جامع ترمذی: كتاب: قرآن کریم کی تفسیر کے بیان میں (باب: سورہ نساء کی تفسیر)

ترجمۃ الباب:

3033.

سہل بن سعد رضی الله عنہ کہتے ہیں: میں نے مروان بن حکم کو مسجد میں بیٹھا ہوا دیکھا تو میں بھی آگے بڑھ کر ان کے پہلو میں جا بیٹھا انہوں نے ہمیں بتایا کہ زید بن ثابت رضی الله عنہ نے انہیں خبر دی ہے کہ نبی اکرم صلی الله علیہ وسلم نے انہیں املا کرایا ﴿لَا يَسْتَوِيْ الْقَاعِدُوْنَ مِنَ الْمُوْمِنِيْنَ وَ المُجَاهِدُونَ فِي سَبِيلِ اللهِ﴾ (گھروں میں بیٹھ رہنے والے مسلمان، اور اللہ کی راہ میں جہاد کرنے والے دونوں برابر نہیں ہو سکتے) اسی دوران ابن ام مکتوم آپ صلی الله علیہ وسلم کے پاس آ پہنچے اور آپﷺ اس آیت کا ہمیں املا کرا رہے تھے، انہوں نے کہا: اللہ کے رسول! قسم اللہ کی، اگر میں جہاد کی طاقت رکھتا تو ضرور جہاد کرتا، وہ نابینا شخص تھے، اس پر اللہ تعالیٰ نے اپنے رسول ﷺ پر آیت ﴿غَيْرُ أُوْلِيْ الضَّرَرِ﴾ نازل فرمائی اور جس وقت یہ آیت نازل ہوئی اس وقت آپﷺ کی ران (قریب بیٹھے ہونے کی وجہ سے) میری ران پر تھی، وہ (نزول وحی کے دباؤ سے) بوجھل ہو گئی، لگتا تھا کہ میری ران پِس جائے گی۔ پھر (جب نزول وحی کی کیفیت ختم ہو گئی) تو آپﷺ کی پریشانی دور ہو گئی۔
امام ترمذی کہتے ہیں:
۱۔ یہ حدیث حسن صحیح ہے۔
۲۔ اسی طرح کئی راویوں نے زہری سے اور زہری نے سہل بن سعد رضی الله عنہ سے روایت کی ہے۔
۳۔ معمر نے زہری سے یہ حدیث قبیصہ بن ذویب کے واسطہ سے، قبیصہ نے زید بن ثابت سے روایت کی ہے، اور اس حدیث میں ایک روایت رسول اللہ صلی الله علیہ وسلم کے ایک صحابی کی ایک تابعی سے ہے، روایت کیا ہے سہل بن سعد انصاری (صحابی) نے مروان بن حکم (تابعی) سے۔ اور مروان نے رسول اللہ صلی الله علیہ وسلم سے نہیں سنا ہے، وہ تابعی ہیں۔