٭لغوی معنی :لغت میں بیع سے مراد [مقابلة الشى ء بالشىء]’’ایک چیز کے مقابلے میں دوسری چیز لینا‘‘ہے۔٭صطلاحی تعریف :بیع کی اصطلاحی تعریف یوں کی گئی ہے :[هو مبادلة المال باالتراضى]’’بخوبی مال کے بدلے مال لینا بیع کہلاتا ہے ۔‘‘٭تجارت کی مشروعیت:تجارت کی مشروعیت قرآن و سنت سے ثابت ہے اللہ تعالیٰ کا ارشاد ہے (وَأَحَلَّ اللَّهُ الْبَيْعَ وَحَرَّمَ الرِّبَا)(البقرہ:2/275)’’اللہ نے بیع کو حلال اور سود کو حرام قرار دیا ہے۔‘‘رسول اکرم ﷺ کے فرامین مبارکہ اور اسوۂ حسنہ سے اس کی مشروعیت ثابت ہے ‘مثلاً:آپ نے فرمایا[لا يبيع حاضر لباد]صحيح البخارى ، الشروط، باب ما يجوز من الشروط فى النكاح ، حديث :2723)’’شہری و دیہاتی کے لیے بیع نہ کرے۔‘‘نیز فرمایا:[التاجر الصدوق الامين مع النبين والصديقين والشهداء](جامع الترمذى،البيوع ،باب ماجاء فى التجار وتسمية النبى  إياهم ،حديث:1209)’’امانت دار سچا تاجر انبیائے کرام‘صدیقین اور شہداء کے ساتھ ہوگا۔‘‘٭تجارت کی حکمت:تجارت مشروعیت میں بنی نوع انسان کی ضروریات زندگی کو مد نظر رکھا گیا ہے کہ وہ بلا نقصان پہنچائے مہیا ہوتی رہیں۔٭تجارت کے ارکان :بیع و تجارت کے مندرجہ ذیل چار ارکان ہیں:(1)بائع:بیچنے والا‘اس کے لیے لازم ہے کہ چیز اس کی ملکیت ہو‘ نیز وہ معاملہ فہم اور اور عقلمند ہو۔(2)مشتری :خریدنے والا‘خریدار کے لیے بھی ضروری ہے کہ وہ عقد و تصرف کرنے اہلیت رکھتا ہو۔(3)مبیع:بیچی جانے والی چیز ‘جو چیز بیچی جارہی ہے وہ حلال ہو اور اس کی قیمت بھی حلال ہو۔(4)الفاظ عقد:ایجاب و قبول ‘مثلاً: شخص کہے کہ میں یہ چیز رقم کے عوض بیچتا ہوں اور دوسرا کہے کہ میں خریدتا ہوں۔٭تجارت کی بعض ممنوع اقسام:(1)ایک مسلمان کی بیع پر بیع کرنا‘ یا اس کے سود ا کرنا حرام ہے ۔(2)بیع بخش:گاہک کو دھو کا دینے کے لیے بڑھ چڑھ کر لولی لگانا۔(3)حرام اور ناپاک چیزوں کی تجارت ‘مثلاً: شراب اور سود وغیرہ۔(4)دھوکے کی تجارت ‘جیسے تالاب میں موجود مچھلیوں کی تجارت ۔(5)غیرموجود چیزوں کی تجارت ۔(6)قرض کے ساتھ قرض کی تجارت۔(7)بیع العینہ: ایک آدمی ایک چیز مقرر قیمت پر ایک مقرر تک کے لیے فروخت کرے‘ پھر جب میعاد مقرر مکمل ہو جائے اور وہ رقم ادا نہ کر سکے تو خرید ار سے وہی چیز نقد کم قیمت پر خرید لے اور خرید نے والے کو خواہ مخواہ نقصان اٹھانا پڑے۔(8)شہری کا دیہاتی کے لیے فروخت کرنا۔(9)تجارتی قافلوں کو منڈی میں آنے سے پہلے جاملنا اور سامان خرید لینا۔(10)دودھ کے ہوئے جانور کی تجارت ۔(11)بیع المخاضرہ : پھلوں اور اناج کو پکنے سے پہلے ہی کھیت میں فروخت کرنا۔(12)ان کے علاوہ آج کل کاروبار کی  اور بہت سی قسمیں ہیں جو نا جائز ہیں ۔ علمائے کرام ان کی وضاحت کرتے رہتے ہیں ۔

  شراکت‘ مالی فوائد حاصل کرنے اور اسے بڑھانے میں باہمی تعاون کا نام ہے اس طرح ایک دوسرے کے تجربات سے فائدہ اٹھایا جاتا ہے تجارت وغیرہ میں شراکت کے جواز کے دلائل کتاب وسنت میں موجود ہیں ارشاد باری تعالیٰ ہے :( وَإِنَّ كَثِيرًا مِنَ الْخُلَطَاءِ لَيَبْغِي بَعْضُهُمْ عَلَى بَعْضٍ) (ص:38۔24) ’’اور بلاشبہ اکثر حصے دار (اور شریک ایسے ہوتے ہیں کہ )ایک دوسرے پر ظلم کرتے ہیں ۔‘‘یہ آیت کریمہ شراکت کے جواز پر دلالت  کرتی اور شریک کو دوسرے شریک پر ظلم کرنے سے روکتی ہے شراکت کے جواز پر احادیت کے جواز رسول میں ایک دلیل یہ ہے کہ آپ نے فرمایا :’’اللہ تعالیٰ فرماتا ہے میں دوشریکوں (حصے داروں) کا تیسرا ہوں جب تک ان میں سے کوئی ایک دوسرے کی خیانت نہ کرے۔

جب کوئی خیانت کرتا ہے تو میں ان کے درمیان میں سے نکل جاتا ہوں ۔‘‘(سنن أبي داود ،البيوع باب في الشركة،حديث :3383)اس حديث میں جہاں شراکت کے جواز کا بیان ہے وہاں ایک دوسرے کی خیانت نہ کرنے کی بھی تاکید ہے شراکت کی شروط و قیود بھی ہیں جن میں سے ایک تو یہ ہے کہ مال شامل ہونا چاہیے حرام یا حرام کی آمیزش سے مکمل اجتناب کرنا چاہیے دوسرے اگر اموال میں خرید فروخت کی ذمے داری مسلمانوں کے ہاتھ میں ہے تو شراکت میں کافر کے حصے دار ہونے میں کوئی حرج نہیں ہے ‘اس لیے کہ اس صورت میں سودی کاروبار یا حرام مال شامل ہونے کا اندیشہ نہیں ہے اور مضاربت ضرب سے ماخوذ ہے جس کے لغوی معنی  زمین میں تجارت کی خاطر صفر کرنے کے ہیں ‘اور شرعی مفہوم یہ ہے کہ ایک شخص مال فراہم کرتا کرے اور دوسرا اس میں کاروبار کرے جبکہ منافع طے شدہ حصوں کے مطابق دونوں میں تقسیم ہو۔مضاربت کی صحت کی شرط یہ ہے کہ کام کرنے والے کا نفع میں حصہ مقرر ہو۔کاروبار کی یہ صورت بالاجماع جائز ہے کیونکہ رسول اللہﷺ کے عہد  میں مضاربت ہوتی تھی اور آپ نے اسے قائم رکھا حضرت عمر‘حضرت عثمان‘حضرت علی اور حضرت عبداللہ بن مسعود﷢ میں سے کسی نے مخالفت نہیں کی ‘نیز قیاس اور حکمت بیع بھی مضاربت کے جواز کی متقاسی ہے کیونکہ لوگوں کو اس کی ضرورت پیش آتی رہتی ہے علاوہ ازیں روپیہ پیسہ  تجارت اور کاروبار کرنے ہی سے تو بڑھتا ہے  ( مأخوذ از ملخص الفقهى مزید تفصیل کے لیے دیکھیے : الموصوعة الفقهة:38/35 والمغنى والشرح الكبير:5/14،والملخص الفقهى:2/96-106