٭ حضرت سعد بن معاذ ﷜:نام و نسب: سعد بن معاذ بن نعمان بن امری القیس بن زید بن عبدالاشھل الانصاری، آپ کی کنیت ابوعمرو اور والدہ کا نام کبثہ بنت رافع ہے۔ آپ مدینہ منورہ میں نبی اکرم ﷺ کے مقرر کردہ داعی اسلام حضرت معصب رضی اللہ عنہ کی تبلیغ سے مسلمان ہوئے، اسلام لانے کے بعد قبیلے والوں کو مخاطب کر کے فرمایا: تم سب خواتین و حضرات سے بات کرنا میرے لیے حرام ہے حتی کہ تم مسلمان ہو جاؤ، لہذا وہ سب مسلمان ہو گئے، اس طرح اسلام کے لیے آپ بڑے بابرکت ثابت ہوئے۔ جنگ خندق میں ایک تیر آپ کو لگا جس سے خون بند نہیں ہوتا تھا، نبی کریمﷺنے آپ کا خیمہ مسجد نبوی میں لگوا دیا تاکہ تیمارداری میں سہولت رہے پھر وہ زخم بند ہو گیا۔ تیر لگنے کے بعد حضرت سعد نے یہ دعا مانگی: الہی اگر قریش کے ساتھ جنگ باقی رہے تو مجھے زندہ رکھ کیونکہ جس قوم نے تیرے نبی کو تکالیف دیں، اسے جھٹلایا اور مکہ سے ہرت پر مجبور کیا، مجھے اس سے جنگ کرنا بے حد پسند ہے اور اگر ان کے ساتھ جنگ ختم ہو گئی ہے تو میرے اس زخم کو شہادت کا باعث بنا اور بنو قریظہ کے یہودیوں کے بارے میں میری آنکھیں ٹھنڈی کیے بغیر مجھے موت نہ دینا۔ پھر قریظہ کا خاتمہ ہو گیا تو آپ کا زخم دوبارہ پھوٹ پڑا اور اسی سے آپ شہید ہو گئے۔ رسول اللہ ﷺ نے نماز جنازہ پڑھائی آپ کو دفن کر کے لوٹے تو آپ کی آنسو آپ کی داڑھی مبارک پر گر رہے تھے۔ حضرت سعد رضی اللہ عنہ کی وفات 5 ہجری میں ماہ شوال میں ہوئی، اس وقت آپ کی عمر 37 برس تھی۔