التخريج

قسم الحديث (القائل): قدسی ، اتصال السند: متصل ، قسم الحديث: قولی

‌صحيح البخاري: كِتَابُ تَفْسِيرِ القُرْآنِ (قَوْلِ اللَّهِ: {وَعَلَّمَ آدَمَ الأَسْمَاءَ كُلَّهَا} [البقرة: 31])

حکم : أحاديث صحيح البخاريّ كلّها صحيحة 

4476. حَدَّثَنَا مُسْلِمُ بْنُ إِبْرَاهِيمَ حَدَّثَنَا هِشَامٌ حَدَّثَنَا قَتَادَةُ عَنْ أَنَسٍ رَضِيَ اللَّهُ عَنْهُ عَنْ النَّبِيِّ صَلَّى اللَّهُ عَلَيْهِ وَسَلَّمَ ح و قَالَ لِي خَلِيفَةُ حَدَّثَنَا يَزِيدُ بْنُ زُرَيْعٍ حَدَّثَنَا سَعِيدٌ عَنْ قَتَادَةَ عَنْ أَنَسٍ رَضِيَ اللَّهُ عَنْهُ عَنْ النَّبِيِّ صَلَّى اللَّهُ عَلَيْهِ وَسَلَّمَ قَالَ يَجْتَمِعُ الْمُؤْمِنُونَ يَوْمَ الْقِيَامَةِ فَيَقُولُونَ لَوْ اسْتَشْفَعْنَا إِلَى رَبِّنَا فَيَأْتُونَ آدَمَ فَيَقُولُونَ أَنْتَ أَبُو النَّاسِ خَلَقَكَ اللَّهُ بِيَدِهِ وَأَسْجَدَ لَكَ مَلَائِكَتَهُ وَعَلَّمَكَ أَسْمَاءَ كُلِّ شَيْءٍ فَاشْفَعْ لَنَا عِنْدَ رَبِّكَ حَتَّى يُرِيحَنَا مِنْ مَكَانِنَا هَذَا فَيَقُولُ لَسْتُ هُنَاكُمْ وَيَذْكُرُ ذَنْبَهُ فَيَسْتَحِي ائْتُوا نُوحًا فَإِنَّهُ أَوَّلُ رَسُولٍ بَعَثَهُ اللَّهُ إِلَى أَهْلِ الْأَرْضِ فَيَأْتُونَهُ فَيَقُولُ لَسْتُ هُنَاكُمْ وَيَذْكُرُ سُؤَالَهُ رَبَّهُ مَا لَيْسَ لَهُ بِهِ عِلْمٌ فَيَسْتَحِي فَيَقُولُ ائْتُوا خَلِيلَ الرَّحْمَنِ فَيَأْتُونَهُ فَيَقُولُ لَسْتُ هُنَاكُمْ ائْتُوا مُوسَى عَبْدًا كَلَّمَهُ اللَّهُ وَأَعْطَاهُ التَّوْرَاةَ فَيَأْتُونَهُ فَيَقُولُ لَسْتُ هُنَاكُمْ وَيَذْكُرُ قَتْلَ النَّفْسِ بِغَيْرِ نَفْسٍ فَيَسْتَحِي مِنْ رَبِّهِ فَيَقُولُ ائْتُوا عِيسَى عَبْدَ اللَّهِ وَرَسُولَهُ وَكَلِمَةَ اللَّهِ وَرُوحَهُ فَيَقُولُ لَسْتُ هُنَاكُمْ ائْتُوا مُحَمَّدًا صَلَّى اللَّهُ عَلَيْهِ وَسَلَّمَ عَبْدًا غَفَرَ اللَّهُ لَهُ مَا تَقَدَّمَ مِنْ ذَنْبِهِ وَمَا تَأَخَّرَ فَيَأْتُونِي فَأَنْطَلِقُ حَتَّى أَسْتَأْذِنَ عَلَى رَبِّي فَيُؤْذَنَ لِي فَإِذَا رَأَيْتُ رَبِّي وَقَعْتُ سَاجِدًا فَيَدَعُنِي مَا شَاءَ اللَّهُ ثُمَّ يُقَالُ ارْفَعْ رَأْسَكَ وَسَلْ تُعْطَهْ وَقُلْ يُسْمَعْ وَاشْفَعْ تُشَفَّعْ فَأَرْفَعُ رَأْسِي فَأَحْمَدُهُ بِتَحْمِيدٍ يُعَلِّمُنِيهِ ثُمَّ أَشْفَعُ فَيَحُدُّ لِي حَدًّا فَأُدْخِلُهُمْ الْجَنَّةَ ثُمَّ أَعُودُ إِلَيْهِ فَإِذَا رَأَيْتُ رَبِّي مِثْلَهُ ثُمَّ أَشْفَعُ فَيَحُدُّ لِي حَدًّا فَأُدْخِلُهُمْ الْجَنَّةَ ثُمَّ أَعُودُ الرَّابِعَةَ فَأَقُولُ مَا بَقِيَ فِي النَّارِ إِلَّا مَنْ حَبَسَهُ الْقُرْآنُ وَوَجَبَ عَلَيْهِ الْخُلُودُ قَالَ أَبُو عَبْد اللَّهِ إِلَّا مَنْ حَبَسَهُ الْقُرْآنُ يَعْنِي قَوْلَ اللَّهِ تَعَالَى خَالِدِينَ فِيهَا

مترجم:

4476.

حضرت انس ؓ سے روایت ہے، وہ نبی ﷺ سے بیان کرتے ہیں کہ آپ نے فرمایا: ’’قیامت کے دن سب لوگ جمع ہو کر مشورہ کریں گے کہ آج ہم اپنے پروردگار کے حضور کسی کو سفارش بنائیں، چنانچہ وہ حضرت آدم ؑ کے پاس آ کر عرض کریں گے: آپ لوگوں کے باپ ہیں اور اللہ تعالٰی نے آپ کو اپنے ہاتھ سے پیدا کیا اور تمام فرشتوں سے سجدہ کروایا، نیز آپ کو تمام نام سکھائے، لہذا آپ اپنے پروردگار کے حضور ہماری سفارش کریں کہ وہ ہمیں اس (تکلیف دہ) جگہ سے (نکال کر) راحت و آرام دے۔ وہ کہیں گے: آج میں اس قابل نہیں ہوں اور وہ اپنا گناہ یاد کر کے اللہ سے شرمائیں گے اور کہیں گے: تم حضرت نوح ؑ کے پاس چلے جاؤ۔ انہیں اللہ تعالٰی نے سب سے پہلے رسول بنا کر اہل زمین کی طرف بھیجا تھا۔ سب لوگ ان کے پاس آئیں گے تو وہ جواب دیں گے کہ آج میں اس قابل نہیں ہوں۔ وہ بھی اپنا گناہ یاد کر کے شرمائیں گے کہ انہوں نے اپنے رب سے ایک ایسا سوال کیا تھا جس کے متعلق انہیں کوئی علم نہ تھا۔ پھر وہ کہیں گے: تم سب خلیل الرحمٰن (ابراہیمؑ) کے پاس جاؤ۔ لوگ ان کی خدمت میں حاضر ہوں گے لیکن وہ بھی یہی کہیں گے کہ میں اس قابل نہیں ہوں۔ تم سب حضرت موسٰی ؑ کے پاس جاؤ۔ ان سے اللہ تعالٰی نے کلام فرمایا تھا اور انہیں تورات عطا فرمائی تھی۔ لوگ ان کے پاس آئیں گے لیکن وہ عذر کر دیں گے کہ مجھ میں اتنی ہمت نہیں۔ انہیں ایک شخص کا قتل ناحق یاد آئے گا اور انہیں اپنے رب کے حضور جاتے ہوئے شرم دامن گیر ہو گی۔ وہ کہیں گے: تم حضرت عیسٰی ؑ کے پاس جاؤ، وہ اللہ کے بندے، اس کے رسول، نیز اللہ کا کلمہ اور اس کی روح ہیں۔ حضرت عیسٰی ؑ بھی یہی کہیں گے: مجھ میں اس کی ہمت نہیں۔ تم سب حضرت محمد ﷺ کے پاس جاؤ وہ اللہ کے برگزیدہ بندے ہیں۔ اللہ تعالٰی نے ان کے تمام اگلے پچھلے گناہ معاف کر دیے ہیں، چنانچہ لوگ میرے پاس آئیں گے۔ میں ان کے ساتھ جاؤں گا اور اپنے رب سے اجازت طلب کروں گا تو مجھے اجازت مل جائے گی۔ پھر میں اپنے رب کو دیکھتے ہی سجدہ ریز ہو جاؤں گا اور جب تک اللہ چاہے گا میں سجدے میں رہوں گا۔ پھر مجھ سے کہا جائے گا: اپنا سر اٹھاؤ اور جو چاہو مانگو۔ تمہیں دیا جائے گا۔ جو چاہو کہو۔ تمہاری بات سنی جائے گی۔ سفارش کرو، تمہاری سفارش قبول کی جائے گی۔ اس وقت میں اپنا سر اٹھاؤں گا اور جیسے اللہ تعالٰی نے مجھے تعلیم دی ہو گی ویسے ہی اس کی حمد و ثنا بجا لاؤں گا۔ پھر میں سفارش کروں گا تو میرے لیے ایک حد مقرر کر دی جائے گی۔ میں انہیں جنت میں داخل کر آؤں گا۔ پھر دوبارہ اللہ کے حضور آؤں گا تو اپنے رب کو پہلے کی طرح دیکھوں گا اور سفارش کروں گا۔ اس مرتبہ پھر میرے لیے ایک حد مقرر کر دی جائے گی۔ میں انہیں جنت میں داخل کر آؤں گا۔ پھر تیسری مرتبہ کے بعد جب میں چوتھی مرتبہ واپس آؤں گا تو عرض کروں گا کہ اب جہنم میں ان لوگوں کے علاوہ اور کوئی باقی نہیں رہا جن کا قرآن نے ہمیشہ کے لیے جہنم میں رہنا ضروری قرار دے دیا ہے۔‘‘ ابو عبداللہ (امام بخاری ؒ) کہتے ہیں کہ قرآن کی رو سے دوزخ میں بند رہنے سے مراد وہ لوگ ہیں جن کے لیے (خَالِدِينَ فِيهَا) کہا گیا ہے کہ وہ جہنم میں ہمیشہ رہیں گے۔

×
حدیث ترجمہ:

ہم سے مسلم بن ابراہیم نے بیان کیا، کہا ہم سے ہشام دستوائی نے بیان کیا، کہا ہم سے قتادہ نے بیان کیا، ان سے انس بن مالک ؓ نے نبی کریم ﷺ سے (دوسری سندی) اور مجھ سے خلیفہ بن خیاط نے بیان کیا، کہا ہم سے یزید بن زریع نے بیان کیا، کہا ہم سے سعید نے بیا ن کیا، ان سے قتادہ نے اور ان سے انس ؓ نے کہ نبی کریم ﷺ نے فرمایا، مومنین قیامت کے دن پر یشان ہو کر جمع ہوں گے اور (آپس میں) کہیں گے۔ بہتر یہ تھا کہ اپنے رب کے حضور میں آج کسی کو ہم اپنا سفارشی بناتے۔ چنانچہ سب لوگ حضرت آدم ؑ کی خدمت میں حاضر ہونگے اور عرض کریں گے کہ آپ انسانوں کے باپ ہیں۔ اللہ تعا لی نے آپ کو اپنے ہاتھ سے بنایا۔ آپ کے لیے فرشتوں کو سجدہ کا حکم دیا اورآپ کو ہر چیز کے نام سکھائے۔ آپ ہمارے لیے اپنے رب کے حضور میں سفارش کردیں تاکہ آج کی مصیبت سے ہمیں نجات ملے۔ آدم ؑ کہیں گے، میں اس کے لائق نہیں ہوں، وہ اپنی لغزش کو یاد کریں گے اور ان کو پروردگار کے حضور میں جانے سے شرم آئے گی۔ کہیں گے کہ تم لوگ نوح ؑ کے پاس جاؤ۔ وہ سب سے پہلے نبی ہیں جنہیں اللہ تعالیٰ نے (میرے بعد) زمین والوں کی طرف مبعوث کیا تھا۔ سب لوگ نوح ؑ کی خدمت میں حاضر ہوں گے۔ وہ بھی کہیں گے کہ میں اس قابل نہیں اور وہ اپنے رب سے اپنے سوال کو یاد کریں گے جس کے متعلق انہیں کوئی علم نہیں تھا۔ ان کو بھی شرم آئے گی اور کہیں گے کہ اللہ کے خلیل ؑ کے پاس جاؤ۔ لوگ ان کی خدمت میں حاضر ہوں گے لیکن وہ بھی یہی کہیں گے کہ میں اس قابل نہیں، موسیٰ ؑ کے پاس جاؤ، ان سے اللہ تعالیٰ نے کلام فرمایا تھا اور تورات دی تھی۔ لوگ ان کے پاس آئیں گے لیکن وہ بھی عذر کر دیں گے کہ مجھ میں اس کی جرات نہیں۔ ان کو بغیر کسی حق کے ایک شخص کو قتل کرنا یاد آ جائے گا اور اپنے رب کے حضور میں جاتے ہوئے شرم دامن گیر ہوگی۔ کہیں گے تم عیسیٰ ؑ کے پاس جاؤ، وہ اللہ کے بندے اور اس کے رسول، اس کا کلمہ اور اس کی روح ہیں لیکن عیسیٰ ؑ بھی یہی کہیں گے کہ مجھ میں اس کی ہمت نہیں، تم حضرت محمدﷺ کے پاس جاؤ، وہ اللہ کے مقبول بندے ہیں اور اللہ نے ان کے تمام اگلے اور پچھلے گناہ معاف کردئیے ہیں۔ چنانچہ لوگ میرے پاس آئیں گے، میں ان کے ساتھ جاؤں گا اور اپنے رب سے اجازت چاہوں گا۔ مجھے اجازت مل جائے گی، پھر میں اپنے رب کو دیکھتے ہی سجدہ میں گر پڑوں گا اور جب تک اللہ چاہے گا میں سجدہ میں رہوں گا، پھر مجھ سے کہا جائے گا کہ اپنا سر اٹھاؤ اور جو چاہو مانگو، تمہیں دیا جائے گا، جو چاہو کہو تمہاری بات سنی جائے گی۔ شفاعت کرو، تمہاری شفاعت قبول کی جائے گی۔ میں اپنا سر اٹھاؤں گا اور اللہ کی وہ حمد بیان کروں گا جو مجھے اس کی طرف سے سکھائی گئی ہوگی۔ اس کے بعد شفاعت کروں گا اور میرے لیے ایک حد مقرر کردی جائے گی۔ میں انہیں جنت میں داخل کراؤں گا چوتھی مرتبہ جب میں واپس آؤں گا تو عرض کروں گا کہ جہنم میں ان لوگوں کے سوا اور کوئی اب باقی نہیں رہا جنہیں قرآن نے ہمیشہ کے لیے جہنم میں رہنا ضروری قرار دے دیا ہے ابو عبد اللہ حضرت امام بخاریؒ نے کہا کہ قرآن کی رو سے دوزخ میں قید رہنے سے مراد وہ لوگ ہیں جن کے لیے (خَالِدِينَ فِيهَا) کہا گیا ہے۔ کہ وہ ہمیشہ دوزخ میں رہیں گے۔

حدیث حاشیہ:

باب کی حدیث میں مومنین کا آدم ؒ سے یہ کہنا مذکور ہے ''وَعَلَّمَكَ أَسْمَاءَ كُلِّ شَيْءٍ'' اسی مناسبت سے حضرت امام بخاریؒ نے اس حدیث کو یہاں ذکر فرمایا۔ آدم ؑ کو سب چیزوں کے نام سکھائے اور ان کی اولاد کے اندر ایسی قوت پیدا کردی کہ وہ دنیا میں ہر زبان کو دیکھ سکیں اورسارے اسماء کو جان سکیں۔
×
ترقیم کوڈاسم الترقيمنام ترقیمرقم الحديث (حدیث نمبر)
١.ترقيم موقع محدّث ویب سائٹ محدّث ترقیم4510
٢. ترقيم فؤاد عبد الباقي (المكتبة الشاملة)ترقیم فواد عبد الباقی (مکتبہ شاملہ)4476
٣. ترقيم العالمية (برنامج الكتب التسعة)انٹرنیشنل ترقیم (کتب تسعہ پروگرام)4116
٤. ترقيم فتح الباري (برنامج الكتب التسعة)ترقیم فتح الباری (کتب تسعہ پروگرام)4476
٥. ترقيم د. البغا (برنامج الكتب التسعة)ترقیم ڈاکٹر البغا (کتب تسعہ پروگرام)4206
٦. ترقيم شركة حرف (جامع خادم الحرمين للسنة النبوية)ترقیم حرف کمپنی (خادم الحرمین الشریفین حدیث ویب سائٹ)4284
٧. ترقيم دار طوق النّجاة (جامع خادم الحرمين للسنة النبوية)ترقیم دار طوق النجاۃ (خادم الحرمین الشریفین حدیث ویب سائٹ)4476
٨. ترقيم فؤاد عبد الباقي (دار السلام)ترقیم فواد عبد الباقی (دار السلام)4476
١٠.ترقيم فؤاد عبد الباقي (داود راز)ترقیم فواد عبد الباقی (داؤد راز)4476

الحكم على الحديث

×
اسم العالمالحكم
١. إجماع علماء المسلمينأحاديث صحيح البخاريّ كلّها صحيحة

تمہید باب

×

سورہ بقرہ  میں گائے کا ایک واقعہ بیان ہوا ہے جسے بنی اسرائیل نے ذبح کیاتھا ،اس لیے اس کا نام بقرہ ہے۔اس میں دوسوچھیاسی آیات،چھ ہزار ایک سو اکیس کلمات،پچیس ہزار پانچ سوحروف ،پندرہ امثال اور پانچ سوحکمتیں بیان ہوئی ہیں۔( عمدۃ القاری 414/12۔)

سب چیزوں کے نام سکھانے سے مراد یہ ہے کہ جن چیزوں کی ضرورت انھیں زمین میں آسکتی تھی ان کے نام بتادیے اور اس کی اولاد میں ایسی صلاحیت رکھ دی کہ وہ دنیا میں جاکر ہر زبان کو سیکھ سکیں اور اپنی اشیائے ضرورت کے نام معلوم کر سکیں۔اس سے مقصود فرشتوں پر یہ حقیقت ظاہرکرنا تھی کہ اس پتلاخاکی میں اتنی بڑی صلاحیت اور لیاقت موجود ہے کہ اگدر ہم چاہیں تو اسے تم پر برتری دے سکتے ہیں اور اسے ایسے علوم سکھائیں جن کا تمھیں علم نہیں،چنانچہ ایسا کرنے سے حضرت آدم علیہ السلام کی علمی صلاحیت اور برتری اجاگر ہوئی۔واللہ اعلم

تمہید کتاب

×

لفظ تفسیر کا مادہ ف،س،رہے جو باب ضرب اور نصر دونوں میں مستعمل ہے۔اس کے لغوی معنی ہیں:بے حجاب کرنا،ظاہرکرنا اور کھول کربیان کرنا۔کسی لفظ کی تشریح کو اس لیے تفسیر کہا جاتا ہے کہ اس کے ذریعے سے لفظ کے مطلب اور مقصود کو بے نقاب کیاجاتا ہے۔سواری کا پالان اتارکر اس کی  پیٹھ کو ننگا کرنابھی تفسیر کہلاتا ہے ۔ظاہر ہے کہ ننگا کرنے میں بھی ظاہرکرنے کامفہوم پایا جاتا ہے۔ان لغوی معنی کے پیش نظر تفسیر محسوسات اور معقولات دونوں کے کشف و اظہار کے لیے مستعمل ہے،البتہ عقلی اور مادی اشیاء کے بیان کے لیے یہ لفظ زیادہ استعمال ہوتا ہے۔تفسیر کااصطلاحی مفہوم یہ ہے کہ ایک ایسا علم جس میں قرآنی آیات کے تلفظ،ان کے اسباب نزول،نیز مکی ومدنی ،محکم ومتشابہ ،ناسخ و منسوخ،خاص وعام،مطلق ومقید،مجمل ومفسر،حلال وحرام،وعدووعید،امرونہی اور عبر وامثال وغیرہ کی وضاحت کی جاتی ہو،اس علم کی تفسیر کہا جاتا ہے۔متقدمین نے تفسیر کی شرائط ان الفاظ میں بیان کی ہیں کلام اللہ کے ایسے معانی لیے جائیں جو حقیقت یامشہورومعروف مجاز پر مبنی ہوں اورکلام اللہ کا سیاق وسباق بھی اس معنی کے مخالف نہ ہو،نیز قرون اولیٰ کے اسلاف سے وہ معنی ثابت ہوں۔اگرکسی لفظ کی تشریح میں یہ تینوں شرطیں پائی جائیں تو یہ تفسیر ہوگی۔اگردوشرطیں پائی جائیں توتاویل قریب اور اگر ایک شرط پائی جائے تو تاویل بعید ہوگی ،بصورت دیگر اس تشریح کوتحریف کا نام دیا جائے گا۔اگرچہ متقدمین کے نزدیک تفسیر اور تاویل میں کوئی فرق نہیں لیکن متاخرین نے ان دونوں میں فرق کیا ہے۔اس سلسلے میں مختلف آراء منقول ہیں۔ان کی تفصیل حسب ذیل ہیں۔*۔تفسیر بیان المراد بالفظ اور تاویل بیان المراد بالمعنی ہے،یعنی لفظ کی وضاحت کا نام تفسیر اور معنی کی وضاحت کا نام تاویل ہے۔*۔تفسیر کا تعلق نقل وروایت سے ہے جبکہ تاویل کی بنیاد عقل ودرایت ہے ۔دوسرے لفظوں میں اگر احادیث وآثار سے وضاحت کی جائے تو تفسیر کہلائے گی اوراگر اپنی سوجھ بوجھ سے معنی کا تعین اور وضاحت کی جائے تو وہ تاویل کہلائے گی۔*۔تفسیر اس تشریح کو کہتے ہیں جس میں ایک معنی کا احتمال ہو اورتاویل میں مختلف معانی کا احتمال ہوتا ہے جن میں دلائل وقرائن کے ذریعے سے ایک معنی کو اختیار کیا جاتا ہے۔*۔یقین کے ساتھ تشریح کرنے کو تفسیر اور تردد کے ساتھ وضاحت کرنے کو تاویل کہا جاتا ہے۔*۔الفاظ کے مفہوم بیان کرنے کو تفسیر اور اس مفہوم سے برآمد شدہ نتائج کو توضیح کوتاویل کہتے ہیں۔امام بخاری رحمۃ اللہ علیہ  کے نزدیک تفسیر اور تاویل دونوں مترادف(ہم معنیٰ) ہیں،ان میں کوئی فرق نہیں۔محدثین عظام نے جہاں قواعد جرح وتعدیل کے مطابق احادیث جمع کرکے ان سے مسائل واحکام کا استنباط کیا ہے وہاں انھوں نے کتاب اللہ کی تفسیر پر بھی توجہ دی ہے۔لیکن انھوں نے اصطلاحی تفسیر سے ہٹ کر صرف انھی روایات کو بیان کرنے پر اکتفا کیا ہے جو کسی حد تک قرآنی آیات سے مناسبت رکھتی ہوں کیونکہ مراد ربانی کا اظہار جزم ووثوق کے ساتھ اسی وقت ممکن ہےجب وہ مراد خودصاحب قرآن سے منقول ہویا پھر صحابہ کرام رضوان اللہ عنھم اجمعین  سے مروی ہو جونزول قرآن کے چشم دید گواہ تھے اور انھوں نے مشکلات قرآن کے فہم وادراک کے لیے رسول  اللہ صلی اللہ علیہ وسلم  سے استفادہ کیا ہو۔امام بخاری رحمۃ اللہ علیہ  چونکہ امیرالمحدثین فی الحدیث ہیں،اس لیے ان کی تفسیر متاخرین کی تفسیر کےمطابق نہیں ہے جس میں مغلقات ومشکلات کا حل ہو یا مسائل واحکام کا منظم طریقے سے استنباط واستخراج ہوبلکہ ان کے ہاں تفسیر کا عام مفہوم ہے اوراس مفہوم کو پیش نظر رکھتے ہوئے انھوں نے کتاب التفسیر میں احادیث وروایات کو جمع فرمایا۔ہم اس کتاب التفسیر کو دوحصوں میں تقسیم کرتے ہیں:الف۔تشریح مفردات قرآن۔ب۔توضیح آیات قرآن۔مفردات کی تشریح کے لیے امام بخاری  رحمۃ اللہ علیہ  نے علی بن ابو طلحہ کے صحیفے سے خوب استفادہ کیا ہے جو حضرت مجاہد رحمۃ اللہ علیہ  کے واسطے سے حضرت ا بن عباس سے مروی ہے۔یہ نسخہ حضرت لیث کے منشی ابوصالح کے پاس محفوظ تھا۔حضرت ابن عباس رضی اللہ تعالیٰ عنہ  کےعلاوہ حضرت عبداللہ بن مسعود رضی اللہ تعالیٰ عنہ  اورحضرت علی رضی اللہ تعالیٰ عنہ  سے بھی مفردات کے معانی کو نقل فرمایا ہے۔اس سلسلے میں جومعلق روایات ہیں انھیں ابن جریر طبری اور ابن ابی حاتم نے موصولاً بیان کیا ہے،نیز عکرمہ،ابوالعالیہ،زید بن اسلم،ابومیسرہ اور حضرت حسن بصری رحمۃ اللہ علیہ  کے اقوال بھی ذکر کیے ہیں۔اس حقیقت سے بھی انکار نہیں کیا جاسکتا کہ امام بخاری رحمۃ اللہ علیہ  نے مفردات کی تشریح کے متعلق بیشتر مواد ابوعبیدہ معمر بن مثنیٰ کی کتاب"مجاز القرآن"سے لیا ہے۔ابوعبیدہ معمر بن مثنیٰ عربی لغت کے بہر ماہر تھے لیکن علم حدیث میں انھیں اتنی مہارت نہ تھی۔علامہ ذہبی  رحمۃ اللہ علیہ  کہتے ہیں:ابوعبیدہ محدث نہیں تھے،میں  نے ان کاتذکرہ اسی لیے کیا ہے کہ وہ زبان اورلوگوں کی تاریخ کے متعلق وسعت علمی رکھتے تھے۔( سیر اعلام النبلاء:445/9۔) مفردات کی تشریح میں امام بخاری رحمۃ اللہ علیہ   کا اسلوب حسب ذیل ہے:©۔کسی خاص مناسبت کی بنا پر ایک سورت کے الفاظ کی تشریح کرتے ہوئے دوسری سورت کے الفاظ بھی ذکر کردیتے ہیں،مثلاً:(إِنَّ الْمُنَافِقِينَ فِي الدَّرْكِ الْأَسْفَلِ)( النساء:145/4۔)کی لغوی تشریح کرتے ہوئے(نَفَقًا) کے معنی بھی بیان کردیے ہیں جو سورۃ الانعام آیت:35 میں ہے:اسی طرح(الْقَوَاعِدَ مِنَ الْبَيْتِ )( البقرۃ:127/2۔) کی وضاحت کرتے ہوئے:(الْقَوَاعِدُ مِنَ النِّسَاءِ ) کی وضاحت بھی کردی جو سورۃ النورآیت:60  میں ہے۔©۔مفردات کی تشریح کرتے ہوئے ایک مادے سے دوسرے مادے کی طرف بھی بعض اوقات منتقل ہوجاتے ہیں،مثلاً:( إِلْحَافًا)( البقرۃ273/2۔) کی تشریح کرتے ہوئے(فَيُحْفِكُمْ) کی وضاحت بھی کردی ہے جو سورہ محمد آیت :37 میں ہے۔©۔بعض اوقات تشریح کرتے ہوئے ایک باب سے دوسرے باب  کی  طرف منتقل ہوجاتے ہیں:مثلاً(لا يَلِتْكُمْ)( الحجرات 14:49۔) کی وضاحت کرتے ہوئے(وَمَا أَلَتْنَاهُمْ) کے معنی بھی بیان کردیے ہیں جو سورہ طورآیت :21میں ہے۔اسی بناپر کہا جاتا ہے کہ امام بخاری رحمۃ اللہ علیہ  کی کتاب التفسیر"درمنشور" یعنی ایسی موتیوں کی طرح ہے جو دھاگے کے بغیر پھیلادیے گئے ہوں۔امام بخاری رحمۃ اللہ علیہ  نے توضیح آیات کے سلسلے میں مندرجہ ذیل اصولوں کو پیش نظر رکھاہے:©۔آیات میں کسی مجمل واقعے کی تفصیل احادیث سے بیان کی جاتی ہے جیسا کہ(لَئِن رَّجَعْنَا إِلَى الْمَدِينَةِ) (المنافقون 63/8۔) کے تحت حدیث :4907 میں اس کی تفصیل دیکھی جاسکتی ہے۔©۔کسی معین چیز کی کیفیت یا کمیت(مقدار) کو احادیث سے بیان کیا جاتا ہے۔الف۔(إِلَّا مَنِ اسْتَرَقَ السَّمْعَ)( الحجر 18:15۔)  کی کیفیت کو حدیث:4701 میں بیان کیا گیا ہے۔ب۔( وَظِلٍّ مَمْدُودٍ )( الواقعۃ 56:30۔)  کی کمیت،یعنی لمبائی کو حدیث: 4881 میں دیکھا جاسکتا ہے۔©۔سبب نزول کی تعین کے لیے حدیث پیش کی جاتی ہے کہ جیساکہ(إِنَّكَ لا تَهْدِي مَنْ أَحْبَبْتَ)( القصص 56:28۔) کے متعلق حدیث:4772 کو دیکھاجاسکتا ہے۔©۔شان نزول کے متعلق کسی غلطی کی اصلاح حدیث سے کی جاتی ہے جیساکہ( وَالَّذِي قَالَ لِوَالِدَيْهِ )( الاحقاف 46:17۔) کے متعلق حدیث :4827 میں موقف اختیار کیا گیا ہے۔©۔آیت سے غلط استدلال کیا تو ا س کی اصلاح کے لیے حدیث لائی جاتی ہےجیساکہ:(وَلَقَدْ رَآهُ نـزلَةً أُخْرَى )( النجم 13:53۔) میں کسی نے غلط استدلال کیاتو اس کی اصلاح حدیث:4855 سے کی گئی ہے۔©۔صفات باری تعالیٰ کو مبنی برحقیقت ثابت کرنے کےلیے حدیث کا حوالہ دیا گیا ہے جیسا کہ:(يَوْمَ يُكْشَفُ عَنْ سَاقٍ) (القلم 42:68۔)  میں صفت ساق کی وضاحت حدیث :4919 سے کی گئی ہے۔©۔حدیث کے ذریعے سے آیت کے کسی لفظ کے معنی کو متعین کیا  جاتاہے جیسا کہ (وَقُومُوا لِلَّهِ قَانِتِينَ)( البقرہ:238/2۔) میں (قَانِتِينَ)کی وضاحت حدیث :4534سے کی گئی ہے۔©۔ کسی لفظ کے معنی واضح ہوتے ہیں لیکن حدیث سے اس کی مراد کو متعین کیا جاتا ہے جیسا کہ(حَافِظُوا عَلَى الصَّلَوَاتِ وَالصَّلَاةِ الْوُسْطَىٰ)( البقرہ:238/2۔  ) میں(الْوُسْطَىٰ) کی تعین حدیث :4533 سے کی گئی ہے۔©۔دوران حادثہ میں اگرکوئی آیت تلاوت کی گئی ہوتوحدیث سے اس حادثے کی تفصیل  بیان کی جاتی ہے جیسا کہ (جَاءَ الْحَقُّ وَزَهَقَ الْبَاطِلُ)( بنی اسرائیل:81:17۔) کی تفصیل حدیث :4720 میں بیان کی گئی ہے۔©۔رسول اللہ صلی اللہ علیہ وسلم  نے کسی مسئلے کی تائید میں کسی آیت کو تلاوت فرمایا تو اس واقعے کو متعلقہ آیت کے تحت بیان کردیا گیا ہے جیسا کہ( فَهَلْ عَسَيْتُمْ إِنْ تَوَلَّيْتُمْ)( محمد۔ 22:47۔) کو حدیث :4831 میں بیان کیا گیا ہے۔©۔کسی آیت کے دوران میں رسول اللہ صلی اللہ علیہ وسلم  سے کچھ پڑھنا ثابت تھا،حدیث کے ذریعے سے اسے بیان کیا جاتا ہے  جیسا کہ(قُلْ هُوَ الْقَادِرُ عَلَى أَنْ يَبْعَثَ عَلَيْكُمْ عَذَابًا مِنْ فَوْقِكُمْ )( الانعام۔65/6۔) کی تفسیر حدیث :4628سے کی گئی ہے۔©۔بعض دفعہ کسی سورت کے اختتام پرکچھ پڑھنے کی فضیلت حدیث سے بیان کی جاتی ہے جیساکہ سورہ فاتحہ کے آخر میں آمین کہنے کی فضیلت حدیث سے بیان کی گئی ہے۔( صحیح البخاری الجھاد حدیث 780۔781۔782۔) علامہ عینی رحمۃ اللہ علیہ  نے اعتراض کیا ہے کہ باب(غَيرِ المَغضُوبِ عَلَيهِمْ وَلاَ الضَّالِّينَ) کا کوئی محل نہیں اور حدیث الباب کا  تفسیر سے کوئی تعلق نہیں ہے۔( عمدۃ القاری 106/18۔) اس تفصیل سے علامہ عینی  رحمۃ اللہ علیہ   اعتراض بھی رفع ہوجاتا ہے۔©۔قرآن کریم کے سیاق وسباق سے کسی آیت کا مفہوم متعین نہیں ہوپاتا۔امام بخاری رحمۃ اللہ علیہ  حدیث کے ذریعے سے اس کے مفہوم کو واضح کرتے ہیں جیسا کہ( وَمَا نَتَنزلُ إِلا بِأَمْرِ رَبِّكَ لَهُ مَا بَيْنَ أَيْدِينَا وَمَا خَلْفَنَا)( طبع دارالکتب العلمیۃ۔) کے مفہوم کو حدیث :4731 سے واضح کیا ہے۔©۔بعض دفعہ لفظ حدیث کے ذریعے سے لفظ قرآن کی تفسیر کی جاتی ہے تاکہ معلوم ہوجائے کہ دونوں جگہ پر ایک ہی معنی مراد ہیں جیسا کہ(وَاصْطَنَعْتُكَ لِنَفْسِي)( مریم 64:19۔) کے تحت جو حدیث بیان کی گئی ہے،اس میں یہی مفہوم کارفرما ہے۔اس آخری اصول کو تو امام بخاری رحمۃ اللہ علیہ  عام استعمال کرتے ہیں کہ حدیث میں کوئی غریب یانادرلفظ آجاتا ہے تو اس لفظ کی مناسبت سے حدیث کے آخر میں متعلقہ آیت کو بھی ذکرکردیتے ہیں جیسا کہ رسول اللہ صلی اللہ علیہ وسلم  گھڑدوڑ کے لیے ایک حد مقرر کردیتے تھے جسے عربی میں(أَمَد) کہتے ہیں۔اس مناسبت سے قرآنی آیت:(فَطَالَ عَلَيْهِمُ الْأَمَدُ ) (طہٰ:41:20۔) کو ذکر کیا ہے۔( الحدید 16:57۔)بہرحال کتاب التفسیر میں امام بخاری  رحمۃ اللہ علیہ   کا مجموعی اسلوب کچھ اس طرح ہےکہ سورت کے آغاز میں اس سورت کے منتخب الفاظ کی لغوی تشریح کی جاتی ہے۔مختلف آیات کے تحت ابواب قائم کرکے احادیث ذکر کی جاتی ہیں۔لیکن اس کا کوئی متعین اصول نہیں۔کلمہ مفردہ کی تشریح جس طرح ابتدا میں کی جاتی ہے اسی طرح چند ابواب اور احادیث ذکر کرنے کے بعد بھی کی جاتی ہے۔یوں بھی ہوتا ہے کہ ایک سورت کے کلماتِ مفردہ کی تشریح میں دوسری سورت کے کلمات کی طرف منتقل ہوجاتے ہیں۔اس انتقال میں کبھی مناسبت ہوتی ہے کبھی مناسبت کے بغیر انھیں ذکر کردیا جاتا ہے۔کلمات کی تشریح کرتے وقت کہیں کہیں جمہور کی قراءت کے بجائے دوسری قراءات بھی ذکر کی جاتی ہیں۔امام بخاری رحمۃ اللہ علیہ  کے علاوہ امام مسلم رحمۃ اللہ علیہ  نے بھی اپنی صحیح میں تفسیری روایات کو بیان کیا ہے لیکن اس میں تفسیر بہت کم ہے،اس لیے بعض حضرات نے صحیح مسلم کو جوامع میں داخل نہیں کیا۔امام ابوداود رحمۃ اللہ علیہ  نے بھی اپنی سنن میں کتاب الحروف کے عنوان سے تفسیرقرآن کا اہتمام کیا ہے ،البتہ امام ترمذی رحمۃ اللہ علیہ  نے اپنے شیخ امام بخاری رحمۃ اللہ علیہ  کے نقش قدم پر چلتے ہوئے اپنی جامع میں بہت سی تفسیری روایات بیان کی ہیں،اس بنا پر تفسیر کے اعتبار سے جامع ترمذی کو صحیح بخاری کے بعد سب سے زیادہ نفع مند شمار کیا گیا ہے۔انھوں نے امام بخاری رحمۃ اللہ علیہ  کے انداز واسلوب کو اختیار کیا ہے۔الغرض امام بخاری رحمۃ اللہ علیہ  نے کتاب التفسیر میں مختلف آیات اور سورتوں پر473 عنوان قائم کیے ہیں اور پانچ صد اڑتالیس (548) مرفوع احادیث پیش کی ہیں جن میں چار صد پینسٹھ(465) احادیث موصول اور باقی معلق ہیں۔ان میں چار  صداڑتالیس(448) احادیث مکرراورسو(100) ایسی ہیں جنھیں پہلی دفعہ ذکر کیا گیا ہے،پھر ان احادیث میں چھیاسٹھ(66) ایسی ہیں جنھیں امام مسلم رحمۃ اللہ علیہ  نے بھی روایت کیاہے۔مرفوع احادیث کے علاوہ پانچ صد اسی(580) ایسے آثار ہیں  جنھیں صحابہ کرام رضوان اللہ عنھم اجمعین  اور تابعین عظام رحمۃ اللہ علیہ  نے بیان کیا ہے۔واضح رہے کہ کتاب التفسیر میں امام بخاری رحمۃ اللہ علیہ  کے اسلوب پر یہ مختصر تبصرہ ہماراحاصل مطالعہ ہے۔اس میں ان اعتراضات کا جواب بھی مل جائے گا جو تفسیر قرآن کے سلسلے میں امام بخاری رحمۃ اللہ علیہ  پر اپنوں اور بیگانوں کی  طرف سے کیے گئے ہیں۔قارئین کرام سے گزارش ہے کہ وہ ہماری معروضات کو پیش نظر رکھتے ہوئے کتاب التفسیر کا مطالعہ کریں۔

تمہید باب عربی

×

تمہید کتاب عربی

×