التخريج

قسم الحديث (القائل): مرفوع ، اتصال السند: متصل ، قسم الحديث: قولی

‌صحيح البخاري: كِتَابُ فَضَائِلِ القُرْآنِ (بَابُ فَضْلِ سُورَةِ البَقَرَةِ)

حکم : أحاديث صحيح البخاريّ كلّها صحيحة 

5010. وَقَالَ عُثْمَانُ بْنُ الْهَيْثَمِ حَدَّثَنَا عَوْفٌ عَنْ مُحَمَّدِ بْنِ سِيرِينَ عَنْ أَبِي هُرَيْرَةَ رَضِيَ اللَّهُ عَنْهُ قَالَ وَكَّلَنِي رَسُولُ اللَّهِ صَلَّى اللَّهُ عَلَيْهِ وَسَلَّمَ بِحِفْظِ زَكَاةِ رَمَضَانَ فَأَتَانِي آتٍ فَجَعَلَ يَحْثُو مِنْ الطَّعَامِ فَأَخَذْتُهُ فَقُلْتُ لَأَرْفَعَنَّكَ إِلَى رَسُولِ اللَّهِ صَلَّى اللَّهُ عَلَيْهِ وَسَلَّمَ فَقَصَّ الْحَدِيثَ فَقَالَ إِذَا أَوَيْتَ إِلَى فِرَاشِكَ فَاقْرَأْ آيَةَ الْكُرْسِيِّ لَنْ يَزَالَ مَعَكَ مِنْ اللَّهِ حَافِظٌ وَلَا يَقْرَبُكَ شَيْطَانٌ حَتَّى تُصْبِحَ وَقَالَ النَّبِيُّ صَلَّى اللَّهُ عَلَيْهِ وَسَلَّمَ صَدَقَكَ وَهُوَ كَذُوبٌ ذَاكَ شَيْطَانٌ

مترجم:

5010.

سیدنا ابو ہریرہ ؓ سے روایت ہے، انہوں نے کہا: رسول اللہ ﷺ نے فطرانہ رمضان کی نگرانی میرے سپرد کی۔ رات کے وقت کوئی آیا اور دونوں ہاتھوں سے کھجوریں اٹھانے لگا۔ میں نے اسے پکڑ لیا اور کہا کہ تجھے رسول اللہ ﷺ کے پاس ضرور لے جاوں گا۔ پھر پوری حدیث بیان کی۔ اس (آنے والے، یعنی شیطان ) نے کہا: جب تو اپنے بستر پر سونے لگے تو آیت الکرسی پڑھ لیا کرو، اللہ کی طرف سے تیرا ایک محافط مقرر ہو جائے گا اور صبح تک شیطان تیرے قریب نہیں پھٹکے گا۔ نبی کریم ﷺ نے فرمایا: ”اس نے تجھ سے سچ کہا جبکہ وہ (شیطان) بہت بڑا جھوٹا ہے۔“

×
حدیث ترجمہ:

اور عثمان بن ہیثم نے کہا کہ ہم سے عوف بن ابی جمیلہ نے بیا ن کیا، ان سے محمد بن سیرین نے اور ان سے حضرت ابو ہریرہ ؓ نے بیان کیا کہ رسول کریم ﷺ نے مجھے صدقہ فطر کی حفاظت پر مقرر فرمایا۔ پھر ایک شخص آیا اور دونوں ہاتھوں سے (کھجوریں) سمیٹنے لگا۔ میں نے اسے پکڑ لیا اور کہا کہ میں تجھے رسول کریم ﷺ کی خدمت میں پیش کروں گا۔ پھر انہوں نے یہ پورا قصہ بیان کیا (مفصل حدیث اس سے پہلے کتاب الوکالۃ میں گزر چکی ہے) (جو صدقہ فطر چرانے آیا تھا) اس نے کہا کہ جب تم رات کو اپنے بستر پر سونے کے لئے جاؤ تو آیت الکرسی پڑھ لیا کرو، پھر صبح تک اللہ تعالیٰ کی طرف سے تمہاری حفاظت کرنے والا ایک فرشتہ مقرر ہو جائے گا اور شیطان تمہارے پاس بھی نہ آسکے گا۔ (حضرت ابو ہریرہ ؓ نے یہ بات آپ سے بیان کی تو) نبی کریم ﷺ نے فرمایا اس نے تمہیں یہ ٹھیک بات بتائی ہے اگرچہ وہ بڑا جھوٹا ہے، وہ شیطان تھا۔

حدیث حاشیہ:

سورۃ بقرہ قرآن مجید کی سب سے بڑی سورت ہے۔ بقر ہ گائے کو کہتے ہیں۔ اس سورت میں بنی اسرائیل کی ایک گائے کا ذکر ہے جسے ایک خاص مقصد کے تحت حضرت موسیٰ علیہ السلام کے حکم سے ذبح کیا گیا تھا۔ اسی گائے سے اس سورت کو موسوم کیا گیا۔ احکام و منہیات اسلام کے لحاظ سے یہ بڑی جامع سورت ہے جس کے فضائل بیان کرنے کے لئے ایک دفتر بھی نا کافی ہے۔ حضرت امام بخاری نے اس کی آخری دو آیت اور آیۃ الکرسی کی فضیلت بیان کرکے پوری سورت کے فضائل پر اشارہ فرما دیا ہے۔ وفیه کفایة لمن له درایة۔ سورہ بقرہ کی آخری دو آیتوں کے کافی ہونے کا مطلب بعض حضرات نے یہ بھی بیان کیا ہے کہ جو شخص سوتے وقت ان کو پڑھ لے گا اس کے واسطے یہ پڑھنا رات کے قیام کا بدل ہو جائے گا اور تہجد کا ثواب مل جائے گا۔ حضرت عثمان بن ہیثم والی روایت کو اسماعیل اور ابو نعیم نے وصل کیا ہے۔ حضرت ابوہریرہ رضی اللہ عنہ والا قصہ کتاب الوکالۃ میں بھی گزر چکا ہے۔ پہلے دن حضرت ابو ہریرہ رضی اللہ عنہ نے اس کی عاجزی اور محتاجی پر رحم کر کے اس کو چھوڑ دیا۔ کہنے لگا کہ میں بال بچے والا بہت ہی محتاج ہوں۔ دوسرے دن پھر آیا اور کھجوریں چرانے لگا تو حضرت ابو ہریرہ رضی اللہ عنہ نے پکڑا وہ بہت عاجزی کرنے لگا انہوں نے چھوڑ دیا۔ تیسرے دن پھر آیا اور چرانے لگا تو حضرت ابو ہریر ہ نے سختی کی اور گرفتار کرلیا۔ اس نے بہت عاجزی کی اور آخرمیں حضرت ابوہریرہ رضی اللہ عنہ کو آیۃ الکرسی کا مذکورہ وظیفہ بتلایا۔ حضرت امام بخاری رحمۃ اللہ علیہ سورۃ البقرہ کی فضیلت میں صرف یہی روایت لائے ہیں ورنہ اس سورت کی فضیلت میں اور بھی بہت سی احادیث مروی ہیں۔ قرآن پاک کی یہ سب سے بڑی سورت ہے اور مضامین کے لحاظ سے بھی یہ ایک بحر ذخار ہے سوئہ بقرہ کی آخری دو آیات ﴿آمَنَ الرَّسُولُ بِمَا أُنْزِلَ إِلَيْهِ مِنْ رَبِّهِ﴾ الخ کے بارے میں حافظ صاحب فرماتے ہیں فاقرأو ھما و علموھما أبناءکم و نساءکم فإنھما قراٰن و صلٰوة و دعاء (فتح) یعنی ان آیات کو خود پڑھو، اپنے بچوں اور عورتوں کو سکھاؤ یہ آیات مغز قرآن ہیں، یہ نماز ہیں اور یہ دعا ہیں۔
×
ترقیم کوڈاسم الترقيمنام ترقیمرقم الحديث (حدیث نمبر)
١.ترقيم موقع محدّث ویب سائٹ محدّث ترقیم5049
٢. ترقيم فؤاد عبد الباقي (المكتبة الشاملة)ترقیم فواد عبد الباقی (مکتبہ شاملہ)5010
٣. ترقيم العالمية (برنامج الكتب التسعة)انٹرنیشنل ترقیم (کتب تسعہ پروگرام)4624.02
٤. ترقيم فتح الباري (برنامج الكتب التسعة)ترقیم فتح الباری (کتب تسعہ پروگرام)5010.02
٥. ترقيم د. البغا (برنامج الكتب التسعة)ترقیم ڈاکٹر البغا (کتب تسعہ پروگرام)4723.02
٦. ترقيم شركة حرف (جامع خادم الحرمين للسنة النبوية)ترقیم حرف کمپنی (خادم الحرمین الشریفین حدیث ویب سائٹ)4812
٧. ترقيم دار طوق النّجاة (جامع خادم الحرمين للسنة النبوية)ترقیم دار طوق النجاۃ (خادم الحرمین الشریفین حدیث ویب سائٹ)5010
٨. ترقيم فؤاد عبد الباقي (دار السلام)ترقیم فواد عبد الباقی (دار السلام)5010
١٠.ترقيم فؤاد عبد الباقي (داود راز)ترقیم فواد عبد الباقی (داؤد راز)5010

الحكم على الحديث

×
اسم العالمالحكم
١. إجماع علماء المسلمينأحاديث صحيح البخاريّ كلّها صحيحة

تمہید باب

×

تمہید کتاب

×

قرآن کریم اللہ تعالیٰ کا لازوال کلام ہے،جس میں باطل کسی طرف سے راہ نہیں پاسکتا۔ارشاد باری تعالیٰ  ہے:"یہ ایک زبردست کتاب ہے جس میں باطل نہ آگے سے راہ پاسکتا ہے اور نہ پیچھے سے ،یہ دانا قابل تعریف اللہ کی طرف سے نازل شدہ ہے۔"(حٰم السجدۃ 43/41۔42)یہ کلام خود خالق کائنات کا ہے جس کا علم لامحدود ہے ۔حضرت جبرئیل علیہ السلام  کے ذریعے سے اسے نازل کیا گیا جو قوی بھی ہیں اور امین بھی۔اور جس پر نازل ہوا وہ صادق ومصدوق ہیں۔پھر اس کی حفاظت کی ذمے داری کو خود اللہ رب العزت نے اٹھائی ہے،چنانچہ نزول کے بعد اسے اوراق اور سینوں میں محفوظ کرلیا گیا،اس لیے اس قرآن میں کمی بیشی کرنے کو کسی میں ہمت نہیں ہے اور نہ باطل کسی طرف سے دخل اندازی ہی کرسکتا ہے۔پھر یہ قرآن ایمان لانے والوں کے لیے ہدایت وشفااور نہ ماننے والوں کے لیے گمراہی اور اس میں اضافے کا باعث ہے۔ارشاد باری تعالیٰ ہے:"آپ کہہ دیں ،یہ قرآن ایمان لانے والوں کے لیے ہدایت اور شفا ہے اور جو ایمان نہیں لاتے ان کے کانوں میں بوجھ اور آنکھوں  پر پٹی ہے۔"(حٰم السجدۃ 41/44)قرآن اس لیے نازل کیا گیا کہ اہل ایمان اس پر عمل کریں ،زندگی سنواریں ،آخرت بنائیں،اس کے حلال کو حلال اور اس کے حرام کوحرام سمجھیں اور اس کی تلاوت کریں تاکہ قیامت کے دن اللہ تعالیٰ کے ہاں ان کے لیے حجت اور سفارش ہو۔رسول اللہ صلی اللہ علیہ وسلم  نے فرمایا:"یہ قرآن تیرے لیے نجات کی دلیل یا تیرے خلاف حجت ہوگا۔"(صحیح مسلم الطھارۃ حدیث 534(223)جوشخص قرآن پڑھے گا اور اس پر عمل کرے گا اللہ تعالیٰ نے اس کے متعلق ضمانت دی ہے کہ وہ دنیا میں گمراہ نہیں ہوگا اور نہ آئندہ قیامت کے دن مصیبت میں ہی پڑے گا ارشاد باری تعالیٰ ہے:" جس نے میری ہدایت کی پیروی کی وہ گمراہ نہیں ہوگا اور نہ بدبخت ہی ہوگا۔"(طٰہ:20/123)اور جس نے اس سے روگردانی کی اس  کی دنیا تنگ وتاریک کردی جائے گی اور آخرت میں اسے نابینا اٹھایا جائے گا۔ارشادباری تعالیٰ ہے:" جو میرے ذکر(قرآن) سے منہ موڑ لے گا تو اس کی زندگی تنگ پڑ جائے گی اور قیامت کے دن ہم اسے اندھا کرکے اٹھائیں گے۔"(طہٰ 20/124)لہذا بندہ مسلم کو چاہیے کہ وہ قرآن مجید کے فضائل ومناقب کے ساتھ اس کے حقوق وآداب کو بھی مد نظر رکھے۔امام بخاری رحمۃ اللہ علیہ  نے امت مسلمہ کی رہنمائی کرتے ہوئے اس عظیم ذمے داری کو اٹھایا ہے اور اس کا حق ادا کیا ہے۔اگرچہ بظاہر یہ عنوان"فضائل قرآن" سے متعلق ہے لیکن امام بخاری رحمۃ اللہ علیہ  نے بہت سے عنوانات اس عنوان کے تحت بیان کیے ہیں۔اب ضرورت اس امر کی ہے کہ ہم اسے حرز جان بنائیں تاکہ ہم قیامت کے دن اللہ تعالیٰ کےحضور سرخروہوں اور قرآن کریم کی سفارش کے حق دار بن جائیں۔امام بخاری رحمۃ اللہ علیہ  نے جن مضامین کو بیان کیا ہے اس کی تفصیل حسب ذیل ہے:© نزول قرآن © جمع قرآن ©کتابت قرآن ©احرف قرآن © تالیف قرآن © فضائل قرآن © اعجاز قرآن © آداب قرآن۔آداب قرآن میں درج ذیل امور کا احاطہ کیا ہے:© تلاوت قرآن © ترتیل قرآن © حفظ قرآن © تعلیم قرآن © عمل بالقرآن © دعوتِ قرآن۔امام بخاری رحمۃ اللہ علیہ  نے اس سلسلے میں ایک کم سو(99) احادیث کا انتخاب کیاہے،جن میں اسے انیس(19) معلق اور اَسّی(80) متصل سند سے بیان کی ہیں۔ان میں تہتر(73) مکرر اور باقی خالص ہیں۔مرفوع احادیث کے علاوہ مختلف صحابہ کرام رضوان اللہ عنھم اجمعین  اور تابعین عظام رحمۃ اللہ علیہ  سے مروی سات(7) آثار بھی پیش کیے ہیں۔آپ نے ان احادیث وآثارپر تقریباً سینتیس(37) چھوٹے چھوٹے عنوان قائم کیے ہیں۔ان عنوانات کو پڑھنے کے بعد پتاچلتا ہے کہ امام بخاری رحمۃ اللہ علیہ  فقیہ امت ہی نہیں بلکہ ایک مصلح امت بھی ہیں۔اب یہ ہماری  ذمے داری ہے کہ قرآن کریم کو پڑھیں اور اس کی تعلیمات پر عمل کریں تاکہ قیامت کے دن اس کی سفارش کے حقدار بن سکیں۔حدیث میں ہے:" قرآن پڑھا کرو بے شک وہ قیامت کے دن اپنے پڑھنے والوں اور عمل کرنے والوں کے لیے سفارشی بن کرآئے گا۔"(صحیح مسلم صلاۃ المسافرین وقصرھا حدیث 1874(804)نیز رسول اللہ صلی اللہ علیہ وسلم  کا ارشادگرامی ہے:" قیامت کے دن قرآن اور ان لوگوں کو لایاجائے گا جو دنیا میں اس پر عمل کرتے تھے ،سورہ بقرہ اور سورہ آل عمران آگے آگے ہوں گی جو ان لوگوں کی نجات کے لیے اللہ کے حضور سفارش کریں گے۔"(صحیح مسلم صلاۃ المسافرین وقصرھا حدیث 1876(805)قرآن کریم نے ان لوگوں کا سخت نوٹس لیا ہے جو اسے نظر انداز کرتے ہیں۔ارشاد باری تعالیٰ ہے:"اور رسول کہیں گے:میرے رب! میری قوم کے یہی لوگ ہیں جنھوں نے اس قرآن کو چھوڑ رکھاتھا۔"(الفرقان:25/30)قرآن کریم کو چھوڑنے کی کئی قسمیں ہیں،مثلاً:اس پر ایمان نہ لانا،قرآن کی تلاوت نہ کرنا،اس کاسننا چھوڑ دینا،اس میں غور وفکر نہ کرنا،اس کی تعلیمات پر عمل نہ کرنا،اس کی دعوت نہ دینا اور اس کے مطابق فیصلے نہ کرنا۔الغرض یہ تمام قرآن چھوڑدینے کی قسمیں ہیں۔ہمیں چاہیے کہ اللہ تعالیٰ کی کتاب کے ساتھ مضبوط تعلق پیدا کریں تاکہ قیامت کے دن اللہ کے رسول صلی اللہ علیہ وسلم  کے اس استغاثے کی زدمیں نہ آئیں۔

تمہید باب عربی

×

تمہید کتاب عربی

×