(۱)حافظ ابن حجر رحمہ اللہ نے [سَبْعَةِ أَحْرُفٍ] کی تشریح میں مختلف اقوال نقل کیے ہیں اور ان پر وارد ہونے والے اعتراضات و اشکالات پیش کرکے ان اقوال کی تردید کی ہے، پھر ترجیح دیتے ہوئے امام ابن قتیبہ اور امام ابوالفضل رازی رحمہا اللہ کے اقوال نقل کیے ہیں اور کہا ہے کہ امام رازی نے امام ابن قتیبہ ہی کی بات کو مزید نکھار کر پیش کیا ہے۔ ہم طوالت کے ڈر سے یہاں صرف راجح قول ہی ذکر کرتے ہیں جسے حافظ ابن حجر رحمہ اللہ نے فتح الباری میں نقل کیا ہے۔ امام ابن قتیبہ اور امام رازی کے نزدیک حدیث میں حروف کے اختلاف سے مراد قراءت کا اختلاف ہے۔ اور سات حروف سے مراد اختلاف قراءت کی سات توعیتیں ہیں، چنانچہ قراءتیں اگرچہ سات سے زائد ہیں لیکن ان قراءتوں میں جو اختلافات پائے جاتے ہیں، وہ سات اقسام میں منحصر ہے: (1) اسماء کا اختلاف: جس میں افراد، تثنیہ، جمع اور تذکیر و تانیث دونوں کا اختلاف داخل ہے، مثلاً: ایک قراءت میں ہے: ﴿تَمَّتْ كَلِمَةُ رَبِّكَ﴾ اور دوسری میں ہے: ﴿تَمَّتْ كَلِمَاتُ رَبِّكَ﴾ (2) افعال کا اختلاف کہ کسی قراءت میں صیغۂ ماضی ہو، کسی میں مضارع اور کسی میں امر، جیسے ایک قراءت کے مطابق ﴿رَبَّنَا بَاعِدْ بَيْنَ أَسْفَارِنَا﴾ اور دوسری میں ﴿رَبَّنَا بَعِّدْ بَيْنَ أَسْفَارِنَا﴾ ہے۔ (3) وجوہ اعراب کا اختلاف: جس میں حرکات و سکنات مختلف قراءتوں میں مختلف ہوں، مثلاً: ﴿وَلا يُضَارَّ كَاتِبٌ﴾ اور ﴿وَلا يُضَارُّ كَاتِبٌ﴾ اور ﴿ذُو الْعَرْشِ الْمَجِيدُ) دوسری قراءت میں ہے: ﴿ذُو الْعَرْشِ الْمَجِيدِ﴾ (4) الفاظ کی کمی بیشی کا اختلاف: ایک قراءت میں کوئی لفظ کم اور دوسری میں زیادہ ہو، مثلاً: ایک قراءت میں ﴿وَمَا خَلَقَ الذَّكَرَ وَالأنْثَى﴾ اور دوسری میں ﴿وَالذَّكَرَ وَالأنْثَى﴾ ہے۔ اس میں لفظ ﴿وَمَا خَلَقَ﴾ نہیں ہے۔ اسی طرح ایک قراءت میں ہے: ﴿تَجْرِي مِنْ تَحْتِهَا الأنْهَارُ﴾ اور دوسری میں ﴿تَجْرِي تَحْتَهَا الأنْهَارُ﴾ ہے۔ (5) تقدیم و تاخیر کا اختلاف: یعنی ایک قراءت میں کوئی لفظ مقدم اور دوسری میں مؤخر ہو، مثلاً: ﴿وَجَاءَتْ سَكْرَةُ الْمَوْتِ بِالْحَقِّ﴾ اور دوسری میں ﴿وَجَاءَتْ سَكْرَةُ الْحَقِّ بِالْمَوْتِ﴾ ہے۔ (6) بدلیت کا اختلاف، یعنی ایک قراءت میں ایک لفظ اور دوسری میں اس کی جگہ دوسرا لفظ ہو، مثلاً: ﴿نُنْشِزها﴾ اور اس کی جگہ دوسری قراءت میں ﴿نُنْشِرها﴾ ہے، نیز ﴿فَتَبَيَّنُوا﴾ کی جگہ ﴿فتئبتوا﴾ اور ﴿طَلْحٍ مَنْضُودٍ﴾ کی جگہ ﴿طَلْع مَنْضُودٍ﴾ (7) لہجوں کا اختلاف: جس میں تفخیم، ترقیق، امالہ، قصر، مد، ہمزہ، اظہار اور ادغام وغیرہ کے اختلاف شامل ہیں۔ محقق ابن جزری، امام مالک اور قاضی باقلانی رحمہم اللہ بھی اس سے متفق ہیں۔ واللہ أعلم۔ مزید تفصیل کے لیے دیکھیے: (فتح الباري: ۳۹-۳۴/۹، تحت حدیث: ۴۹۹۲، واصول تفسیر (اردو)، ص:۸۷-۸۱، مطبوعة دارالسلام)
(2) خطا (غلطی) پرکذب (جھوٹ) کا اطلاق کرنا جائز ہے۔ بعض لوگوں نے مندرجہ بالا حقیقت نہ سمجھنے کی وجہ سے اس قسم کی روایات کا انکار کیا ہے کہ اس سے قرآن مجید شکوک و شبہات کا شکار ہوتا ہے، حالانکہ مختلف علاقوں اور قبائل کے لہجے وغیرہ کا اختلاف ایک بدیہی چیز ہے، اس سے اصل کلام میں فرق نہیں پڑتا جس طرح غیر زبانوں میں قرآن مجید کے مختلف تراجم سے قرآن مجید کی بابت کوئی شبہ پیدا نہیں ہوتا۔