جامع ترمذی: كتاب: حکومت وقضاء کے بیان میں (باب: فیصلے میں رشوت دینے اور لینے والو ں پر وارد وعید کا بیان​)

ترجمۃ الباب:

1336.

ابوہریرہ ؓ کہتے ہیں کہ رسول اللہ ﷺنے فیصلے میں رشوت دینے والے اور رشوت لینے والے دونوں پر لعنت بھیجی ہے ۱؎۔
امام ترمذی کہتے ہیں:
۱۔ ابوہریرہ کی حدیث حسن صحیح ہے۔
۲۔ یہ حدیث ابوسلمہ بن عبدالرحمن سے بھی مروی ہے انہوں عبداللہ بن عمروسے اورانہوں نے نبی اکرمﷺ سے روایت کی ہے۔
۳۔ اورابوسلمہ سے ان کے باپ کے واسطے سے بھی مروی ہے انہوں نے نبی اکرمﷺ سے روایت کی ہے لیکن یہ صحیح نہیں ہے۔
۴۔ میں نے عبداللہ بن عبدالرحمن دارمی کوکہتے سنا کہ ابوسلمہ (بن عبد الرحمن) کی حدیث جسے انہوں نے عبداللہ بن عمرو سے اورانہوں نے نبی اکرمﷺ سے روایت کی ہے اس باب میں سب سے زیادہ اچھی اورسب سے زیادہ صحیح ہے۔ (جو آگے آرہی ہے)
۵۔ اس باب میں عبداللہ بن عمرو، عائشہ، ابن حدیدہ اور ام سلمہ‬ ؓ س‬ے بھی احادیث آئی ہیں۔