دلاتے ہوئے وحی الٰہی کے دائرے میں لانے کی بھر پور کوشش کی جائے ،نیز دنیا کے مختلف خطوں میں مسلمان جس مظلومیت کا شکار ہیں اور انھیں بڑی سنگ دلی کے ساتھ ان کے مذہبی تشخص سے محروم کیاجارہا ہے،ان مسلط قوتوں کے خلاف کلمہ حق بلند کرنا اورمظلوم مسلمانوں کو ظلم وجبر کے ماحول سے نکالنے کے لیے جو کچھ ممکن ہوا سے کرگزرنا بھی اعلائے کلمۃ اللہ کا تقاضاہے ۔ایسے حالات میں جس طرح قتال دفاع دین کے لیے ہوتا ہے اسی طرح کافرانہ معاشرے میں قائم ظلم وزیادتی کے خاتمے کے لیے بھی ہوتاہے۔امام بخاری رحمۃ اللہ علیہ  نے اس بڑے عنوان کے تحت جہاد کے متعلق ایک پورا نظام پیش کیا ہے جس میں جہاد کی فرضیت وفضیلت ،اہمیت وافادیت،غرض وغایت اور اس کے آداب  وشرائط کو بیان کیا ہے۔اس سلسلے میں انھوں نے تین سوچھہتراحادیث ذکر کی ہیں۔جن میں چالیس معلق اور باقی متصل سند سے مروی ہیں۔ان کےعلاوہ ستائیس ےکے قریب صحابہ کرام رضوان اللہ عنھم اجمعین  اور تابعین رحمۃ اللہ علیہ  عظام سے مروی آثار بھی ذکر کیے ہیں۔ان مرفوع احادیث میں دوسوچھیاسٹھ احادیث مکرر اور ایک سودس خالص ہیں،نیز امام بخاری رحمۃ اللہ علیہ  نے روایت کردہ احادیث وآثار پر جہاد کے متعلق دوسو کے لگ بھگ چھوٹے چھوٹے عنوان قائم کیے ہیں،جن سے ان کی دقت فہم اور قوت استنباط کا پتہ چلتا ہے،جن میں جنگ سے پہلے کے آداب ،میدان جنگ کے آداب،جنگ کے بعد کے آداب کو تفصیل سے بیان کیا ہے۔اس کے علاوہ مال غنیمت کے حقوق وشرائط پر،پھر جنگی قیدیوں کے متعلق آداب وشرائط کو بھی ذکر کیا ہے۔جہاد سے متعلق رسول اللہ صلی اللہ علیہ وسلم  سے منقول کچھ پیش گوئیاں بھی بیان کی ہیں۔اُمید ہے کہ امام بخاری رحمۃ اللہ علیہ  کے قائم کردہ عنوان اور پیش کردہ احادیث ہمارے لیے ایمان کی تازگی اور جذبہ جہاد کی بیداری کا باعث ہوں گے۔ہماری پیش کردہ معروضات کو  سامنے رکھتے ہوئے ان احادیث کا مطالعہ کریں تاکہ عاقبت نااندیش مسلم منکرین اور عقل عیار کے پیروکار دانشوروں کے جہاد سے متعلق پھیلائے ہوئے زہریلے شکوک وشبہات کا مداوا ہوسکے ۔دعا ہے کہ اللہ تعالیٰ ہمیں یقین کامل کی نعمت عطا فرمائے تاکہ ہم اپنی کھوئی ہوئی عظمت کو دوبارہ حاصل کرسکیں۔

تمہید باب عربی

×

تمہید کتاب عربی

×