جامع ترمذی: كتاب: نماز کے احکام ومسائل (باب: امام کا دعا کو اپنے لیے خاص کر نے کی کراہت کا بیان​)

ترجمۃ الباب:

357.

ثوبان ؓ سے روایت ہے کہ رسول اللہ ﷺ نے فرمایا: ’’کسی آدمی کے لیے جائز نہیں کہ وہ کسی کے گھر کے اندر جھانک کر دیکھے جب تک کہ گھر میں داخل ہونے کی اجازت نہ لے لے۔ اگر اس نے (جھانک کر) دیکھا تو گویا وہ اندر داخل ہو گیا۔ اور کوئی لوگوں کی امامت اس طرح نہ کرے کہ ان کو چھوڑ کر دعا کو صرف اپنے لیے خاص کرے، اگر اس نے ایسا کیا تو اس نے ا ن سے خیانت کی، اور نہ کوئی نماز کے لیے کھڑا ہو اور حال یہ ہو کہ وہ پاخانہ اور پیشاب کو روکے ہوئے ہو‘‘۔
امام ترمذی کہتے ہیں:
۱- ثوبان ؓ کی حدیث حسن ہے۔
۲- یہ حدیث معاویہ بن صالح سے بھی مروی ہے، معاویہ نے اس کو بطریق: ’’سَفْرِ بْنِ نُسَيْرٍ، عَنْ يَزِيدَ بْنِ شُرَيْحٍ، عَنْ أَبِي أُمَامَةَ، عَنْ النَّبِيِّ ﷺ ‘‘ روایت کی ہے، نیز یہ حدیث یزید بن شریح ہی کے واسطے سے بطریق: ’’أَبِي هُرَيْرَةَ، عَنْ النَّبِيِّ ﷺ ‘‘ روایت کی گئی ہے۔ یزید بن شریح کی حدیث بطریق: ’’أَبِي حَيٍّ الْمُؤَذِّنِ، عَنْ ثَوْبَانَ‘‘ سند کے اعتبار سے سب سے عمدہ اور مشہور ہے۔
۳- اس باب میں ابو ہریرہ اور ابو امامہ ؓ سے احادیث آئی ہیں۔