جامع ترمذی: كتاب: روزے کے احکام ومسائل (باب: صائم کی فضیلت کا بیان جب اس کے پاس کھایا جائے​)

ترجمۃ الباب:

785.

ام عمارہ بنت کعب انصاریہ‬ ؓ ک‬ہتی ہیں کہ نبی اکرم ﷺ ان کے پاس آئے، انہوں نے آپ کو کھانا پیش کیا، تو آپ نے فرمایا: ’’تم بھی کھاؤ‘‘، انہوں نے کہا: میں روزے سے ہوں تو رسول اللہ ﷺ نے فرمایا: ’’صائم کے لیے فرشتے استغفار کرتے رہتے ہیں، جب اس کے پاس کھایا جاتا ہے جب تک کہ کھانے والے فارغ نہ ہو جائیں‘‘۔ بعض روایتوں میں ہے ’’جب تک کہ وہ آسودہ نہ ہو جائیں‘‘۔
امام ترمذی کہتے ہیں:
۱- یہ حدیث حسن صحیح ہے۔
۲- اور یہ شریک کی (اوپر والی) حدیث سے زیادہ صحیح ہے۔