التخريج

قسم الحديث (القائل): مرفوع ، اتصال السند: متصل ، قسم الحديث: قولی

‌صحيح البخاري: کِتَابُ مَنَاقِبِ الأَنْصَارِ (بَابُ أَيَّامِ الجَاهِلِيَّةِ)

حکم : أحاديث صحيح البخاريّ كلّها صحيحة 

3841. حَدَّثَنَا أَبُو نُعَيْمٍ حَدَّثَنَا سُفْيَانُ عَنْ عَبْدِ الْمَلِكِ عَنْ أَبِي سَلَمَةَ عَنْ أَبِي هُرَيْرَةَ رَضِيَ اللَّهُ عَنْهُ قَالَ قَالَ النَّبِيُّ صَلَّى اللَّهُ عَلَيْهِ وَسَلَّمَ أَصْدَقُ كَلِمَةٍ قَالَهَا الشَّاعِرُ كَلِمَةُ لَبِيدٍ أَلَا كُلُّ شَيْءٍ مَا خَلَا اللَّهَ بَاطِلٌ وَكَادَ أُمَيَّةُ بْنُ أَبِي الصَّلْتِ أَنْ يُسْلِمَ

مترجم:

3841.

حضرت ابوہریرہ ؓ سے روایت ہے، انہوں نے کہا کہ نبی ﷺ نے فرمایا: ’’سب سے سچی بات جو کوئی شاعر کہہ سکتا تھا وہ لبید شاعر نے کہی: ’’آگاہ رہو! اللہ کے سوا ہر چیز کو زوال ہے۔‘‘ اور امیہ بن ابی صلت (شاعر) مسلمان ہونے کے قریب تھا۔‘‘

×
حدیث ترجمہ:

ہم سے ابو نعیم نے بیان کیا، کہا ہم سے سفیا ن نے بیان کیا، ان سے عبد الملک نے، ان سے ابو سلمہ نے، ان سے حضرت ابو ہریرہ ؓ نے کہ نبی کریم ﷺ نے فرمایا سب سے سچی بات جو کوئی شاعر کہہ سکتا تھا وہ لبید شاعر نے کہی ”ہا ں اللہ کے سوا ہرچیز باطل ہے“ اور امیہ بن ابی الصلت (جاہلیت کا ایک شاعر) مسلمان ہونے کے قریب تھا۔

حدیث حاشیہ:

باطل سے یہاں مراد فنا ہونا ہے یا با لفعل معدوم جیسے صوفیا کہتے ہیں کہ خارج میں سوائے خدا کے فی الحقیقت کچھ موجود نہیں ہے اور یہ جو وجود نظر آتا ہے یہ وجود موہوم ہے جو ایک نہ ایک دن فانی ہے۔ صحیح مسلم میں شرید سے روایت ہے آنحضرت ﷺ نے فرمایا مجھے امیہ بن ابی الصلتت کے شعر سناؤ۔ میں نے آپ ﷺ کو سو بیتوں کے قریب سنائے۔ آپ نے فرمایا یہ تو اپنے شعروں میں مسلمان ہونے کے قریب تھا۔ امیہ جاہلیت کے زمانہ میں عبادت کیا کرتا تھا، آخرت کا قائل تھا۔ بعض نے کہا کہ نصرانی ہوگیا تھا اس کے شعر وں میں اکثر توحید کے مضامین ہیں لبید کا پورا شعر یہ ہے۔ ألا کل شیئ ماخلا اللہ باطل وکل نعیم لا محالة زائل جس کا اردو ترجمہ شعر میں مولانا وحید الزماں مرحوم نے یوں کیاہے۔ جو خدا کے ماسوا ہے وہ فنا ہوجائے گا ایک دن جو دیش ہے مٹ جائے گا لبید کا ذکر کرمانی میں ہے: الشاعر الصحابي من فحول شعر اء الجاهلیة فأسلم ولم یقل شعرا بعد۔ یعنی لبید جاہلیت کا مانا ہوا شا عر تھا جو بعد میں مسلمان ہوگیا پھر اس نے شعر گوئی کو بالکل چھوڑ دیا۔
×
ترقیم کوڈاسم الترقيمنام ترقیمرقم الحديث (حدیث نمبر)
١.ترقيم موقع محدّث ویب سائٹ محدّث ترقیم3871
٢. ترقيم فؤاد عبد الباقي (المكتبة الشاملة)ترقیم فواد عبد الباقی (مکتبہ شاملہ)3841
٣. ترقيم العالمية (برنامج الكتب التسعة)انٹرنیشنل ترقیم (کتب تسعہ پروگرام)3553
٤. ترقيم فتح الباري (برنامج الكتب التسعة)ترقیم فتح الباری (کتب تسعہ پروگرام)3841
٥. ترقيم د. البغا (برنامج الكتب التسعة)ترقیم ڈاکٹر البغا (کتب تسعہ پروگرام)3628
٦. ترقيم شركة حرف (جامع خادم الحرمين للسنة النبوية)ترقیم حرف کمپنی (خادم الحرمین الشریفین حدیث ویب سائٹ)3698
٧. ترقيم دار طوق النّجاة (جامع خادم الحرمين للسنة النبوية)ترقیم دار طوق النجاۃ (خادم الحرمین الشریفین حدیث ویب سائٹ)3841
٨. ترقيم فؤاد عبد الباقي (دار السلام)ترقیم فواد عبد الباقی (دار السلام)3841
١٠.ترقيم فؤاد عبد الباقي (داود راز)ترقیم فواد عبد الباقی (داؤد راز)3841

الحكم على الحديث

×
اسم العالمالحكم
١. إجماع علماء المسلمينأحاديث صحيح البخاريّ كلّها صحيحة

تمہید باب

×

اسلام سے پہلے کا زمانہ جاہلیت کا زمانہ تھا جس میں کوئی اخلاقی اور شرعی قانون نہ تھا۔ ہمارے رجحان کے مطابق جاہلیت کی تحدید وقت سے نہیں بلکہ قانون وضابطے کے اعتبار سے ہونی چاہیے یعنی طرز زندگی کا ہر وہ اقدام جاہلیت ہے جو اللہ سے بغاوت پر مبنی ہو۔ اگر اس کا تعلق اسلام سے پہلے وقت کے ساتھ ہے تو اسے جاہلیت قدیم کہتے ہیں۔قرآن کریم نے اس سلسلے میں چار مقامات پر اس لفظ کو استعمال کیا ہے:(ظَنَّ الْجَاهِلِيَّةِ)( آل عمران:3/154۔) (أَفَحُكْمَ الْجَاهِلِيَّةِ)( المائدہ5/50۔) )تَبَرُّجَ الْجَاهِلِيَّةِ )( الاحزاب33۔33۔))حَمِيَّةَ الْجَاهِلِيَّةِ)( الفتح 48۔26۔)اگر جاہلیت کا تعلق اسلام کے بعد سے ہے تو اسے جاہلیت جدیدہ کہا جاتا ہے جیسا کہ آج کل روشن خیالی کی آڑ میں اندھیرنگری مچی ہوئی ہے۔عہد جاہلیت اس زمانے کو بھی کہتے ہیں جورسول اللہ صلی اللہ علیہ وسلم کے نبی ہونے سے پہلے گزرا ہے۔ حافظ ابن حجر رحمۃ اللہ علیہ نے لکھا ہے کہ اس مقام پر زمانہ جاہلیت سے مراد رسول اللہ صلی اللہ علیہ وسلم کی ولادت سے لے کر آپ کی بعثت تک کا زمانہ ہے۔( فتح الباری:7/188۔)

تمہید کتاب

×

لغوی طور پر مناقب،منقبت کی جمع ہے۔اس کے معنی خوبی اور فضیلت کے ہیں ۔منقبت کے معنی فخر بھی کیے جاتے ہیں اور بعض اہل زبان اس کے معنی ہنروستودگی کرتے ہیں۔بہرحال اس کے معنی میں اچھے   پہلو کا خیال رکھا گیا ہے۔اس کے برعکس برے پہلو کو مثلبۃ کہتے ہیں جس کی جمع مثالب ہے۔اسی طرح انصار ،نصیر کی جمع ہے۔نصیر اور ناصر دونوں ہم معنی ہیں۔انصار ایک اسلامی نام ہے۔رسول اللہ صلی اللہ علیہ وسلم  نے اوس،خزرج اور ان کے حلیفوں کا نام انصاررکھا ہے۔قبیلہ اوس،اوس بن حارثہ اورقبیلہ خزرج ،خزرج بن حارثہ کی طرف منسوب ہیں۔یہ دونوں قیلہ بنت ارقم کے بیٹے ہیں۔انھیں انصار اس لیے کہا جاتا ہے کہ انھوں نے رسول اللہ صلی اللہ علیہ وسلم  کی مدد کی۔آپ کو اور آپ کے اصحاب رضوان اللہ عنھم اجمعین  کو مدینہ طیبہ میں رہنے کے لیے جگہ دی۔مال وجان سے ان کی نصرت وتائید کی اور اپنی ذات پر انھیں ترجیح دی۔سابقین انصار کی تین قسمیں ہیں:1۔اصحاب بیعت عقبہ اولیٰ:۔ان حضرات کی تعداد چھ ہے۔یہ قبیلہ خزرج سے تعلق رکھنے والے تھے۔ان کے نام یہ ہیں:1۔اسعد بن زرارہ  رضی اللہ تعالیٰ عنہ ۔2۔رافع بن مالک  رضی اللہ تعالیٰ عنہ ۔3۔قطبہ بن عامر رضی اللہ تعالیٰ عنہ ۔4۔عوف بن حارث۔5۔عقبہ بن عامر رضی اللہ تعالیٰ عنہ ۔جابر بن عبداللہ بن رباب رضی اللہ تعالیٰ عنہ ۔رسول اللہ صلی اللہ علیہ وسلم  حضرت ابوبکر رضی اللہ تعالیٰ عنہ  کے سامنے منیٰ کی گھاٹی سے گزرے تو ان سے ملاقات ہوگئی۔آپ نے انھیں اسلام کی دعوت دی تو یہ نوجوان مسلمان ہوگئے اور مدینہ طیبہ واپس جاکر خوب تبلیغ کی اور رسول اللہ صلی اللہ علیہ وسلم  کا پیغام مدینہ کے گھر گھر پہنچ گیا۔2۔اصحاب عقبہ ثانیہ:۔ان چھ حضرات کی تبلیغ کے نتیجے میں اگلے سال بارہ آدمی رسول اللہ صلی اللہ علیہ وسلم  کی خدمت میں حاضر ہوئے۔ان میں سے جابر بن عبداللہ بن رماب کو چھوڑ کر باقی پانچ وہی تھے جو پچھلے سال بھی آچکے تھے اور باقی حضرات کے نام یہ ہیں:©معاز بن حارث© ذکوان بن عبد قیس© عبادہ بن صامت۔©یزید بن ثعلبہ© عباس بن عبادہ بن نضلہ©ابوالہیثم بن تہیان۔© عویم بن ساعدہ۔۔۔ رضوان اللہ عنھم اجمعین ۔۔۔یہ آخری دو آدمی قبیلہ اوس کے تھے باقی سب قبیلہ خزرج سے تعلق رکھنے والے تھے۔ان حضرات نے منی میں عقبہ کے پاس رسول اللہ صلی اللہ علیہ وسلم  سے ملاقات کی اورآپ سے چند باتوں پر بیعت کی۔عقبہ کی اس بیعت کی تفصیل حضرت عبادہ بن صامت رضی اللہ تعالیٰ عنہ  سے مروی ہے جسے امام بخاری  رحمۃ اللہ علیہ  نے بیان کیا ہے۔( صحیح البخاری الایمان حدیث 18۔) رسول اللہ صلی اللہ علیہ وسلم  نے ان کے ہمراہ حضرت مصعب بن عمیر رضی اللہ تعالیٰ عنہ  کو بھیجا تاکہ وہ انھیں اسلامی احکام کی تعلیم دیں۔انھوں نے حضرت اسعد بن زرارہ  رضی اللہ تعالیٰ عنہ  کے ہاں قیام کیا،پھر دونوں حضرات نے اہل یثرب میں جوش وخروش سے اسلام کی تبلیغ شروع کردی۔3۔اصحاب عقبہ ثالثہ:۔نبوت کے تیرہویں سال یثرب کے ستر سے زائد مسلمان حج کی ادائیگی کے لیے مکہ آئے تو انھوں نے طے کیا کہ ہم کب تک رسول اللہ صلی اللہ علیہ وسلم  کو یوں ہی مکہ کے پہاڑوں میں چکر کاٹتے،ٹھوکریں کھاتے اور خوفزدگی کی حالت میں چھوڑے رکھیں گے۔آخر کار رسول اللہ صلی اللہ علیہ وسلم  کے ہمراہ ان کا اجتماع جمرہ عقبہ کے پاس جو گھاٹی ہے وہاں ہوا اور رات کی تاریکی میں خفیہ طور پر اس کی تفصیلات طے پائیں۔رسول اللہ صلی اللہ علیہ وسلم  نے انھیں اللہ کی طرف دعوت دی،اس کے بعد بیعت ہوئی۔اس اجتماع میں تہتر مرد اور دوعورتیں:ایک ام عمارہ نسبیہ بنت کعب اور دوسری ام منیع اسماء بنت عمرو تھیں،یعنی مرد اور عورتوں کی تعداد پچھتر تھی۔حضرت جابر رضی اللہ تعالیٰ عنہ  بیان کرتے ہیں ہم نے عرض کی:اللہ کے رسول صلی اللہ علیہ وسلم ! ہم آپ سے کس بات پر بیعت کریں؟آپ نے فرمایا:"اس بات پر کہ© چستی اور سستی ہرحال میں بات سنو گے اور مانو گے۔©۔تنگی اور خوشحالی ہر حال میں مال خرچ کروگے۔©۔بھلائی کا حکم دوگے اور بُرائی سے روکو گے۔©۔اللہ کی  راہ میں اُٹھ کھڑ ے ہو گے اور اللہ کے معاملے میں کسی ملامت گر کی ملامت سے نہیں ڈرو گے۔©۔جب میں تمہارے پاس آجاؤں تو تم میری مدد کروگے اور جس چیز سے تم اپنی اور اپنے بچوں کی حفاظت کرتے ہو اس سے میری بھی حفاظت کرو گے۔اس کے عوض تمہارے لیے جنت ہوگی۔"( مسند احمد 322/3۔) بیعت کی تکمیل کے بعد بارہ سربراہ منتخب ہوئے جو اپنی اپنی قوم کے نقیب تھے۔ان میں سے نوخزرج اور تین اوس سے لیے گئے جن کی تفصیل کتب سیرت میں دیکھی جاسکتی ہے۔( الرحیق المختوم ص: 258۔)ان انصار کے متعلق ارشاد باری تعالیٰ ہے:" اور جو لوگ مہاجرین سے پہلے مدینہ میں مقیم تھے اور ایمان لاچکے تھے وہ ہجرت کرکے آنے والوں سے محبت کرتے ہیں اور جو کچھ انھیں دیا جائے وہ اپنے دلوں میں اس کی کوئی حاجت نہیں پاتے اور مہاجرین کو اپنی ذات پر ترجیح دیتے  ہیں خواہ وہ خود فاقے سے ہوں اور جوشخص اپنے نفس کی  حرص سے بچالیا گیا  تو ایسے ہی لوگ کامیاب ہیں۔( الحشر59:9۔)رسول اللہ صلی اللہ علیہ وسلم  نے ان کے متعلق فرمایا:"اگر ہجرت کی فضیلت نہ ہوتی تو میں بھی انصار کاایک فرد ہوتا۔"( صحیح البخاری مناقب الانصار حدیث 3779۔)امام بخاری  رحمۃ اللہ علیہ  نے اس عنوان کے تحت ان خوش قسمت حضرات کی جان نثاری اور فدائیت کو بیان کیا ہے ا۔اس کے لیے انھوں نے ایک صد تہتر(173) مرفوع متصل احادیث کا انتخاب کیا ہے۔معلق اور موقوف روایات ان کے علاوہ ہیں۔ان احادیث وآثار پر امام بخاری رحمۃ اللہ علیہ  نے تریپن(53) چھوٹے چھوٹے عنوان قائم کیے ہیں۔ابتدائی چند ابواب عمومی مناقب کے لیے مختص  ہیں،پھر انصار کی حوصلہ افزائی ،دلجوئی اس کے بعد سلسلہ مواخات ،انصار سے محبت اور ان کےگھرانوں کی فضیلت کابیان ہے۔انھیں صبر واستقامت کی تلقین کرنے کے بعد ان کے لیے رسول اللہ صلی اللہ علیہ وسلم  کی ڈھیروں دعاؤں کا ذکر ہے۔پھر حکمرانوں سے ایسی توقعات کاذکر ہے کہ وہ ان سے حسن سلوک اوررواداری کا رویہ اختیار کریں۔یہ سلسلہ گیارہ ابواب پر مشتمل ہے۔امام بخاری  رحمۃ اللہ علیہ  نے اس کے بعد شخصی مناقب کا سلسلہ شروع کیا ہے۔انصار میں سے جو حضرات نمایاں خدمات اور کردار کے حامل تھے ان کے  فضائل ومناقب ذکر کیے ہیں۔یہ سلسلہ بھی گیارہ ابواب پر محیط ہے۔اس کے بعد تعمیر کعبہ،ایام جاہلیت ،قسامہ،بعثت نبوی ،کفار ومشرکین کی اذیت  رسانی،چند جاں نثاروں کے اسلام لانے کے ایمان افروز واقعات،معجزہ شق قمر،ہجرت،موت نجاشی ،قصہ ابی طالب اور حدیث اسراء ومعراج کاتذکرہ کیا ہے۔پھر مکہ مکرمہ میں وفود انصار کی آمد ،ہجرت مدینہ کاتفصیلی بیان اور مدینہ طیبہ میں آپ کا قدوم میمنت لزوم کا روح پرور بیان ہے۔آخر میں رسول اللہ صلی اللہ علیہ وسلم  کی مدینہ طیبہ تشریف آوری کے موقع پریہود مدینہ کی حاضری کے ذکر پر اس عنوان کوختم کردیاگیا ہے۔قند ِ مکرر کے طور پر حضرت سلمان فارسی رضی اللہ تعالیٰ عنہ  کے متعلق چند گراں قدر معلومات بیان کی گئی ہیں۔امام بخاری  رحمۃ اللہ علیہ  نے اس عنوان کے تحت ایسے واقعات بھی بیان کیے ہیں جو ایک بندہ مسلم کے ایمان کی تازگی کاباعث ہیں۔قارئین کرام سے درخواست ہے کہ وہ نہایت محبت اور والہانہ پن کے ساتھ اس عنوان میں مذکور احادیث کا مطالعہ کریں۔امید ہے کہ ایمان وعمل میں تازگی کاذریعہ ثابت ہوں گی۔اللہ تعالیٰ سے دعا ہے کہ ہمیں ان نفوس قدسیہ کے نقش قدم پر چلنے کی توفیق دے اورقیامت کے دن ہمیں ان کی رفاقت نصیب فرمائے۔آمین یا رب العالمین۔

تمہید باب عربی

×

تمہید کتاب عربی

×