جامع ترمذی: كتاب: شکار کے احکام ومسائل (باب: کتاشکار میں سے کھا لے اس کے حکم کا بیان​)

ترجمۃ الباب:

1470.

عدی بن حاتم ؓ کہتے ہیں کہ میں نے رسول اللہ ﷺسے سدھائے ہوئے کتے کے متعلق پوچھا تو آپﷺ نے فرمایا: ’’جب تم اپنا سدھایا ہوا کتا روانہ کرو، اور (بھیجتے وقت اس پر) اللہ کانام (یعنی بسم اللہ) پڑھ لو توتمہارے لیے جوکچھ وہ روک رکھے اسے کھاؤ اور اگروہ شکار سے کچھ کھا لے تومت کھاؤ ، اس لیے کہ اس نے شکاراپنے لیے روکا ہے‘‘، میں نے عرض کیا: اللہ کے رسولﷺ! آپﷺ کا کیا خیال ہے اگرہمارے کتے کے ساتھ دوسرے کتے شریک ہوجائیں؟ آپ نے فرمایا: ’’تم نے اللہ کا نام (یعنی بسم اللہ) اپنے ہی کتے پر پڑھا ہے دوسرے کتے پرنہیں‘‘۔ سفیان (ثوری) کہتے ہیں: آپﷺ نے اس کے لیے اس کا کھانا درست نہیں سمجھا ۱؎ ۔
امام ترمذی کہتے ہیں:
۱۔ ذبیحہ اورشکارکے سلسلے میں صحابہ کرام میں سے بعض اہل علم اوردوسرے لوگوں کے نزدیک اسی پرعمل ہے کہ جب وہ پانی میں گرجائیں تو انہیں کوئی نہ کھائے اور بعض لوگ ذبیحہ کے بارے میں کہتے ہیں: جب اس کا گلا کاٹ دیا جائے، پھر پانی میں گرے اور مرجائے تو اسے کھایا جائے گا، عبداللہ بن مبارک کا یہی قول ہے۔
۲۔ اہل علم کا اس مسئلہ میں کہ جب کتا شکارکا کچھ حصہ کھا لے اختلاف ہے، اکثراہل علم کہتے ہیں: جب کتا شکار سے کھا لے تو اسے مت کھاؤ، سفیان ثوری، عبداللہ بن مبارک، شافعی، احمد اوراسحاق بن راہویہ کا یہی قول ہے۔
۳۔ جب کہ صحابہ کرام میں سے بعض اہل علم اور دوسرے لوگوں نے کھانے کی رخصت دی ہے، اگرچہ اس میں سے کتے نے کھا لیا ہو۔