روزے کی  لغوی  تعریف لغت میں صوم کے معنی کسی چیز سے رکنے کے ہیں۔جیسے کہا جاتا ہے۔(فلان صام عن الكلام)  فلاں شخص گفتگو سے رک گیا  قرآن مجید میں حضرت مریم ؑ  کے متعلق ارشاد ہے)( انِّى نَذَرْتُ لِلرَّحْمَـٰنِ صَوْمًا)(مریم۔19:26) میں نے رحمٰن کےلئے روزے کی نزر مانی ہے۔  یعنی خاموشی اختیار کی۔اسی طرح جب سورج دوپہر کے وقت آسمان کے وسط میں ٹھرا۔اور رکا دکھائی دیتا ہے۔تو اس وقت عرب کہتے ہیں۔(صام النهار) دن رک گیا ہے  2۔ روزے کی اصطلاحی تعریف:شرع میں مکلف شخص کا طلوع فجر سے غروب آفتاب تک روزے کی نیت سے کھانے پینے اور جماع سے رکنا روزہ کہلاتا ہے۔3۔ روزوں کی فرضیت:روزے 10شعبان 2ہجری کو فرض ہوئے۔روزوں کی فرضیت قرآن وسنت اور اجماع امت سے ثابت ہے۔قرآن مجید میں ارشاد باری تعالیٰ ہے۔(يَـٰٓأَيُّهَا ٱلَّذِينَٱلَّذِينَ ءَامَنُوا۟ كُتِبَ عَلَيْكُمُ ٱلصِّيَامُ كَمَا كُتِبَ عَلَى ٱلَّذِينَ مِن قَبْلِكُمْ لَعَلَّكُمْ تَتَّقُونَ)(البقرہ:2۔183)اے ایمان والو!تم پر روزہ رکھنا اسی طرح فرض کیاگیا ہے۔جس طرح ان لوگوں پر فرض کیا گیا تھا۔جو تم سے پہلے تھے تاکہ تم پرہیز گار بن جائو۔  سنت نبوی ﷺ میں روزے کی فرضیت کے متعدد دلائل ہیں۔مثلا حضرت عبد اللہ بن عمر﷜ کی یہ حدیث کہ نبی کریمصلی اللہ علیہ وسلم نے فرمایا:  اسلام کی بنیاد پانچ چیزوں پر ہے۔اس بات کی گواہی کہ اللہ کے سوا کوئی معبود حقیقی نہیں اورحضرت محمد ﷺ اللہ کے رسول ہیں۔نماز قائم کرنا۔زکواۃ ادا کرنا۔رمضان کے روزے رکھنا۔اور صاحب استطاعت کابیت اللہ کا حج کرنا  (صحیح البخاری الایمان باب دعائوکم ایمانکم۔۔۔حدیث 8)امت کا روزوں کی فرضیت پر اجماع ہے۔4۔ روزوں کی فضیلت:نبی اکرم ﷺنے حدیث قدسی بیان فرمائی۔جس میں اللہ تعالیٰ فرماتا ہے۔(الصوم لي وانا اجزي به)(صحیح البخاری باب فضل الصوم حدیث 1894۔وصحیح مسلم الصیام باب فضل الصیام حدیث 1151)  روزہ میرے لئے ہے۔اور میں ہی اس کی جزا دوں گا۔