جامع ترمذی: كتاب: حدود وتعزیرات سے متعلق احکام ومسائل (باب: حد میں سفارش کرنا مکروہ ہے​)

ترجمۃ الباب:

1430.

ام المومنین عائشہ‬ ؓ س‬ے روایت ہے کہ قریش قبیلہ ٔبنو مخزوم کی ایک عورت۱؎ کے معاملے میں جس نے چوری کی تھی، کافی فکر مند ہوئے، وہ کہنے لگے: اس کے سلسلے میں رسول اللہ ﷺ سے کون گفتگو کرے گا؟ لوگوں نے جواب دیا: رسول اللہ ﷺ کے چہیتے اسامہ بن زید کے علاوہ کون اس کی جرأت کر سکتا ہے؟ چنانچہ اسامہ نے آپ سے گفتگو کی تو رسول اللہ ﷺ نے فرمایا: ’’کیا تم اللہ کی حدود میں سے ایک حد کے بارے میں سفارش کررہے ہو؟‘‘ پھر آپﷺ کھڑے ہوئے اور خطبہ دیتے ہوئے آپﷺ نے فرمایا: ’’لوگو! تم سے پہلے کے لوگ اپنی اس روش کی بنا پر ہلاک ہوئے کہ جب کوئی اعلیٰ خاندان کا شخص چوری کرتا تو اسے چھوڑ دیتے، اور جب کمزورحال شخص چوری کرتا تو اس پر حد جاری کرتے، اللہ کی قسم! اگر محمد کی بیٹی فاطمہ چوری کرتی تو میں اس کا (بھی) ہاتھ کاٹ دیتا‘‘۲؎۔
امام ترمذی کہتے ہیں:
۱۔ عائشہ‬ ؓ ک‬ی حدیث حسن صحیح ہے۔
۲۔ اس باب میں مسعود بن عجماء، ابن عمر اورجابر ؓ سے بھی احادیث آئی ہیں۔
۳۔ مسعود بن عجماء کو مسعودبن اعجم بھی کہا جاتا ہے، ان سے صرف یہی ایک حدیث آئی ہے۔