التخريج

قسم الحديث (القائل): مرفوع ، اتصال السند: متصل ، قسم الحديث: قولی

‌صحيح البخاري: كِتَابُ الجِزْيَةِ (بَابُ الجِزْيَةِ وَالمُوَادَعَةِ مَعَ أَهْلِ الحَرْبِ)

حکم : أحاديث صحيح البخاريّ كلّها صحيحة 

ترجمة الباب: وَقَوْلِ اللَّهِ تَعَالَى: {قَاتِلُوا الَّذِينَ لاَ يُؤْمِنُونَ بِاللَّهِ وَلاَ بِاليَوْمِ الآخِرِ وَلاَ يُحَرِّمُونَ مَا حَرَّمَ اللَّهُ وَرَسُولُهُ وَلاَ يَدِينُونَ دِينَ الحَقِّ مِنَ الَّذِينَ أُوتُوا الكِتَابَ حَتَّى يُعْطُوا الجِزْيَةَ عَنْ يَدٍ وَهُمْ صَاغِرُونَ} [التوبة: 29] " يَعْنِي: أَذِلَّاءُ، {وَالمَسْكَنَةُ} [البقرة: 61] مَصْدَرُ المِسْكِينِ، فُلاَنٌ أَسْكَنُ مِنْ فُلاَنٍ: أَحْوَجُ مِنْهُ، وَلَمْ يَذْهَبْ إِلَى السُّكُونِ «وَمَا جَاءَ فِي أَخْذِ الجِزْيَةِ مِنَ اليَهُودِ، وَالنَّصَارَى، وَالمَجُوسِ وَالعَجَمِ» وَقَالَ ابْنُ عُيَيْنَةَ، عَنْ ابْنِ أَبِي نَجِيحٍ قُلْتُ: لِمُجَاهِدٍ، مَا شَأْنُ أَهْلِ الشَّأْمِ، عَلَيْهِمْ أَرْبَعَةُ دَنَانِيرَ، وَأَهْلُ اليَمَنِ عَلَيْهِمْ دِينَارٌ، قَالَ: «جُعِلَ ذَلِكَ مِنْ قِبَلِ اليَسَارِ»

3160. فَقَالَ النُّعْمَانُ: رُبَّمَا أَشْهَدَكَ اللَّهُ مِثْلَهَا مَعَ النَّبِيِّ صَلَّى اللهُ عَلَيْهِ وَسَلَّمَ، فَلَمْ يُنَدِّمْكَ، وَلَمْ يُخْزِكَ، وَلَكِنِّي شَهِدْتُ القِتَالَ مَعَ رَسُولِ اللَّهِ صَلَّى اللهُ عَلَيْهِ وَسَلَّمَ كَانَ «إِذَا لَمْ يُقَاتِلْ فِي أَوَّلِ النَّهَارِ، انْتَظَرَ حَتَّى تَهُبَّ الأَرْوَاحُ، وَتَحْضُرَ الصَّلَوَاتُ»

مترجم:

ترجمۃ الباب:

اور اللہ تعالیٰ کا ارشاد کہ ” ان لوگوں سے جنگ کرو جو اللہ پر ایمان نہیں لائے اور نہ آخرت کے دن پر اور نہ ان چیزوں کو وہ حرام مانتے ہیں جنہیں اللہ اور اس کے رسول صلی اللہ علیہ وسلم نے حرام قرار دیا ہے اور نہ دین حق کو انہوں نے قبول کیا ( بلکہ الٹے وہ لوگ تم ہی کو مٹانے اور اسلام کو ختم کرنے کے لیے جنگ پر آمادہ ہو گئے ) ۔ ان لوگوں سے جنہیں کتاب دی گئی تھی ( مثلاً یہود و نصاریٰ ) یہاں تک ( مدافعت کرو ) کہ وہ تمہارے غلبہ کی وجہ سے جزیہ دینا قبول کرلیں اور وہ تمہارے مقابلہ پر دب گئے ہوں ‘ ‘ ۔ ( صاغرون کے معنی ) اذلاء کے ہیں ۔ اور ان احادیث کا ذکر جن میں یہود ، نصاریٰ ، مجوس اور اہل عجم سے جزیہ لینے کا بیان ہوا ہے ۔ ابن عیینہ نے کہا ، ان سے ابن ابی نجیح نے کہا کہ میں نے مجاہد سے پوچھا ، اس کی کیا وجہ ہے کہ شام کے اہل کتاب پر چار دینار ( جزیہ ) ہے اور یمن کے اہل کتاب پر صرف ایک دینار ! تو انہوں نے کہا کہ شام کے کافر زیادہ مالدار ہیں ۔ اس کو عبدالرزاق نے وصل کیا ہے۔ معلوم ہوا کہ جزیہ کی کمی بیشی کے لیے امام کو اختیار ہے۔ جزیہ کے نام سے حقیر سی رقم غیرمسلم رعایا پر اسلامی حکومت کی طرف سے ایک حفاظتی ٹیکس ہے جس کی ادائیگی ان غیرمسلموں کی وفاداری کا نشان ہے اور اسلامی حکومت پر ذمہ داری ہے کہ ان کے مال و جان و مذہب کی پورے طور پر حفاظت کی جائے گی۔ اگر اسلامی حکومت اس بارے میں ناکام رہ جائے تو اسے جزیہ لینے کا کوئی حق نہ ہوگا۔ کما لایخفیٰ۔ ( لفظ اذلاءسے آگے بعض نسخوں میں یہ عبارت زائدہے والمسکنۃ مصدر المسکین اسکن من فلان احوج منہ ولم ےذہب الی السکون )

3160.

(جب حضرت مغیرہ ؓ نے یہ گفتگو کرکے فوراً لڑائی کرنا چاہی تو) حضرت نعمان بن مقرنؓ نے کہا: تم تو اکثر نبی کریم ﷺ کے ساتھ جنگ میں شریک ہوئے اور اللہ تعالیٰ نے تمھیں کسی موقع پر شرمندہ یا ذلیل نہیں کیا اور میں نے بھی اکثر رسول اللہ ﷺ کے ہمراہ جنگ میں شریک ہوکر دیکھا کہ آپ دن کے اول وقت میں جنگ نہیں کرتے تھے بلکہ انتظار فرماتے یہاں تک کہ ہوائیں چلنے لگتیں اور نماز کا وقت آجاتا۔

×
ترجمۃ الباب:

ارشاد باری تعالیٰ ہے: "(اہل کتاب میں سے) ان لوگوں کے ساتھ جنگ کرو جو نہ اللہ پر ایمان لاتے ہیں اور نہ آخرت کے دن پر اور نہ ان چیزوں کو حرام سمجھتے ہیں(جو اللہ اور اس کے رسول صلی اللہ علیہ وسلم  نے حرام کی ہیں اور نہ دین حق ہی کو اپنا دین بناتے ہیں یہاں تک وہ اپنے ہاتھ سے جزیہ ادا کریں)اور وہ حقیر وذلیل ہوں۔ "

صَاغِرُونَکے معنی ہیں ذلیل بن کررہیں۔ لفظ الْمَسْكَنَةُ مسکین کا مصدر ہے۔ عرب کے اس محاورے سے ماخوذ ہے کہ فلان اسكن من فلان یعنی وہ فلاں سے زیادہ محتاج ہے کہ اسے کسی کروٹ سکون میسر نہیں۔ اس کاماخذ سکون نہیں ہے۔

یہود ونصاریٰ، مجوسیوں اور عجمیوں سے جزیہ لینے میں جوروایات ہیں ان کا بیان۔

حضرت ابن عیینہ نے ابن ابی نجیح سے بیان کیا، انھوں نے کہا: میں نے امام مجاہد سے پوچھا کہ اہل شام کا کیا حال ہے، ان سے فی کس چار دینار لیے جاتے ہیں جبکہ اہل یمن سے ایک دینار لیاجاتا ہے؟انھوں نے فرمایا کہ یہ فرق دولتمندی کی وجہ سے ہے۔

فائدہ: ۔

اس سے معلوم ہوا کہ جزیے میں تفاوت جائز ہے، اس میں کمی بیشی کا اختیار امام کو ہے۔ جزیے کے نام سے حقیر سی رقم غیر مسلم رعایا پر اسلامی حکومت کی طرف سے ایک حفاظتی ٹیکس ہے۔ جس کی ادائیگی ان غیر مسلم حضرات کی وفاداری کانشان ہے۔ اس کی ادائیگی کے بعد اسلامی حکومت کی یہ ذمہ داری ہے کہ وہ ان کے مال وجان اور عزت وآبرو، نیز مذہب کی پورے طور پر حفاظت کرے۔ اگر اسلامی حکومت اس میں ناکام ہوتو اسے جزیہ لینے کاکوئی حق نہیں ہوگا۔ مذکورہ آیت کریمہ اہل کتاب سے جزیہ لینے کے متعلق نص صریح کی حیثیت رکھتی ہے۔ ان کے علاوہ دیگر اقلیت اقوام سے جزیہ لینا احادیث سے ثابت ہے جیسا کہ آئندہ اس کا بیان ہوگا۔


حدیث ترجمہ:

نعمان ؓ نے کہا تم کو تو اللہ پاک ایسی کئی لڑائیوں میں آنحضرت ﷺ کے ساتھ شریک رکھ چکا ہے۔ اور اس نے (لڑائی میں دیر کرنے پر) تم کو نہ شرمندہ کیا نہ ذلیل کیا اور میں تو آنحضرت ﷺ کے ساتھ لڑائی میں موجود تھا۔ آپ کا قاعدہ تھا اگر صبح سویرے لڑائی شروع نہ کرتے اور دن چڑھ جاتا تو اس وقت تک ٹھہرے رہتے کہ سورج ڈھل جائے، ہوائیں چلنے لگیں، نمازوں کا وقت آن پہنچے۔

حدیث حاشیہ:

 ہوا یہ کہ لشکر اسلام حضرت عمرص کی خلافت میں ایران کی طرف چلا۔ جب قادسیہ میں پہنچا تو یزدگردبادشاہ ایران نے ایک فوج گراں اس کے مقابلے کے لیے روانہ کی۔ 14ھ میں یہ جنگ واقع ہوئی، جس میں مسلمانوں کو کافی نقصان پہنچا، طلیحہ اسدی اور عمروبن معدیکرب اور ضرار بن خطاب جیسے اسلامی بہادر شہید ہوگئے۔ بعدمیں اللہ پاک نے کافروں پر ایک تیز آندھی بھیجی۔ ان کے ڈیرے خیمے سب اکھڑ گئے، ادھر سے مسلمانوں نے حملہ کیا، وہ بھاگے ، ان کا نامی گرامی پہلوان رستم ثانی مارا گیا اور مسلمانی فوج تعاقب کرتی ہوئی مدائن پہنچی، وہاں کا رئیس ہرمزان محصور ہوگیا، آخر اس نے امان چاہی اور خوشی سے مسلمان ہوگیا۔ ابوموسیٰ اشعری رضی اللہ عنہ جو فوج کے سردار تھے، انہوں نے ان کو حضرت عمرص کے پاس بھیج دیا۔ حضرت عمرؓنے اس کی عزت افزائی فرمائی، اسے عقلمند اور صاحب تدبیر پاکر اس کو مشیر خاص بنایا، چنانچہ ہرمزان نے کسریٰ کے بارے میں صحیح مشورہ دیا۔ ہرچند وہ روم کا بادشاہ تھا مگر اس زمانے میں کسریٰ کا مرتبہ سب بادشاہوں سے زیادہ تھا، اس کا تباہ ہونا ایران اور روم دونوں کے زوال کا سبب بنا، کسریٰ کی فوج کا سردار ذوالجناحین نامی سردار تھا، جو خچر سے گرا اور اس کا پیٹ پھٹ گیا۔ سخت جنگ کے بعد کافروں کو ہزیمت ہوئی، مزید تفصیل آگے آئے گی۔
×
ترقیم کوڈاسم الترقيمنام ترقیمرقم الحديث (حدیث نمبر)
١.ترقيم موقع محدّث ویب سائٹ محدّث ترقیم3181
٢. ترقيم فؤاد عبد الباقي (المكتبة الشاملة)ترقیم فواد عبد الباقی (مکتبہ شاملہ)3160
٣. ترقيم العالمية (برنامج الكتب التسعة)انٹرنیشنل ترقیم (کتب تسعہ پروگرام)2925.01
٤. ترقيم فتح الباري (برنامج الكتب التسعة)ترقیم فتح الباری (کتب تسعہ پروگرام)3160.01
٥. ترقيم د. البغا (برنامج الكتب التسعة)ترقیم ڈاکٹر البغا (کتب تسعہ پروگرام)2989.01
٦. ترقيم شركة حرف (جامع خادم الحرمين للسنة النبوية)ترقیم حرف کمپنی (خادم الحرمین الشریفین حدیث ویب سائٹ)3041.01
٧. ترقيم دار طوق النّجاة (جامع خادم الحرمين للسنة النبوية)ترقیم دار طوق النجاۃ (خادم الحرمین الشریفین حدیث ویب سائٹ)3160
٨. ترقيم فؤاد عبد الباقي (دار السلام)ترقیم فواد عبد الباقی (دار السلام)3160
١٠.ترقيم فؤاد عبد الباقي (داود راز)ترقیم فواد عبد الباقی (داؤد راز)3160

الحكم على الحديث

×
اسم العالمالحكم
١. إجماع علماء المسلمينأحاديث صحيح البخاريّ كلّها صحيحة

تمہید باب

×

اس اثرکو مصنف عبدالرزاق(87/6) میں متصل سند سے بیان کیا گیا ہے۔اس سے معلوم ہواکہ جزیے میں فرق جائز ہے۔اس میں کمی بیشی کا اختیار امام کو ہے۔جمہور کے نزدیک ہرسال کے لیے کم از کم جزیہ ایک دینار ہے جسے احناف فقیر کے ساتھ خاص کرتے ہیں۔متوسط آدمی کے لیے وہ دینار اور مال دار کے لیے چار دینار ہیں(فتح الباری 312/6)۔جزیے کے نام سے معمولی سی رقم غیر مسلم رعایا پر اسلامی حکومت کی طرف سے ایک حفاظتی ٹیکس ہے جس کی ادائیگی ان غیر مسلم حضرات کی وفاداری کا نشان ہے۔اس کی ادائیگی کے بعد اسلامی حکومت کی یہ ذمے داری ہے کہ وہ ان کے مال وجان اور عزت وآبرو ،نیز مذہب کی پورے طورپر حفاظت کرے۔اگراسلامی حکومت اس میں ناکام ہوتو اسے جزیہ لینے کا کوئی حق نہیں ہوگا۔مذکورہ آیت کریمہ اہل کتاب سے جزیہ لینے کے متعلق نص صریح کی حیثیت رکھتی ہے۔ان کے علاوہ دیگر اقلیت اقوام سے جزیہ لینا احادیث سے ثابت ہے جیسا کہ آئندہ اس کا بیان ہوگا۔

تمہید کتاب

×

جزیہ لغوی طور پر جزاء سے مشتق ہے جس کے معنی معاوضے کے ہیں۔شرعی اصطلاح میں اس سے مراد وہ مال ہے جو غیر مسلم حضرات سے دارالاسلام میں سکونت اختیار کرنے کے عوض وصول کیا جاتا ہے۔ اور موادعت کے معنی چھوڑنے کے ہیں۔ اصطلاحی طور پر کچھ مدت کے لیے کسی مصلحت کی بنا پر اہل حرب سے جنگ ترک کرنے کا نام "موادعت اور مصالحت"ہے ان دونوں کے الگ الگ احکام ہیں جو اس عنوان کے تحت بیان کیے جائیں گے۔دراصل عرب کے ہمسایہ ملک ایران میں رعایا پر دو قسم کے ٹیکس عائد تھے ایک زمین کا لگان جو صرف زمینداروں سے وصول کیا جا تا تھا۔ اسے وہاں کے باشندے خراگ کہتے تھے ہماری شریعت میں لفظ خراج اسی کا معرب ہے۔ دوسرا ٹیکس عام لوگوں سے دفاعی ضروریات کے پیش نظر لیا جاتا تھا۔ ان کے ہاں اسے گزیت کہا جاتا تھا جزیہ کا لفظ اسی سے معرب ہے۔ مسلمانوں نے جب یہ علاقے فتح کیے تو انھوں نے مفتوح اقوام پر کوئی نیا بوجھ نہیں ڈالا بلکہ وہ دونوں قسم کے ٹیکس ان پر عائد کیے گئے جو پہلے سے ان پر لاگوتھے۔ قرآن کریم میں صرف اہل کتاب سے جزیہ لینے کا ذکر ہے۔(التوبہ:29۔)جبکہ رسول اللہ صلی اللہ علیہ وسلم نے مجوس سے بھی جزیہ وصول کیا تھا۔(صحیح البخاری الجزیہ والمودعۃ حدیث 3157)اس سے معلوم ہوتا ہے کہ ہر مذہب کے غیر مسلم حضرات سے جزیہ لیا جا سکتا ہے جیسا کہ ایک دوسری حدیث میں ایران کے آتش پرست لوگوں سے جزیے کے مطالبے کا ذکر ہے۔ حضرت مغیرہ بن شعبہ  رضی اللہ تعالیٰ عنہ نے ایک مرتبہ ایرانی سپہ سالار سے کہا تھا۔"ہمارے پروردگار کے رسول اور ہمارے نبی صلی اللہ علیہ وسلم نے ہمیں حکم دیا کہ ہم تم سے جنگ کریں یہاں تک کہ تم ایک اللہ کی عبادت کرو یا پھر جزیہ ادا کرو۔"۔(صحیح البخاری الجزیہ والمودعۃ حدیث 3159)جزیہ ان غیر مسلم اقوام سے لیا جاتا ہے جو اسلام قبول نہ کرنا چاہتی ہوں خواہ یہ مسلمانوں کی مفتوحہ قوم ہو یا کسی اسلامی ریاست میں بطور رعایا رہتی ہو جیسے آج کل کی زبان میں اقلیت کہا جاتا ہے۔ اہل اسلام پر زکاۃ کی ادائیگی فرض ہے جس کی شرح مقرر ہے لیکن غیر مسلم قوم پر زکاۃ کے بجائے جزیے کی ادائیگی لازم ہوتی ہے اور اس کی شرح میں اس قوم کی مالی حیثیت کے مطابق کمی بیشی کی جا سکتی ہے۔جزیے کی تمام رقوم سر کاری بیت المال میں جمع ہوتی ہیں اسلامی حکومت اس جزیے کے عوض اس ذمی قوم کو دفاعی ذمہ داریوں سے سبکدوش کر دیتی ہے اور انھیں اپنے مذہبی افعال کی ادائیگی کے لیے پوری پوری اجازت دی جاتی ہے لیکن اس امر کی اجازت نہیں ہوتی کہ وہ اسلام یا اہل اسلام پر کیچڑاچھالیں اور اس کی راہ میں رکاوٹیں کھڑی کریں ۔ چونکہ جزیہ دفاعی ذمہ داریوں کے عوض لیا جاتا ہے اس لیے جو غیر مسلم قوم دفاعی خدمات کی ذمہ داری خود قبول کر لے اس سے جزیہ نہیں لیا جاتا۔ اس کی متعدد مثالیں تاریخ اسلام میں موجود ہیں جنھیں ہم آئندہ بیان کریں گے۔ افسوس کہ آج مغربی اقوام جزیے کو بدنام کرنے اور اسے ذلت کی نشانی ثابت کرنے کے لیے ایڑی چوٹی کا زور لگا رہی ہیں جبکہ ان کا اپنا یہ حال ہے کہ وہ فتح کے بعد مفتوح قوم سے اپنا سارا جنگ کا خرچہ بطور تاوان وصول کرتے ہیں پچھلی چند صدیوں سے تو تاوان جنگ کے علاوہ سیاسی اور اقتصادی غلامی پر بھی مفتوح اقوام کو مجبور کیا جا رہا ہے البتہ دوسری جنگ عظیم کے بعد سیاسی غلامی کے بجائے اقتصادی غلامی کے بندھن مضبوط کر دیے ہیں تاکہ مفتوح قوم میں دوبارہ اٹھنے کی سکت ہی باقی نہ رہے۔اس کے برعکس اسلام نے جزیے کی ادائیگی کے بعد نہ تاوان جنگ عائد کرنے کی اجازت دی ہے اور نہ کسی طرح کی اقتصادی غلامی ہی میں جکڑنے کو جائز قراردیا ہے لہٰذا ضروری ہے کہ ہم جزیے کے متعلق چند ایک اسلامی ہدایات کا ذکر کریں تاکہ حقیقت حال مکمل کھل کر سامنے آجائے۔  1۔جزیہ صرف ان افراد سے وصول کیا جاتا ہے جو لڑنے کے قابل ہوں۔ اس کے برعکس بچے بوڑھے عورتیں معذور افراد صوفی اور گوشہ نشیں قسم کے لوگ اس سے مستثنیٰ ہوتے ہیں۔2۔جزیہ لوگوں کی مالی حالت کو مدنظر رکھتے ہوئے عائد کیا جاتا ہے جیسا کہ آئندہ سفیان کے حوالے سے امام مجاہد کی وضاحت ذکر ہوگی۔3۔جزیے کی وصولی میں انتہائی نرمی اختیار کی جاتی اور اس بات کا خاص خیال رکھا جاتا ہے کہ جزیے کی شرح ایسی ہو جسے لوگ آسانی سے ادا کر سکیں اور اس کی وصولی میں کسی شخص پر ظلم یا زیادتی نہ کی جائے۔4۔ اسلام میں جزیے کی دو قسمیں ہیں ایک جزیے صلح ، اس سے مراد وہ مال ہے جس پر مصالحت ہوئی ہو اور دوسری جزیہ چیز، جو صلح کے بغیر امام وقت کی صوابدید سے طے ہو۔اس میں کسی کی تنگی کی وجہ سے کمی نہ کی جائے اور نہ کسی کی مال داری کے پیش نظر اس میں اضافہ ہی کیا جائے۔ بہر حال جزیہ اقتداراسلام کو تسلیم کرنے کی غرض سے ہے ورنہ خراج اور جزیہ وصول کرنا اسلام کا ہر گز مقصد نہیں ہے۔ حضرت عمر بن عبدالعزیز نے خراسان کے عامل جراح بن عبداللہ کو اس لیے معطل کردیا تھا کہ انھوں نے جزیے کی مقدار کم دیکھ کر نو مسلم حضرات سے کہا تھا کہ تم نے جزیے سے بچنے کے لیے اسلام قبول کیا ہے۔ جب یہ بات حضرت    عمر بن عبدالعزیز رحمۃ اللہ علیہ  تک پہنچی تو انھوں نے عامل کو معزول کرتے ہوئے ایک بات کہی جو سونے کے پانی سے لکھنے کے قابل ہے۔آپ نے فرمایا:رسول اللہ صلی اللہ علیہ وسلم  اس دنیا میں دعوت حق کے لیے بھیجے گئے تھے۔آپ خراج وجزیہ وصول کرنے والے بنا کر نہیں بھیجے گئے۔(البدایۃ والنھایۃ 188/9)٭٭جزیے کے متعلق کئی مباحث ہیں،مثلاً:©۔جزیہ کس سے لیا جائے؟©۔اس کی کتنی قسمیں ہیں؟©۔یہ کب اور کتنا واجب ہے؟©۔جزیہ کب ساقط ہوتا ہے؟©۔مال جزیہ کا مصرف کیا ہو؟©۔اہل ذمہ کے کیا حقوق ہیں؟©۔ان کے حقوق پورے نہ کرناکس قدر سنگین جرم ہے؟©۔ذمی جب سنگین جرم کا ارتکاب کرے تو اس کے ساتھ کیا سلوک کیا جائے؟اسی طرح کفار سے مصالحت کی بھی کئی قسمیں ہیں اور اس کے متعلق متعدد احکام ومسائل ہیں۔امام بخاری رحمۃ اللہ علیہ  نے ان تمام مسائل کو بیان کرنے کے لیے مذکورہ بالا عنوان قائم کیا ہے اور اس کے لیے تقریباً چونتیس متصل احادیث کا انتخاب فرمایا ہے۔مرفوع احادیث کے علاوہ متعدد  صحابہ کرام رضوان اللہ عنھم اجمعین  اور تابعین رحمۃ اللہ علیہ  کے اقوال وآثار کا بھی حوالہ دیاہے۔پھر ان احادیث وآثارپربائیس چھوٹے چھوٹے عنوان قائم کیے ہیں جن سے امام بخاری رحمۃ اللہ علیہ  کی باریک بینی کا پتہ چلتا ہے۔قارئین کرام سے درخواست ہے کہ وہ ہماری پیش کردہ گزارشات کو ضرور ملحوظ خاطر رکھیں۔اللہ تعالیٰ ہم سب کو خدام حدیث کے ہمراہ اُٹھائے اوررسول اللہ صلی اللہ علیہ وسلم  کے جھنڈے تلے جمع فرمائے۔آمین یا رب العالمین

تمہید باب عربی

×

تمہید کتاب عربی

×