٭مشروب کی تعریف:ہرمائع چیز جو پی جائے ‘ مشروب کہلاتی ہے ۔ اللہ تعالیٰ نے انسانوں کےلیے کھانے اور پینے کی بے شمار چیزیں پیدا کی ہیں پھر اپنی کمال رحمت سےانسانوں کےلیے مضر صحت یا مضر عقل چیزوں سے منع کر دیا ہے ۔ ان ممنوعہ حرام چیزوں کے علاوہ تمام قسم کے کھانے او رمشروبات حلال ہیں ارشاد باری تعالیٰ ہے : ﴿كُلوا  وَاشرَ‌بوا مِن رِ‌زقِ اللَّـهِ﴾(البقرہ 2 :60) اللہ کے روق سے کھاؤ پیو۔ ٭مشروبات کے چند آداب واحکام: کسی بھی مشروب کے استعمال سے پہلے یہ دیکھنا ضروری ہے کہ آیا وہ حرام تو نہیں کیونکہ ایسا مشروب جو نشہ آور ہو ‘ عقل و دانش کےلیے مضر ہو یاانسانی صحت کے لیے نقصان دہ  ہو ‘ اسے استعمال کرنا حرام ہے ‘ چنانچہ ارشاد نبوی ہے : [كل مسكر خمر ، وكل خمر حرام] ( صحيح مسلم ، الأشربة باب بيان أن كل مسكر خمر وأن كل خمر حرام، حديث :2003) ہر نشہ آور چیز شراب ہے او رہر شراب حرام ہے ۔ آپ نے شراب بنانےوالے، بنوانے والے ، پینے پلانے والے اور اس کا کاروبار اوراس میں تعاون کرنے والے پر لعنت فرمائی ہے ۔ (جامع الترمذی البیوع باب النهي ان یتخذ الخمر خلا، حدیث : 1295) 2۔مشروب پینے سے پہلے بسم اللہ اور پینے کےبعد الحمدللہ پڑھنی چاہیے۔3۔جن جانوروں کاگوشت نہیں کھایا جاتا ان کا دودھ پینا بھی حرام ہے ۔4۔تمباکو، سگریٹ ، افیون ، چرس، ہیروئن وغیرہ بھی اپنی ضرر رسانیوں کی وجہ سخت حرام ہیں۔5۔ایسا جوس یا نبیذ جس میں نشے کے اثرات پیدا ہو چکے ہیں پینا حرام ہے ۔6۔مشروب کھڑے ہو کر پینا مکروہ ہے ، البتہ بوقت ضرورت کھڑے ہو کر پیانا جائز ہے مثلاً :بیٹھے کی مناسب جگہ نہ ہو یا بارش وغیرہ کی وجہ سے ‘لیکن بیٹھ کر مشروب پینا افضل ہے ۔ 7۔مشروب کے تین سانسوں میں پینا سنت ہے ۔ سانس لینے کےلیے برتن کو منہ سے ہٹا لینا چاہیے ۔8۔اگر مشروب میں کوئی تنکا وغیرہ نظر آئے تو پھونک مارنامنع ہے ، البتہ مشروب بہا کر اسے نکالا جا سکتا ہے ۔ 9۔ اگر پینے والے کچھ افراد ہوں تو دائیں جانب سے شروع کرنا چاہیے ۔10۔ مشروب پلانے والا خودسب سے آخر میں پیئے ۔11۔ ہمیشہ دائیں ہاتھ سے مشروب پینا چاہیے کیونکہ بائیں ہاتھ سے شیطان پیتا ہے۔