التخريج

قسم الحديث (القائل): مرفوع ، اتصال السند: متصل ، قسم الحديث: قولی

‌صحيح البخاري: كِتَابُ التَّوْحِيدِ وَالرَدُّ عَلَی الجَهمِيَةِ وَغَيرٌهُم (بَابُ فِي المَشِيئَةِ وَالإِرَادَةِ: {وَمَا تَشَاءُونَ إِلَّا أَنْ يَشَاءَ اللَّهُ})

حکم : أحاديث صحيح البخاريّ كلّها صحيحة 

ترجمة الباب: وَقَوْلِ اللَّهِ تَعَالَى: {تُؤْتِي المُلْكَ مَنْ تَشَاءُ}{وَلاَ تَقُولَنَّ لِشَيْءٍ إِنِّي فَاعِلٌ ذَلِكَ غَدًا إِلَّا أَنْ يَشَاءَ اللَّهُ}{إِنَّكَ لاَ تَهْدِي مَنْ أَحْبَبْتَ وَلَكِنَّ اللَّهَ يَهْدِي مَنْ يَشَاءُ}قَالَ سَعِيدُ بْنُ المُسَيِّبِ، عَنْ أَبِيهِ: نَزَلَتْ فِي أَبِي طَالِبٍ {يُرِيدُ اللَّهُ بِكُمُ اليُسْرَ وَلاَ يُرِيدُ بِكُمُ العُسْرَ}

7473. حَدَّثَنَا إِسْحَاقُ بْنُ أَبِي عِيسَى أَخْبَرَنَا يَزِيدُ بْنُ هَارُونَ أَخْبَرَنَا شُعْبَةُ عَنْ قَتَادَةَ عَنْ أَنَسِ بْنِ مَالِكٍ رَضِيَ اللَّهُ عَنْهُ قَالَ قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ الْمَدِينَةُ يَأْتِيهَا الدَّجَّالُ فَيَجِدُ الْمَلَائِكَةَ يَحْرُسُونَهَا فَلَا يَقْرَبُهَا الدَّجَّالُ وَلَا الطَّاعُونُ إِنْ شَاءَ اللَّهُ

مترجم:

ترجمۃ الباب:

اور اللہ نے (سورۃ انفطرت میں) فرمایا ”تم کچھ نہیں چاہ سکتے جب تک اللہ نہ چاہے“ اور (سورۃ آل عمران میں) فرمایا کہ ”وہ اللہ جسے چاہتا ہے ملک دیتا ہے“ اور (سورۃ الکہف میں) فرمایا”اور تم کسی چیز کے متعلق یہ نہ کہو کہ میں کل یہ کام کرنے والا ہوں مگر یہ کہ اللہ چاہے“ اور (سورۃ قصص میں) فرمایا کہ ”آپ جسے چاہیں ہدایت نہیں دے سکتے، البتہ اللہ جسے چاہتا ہے ہدایت دیتا ہے“ سعید بن مسیب نے اپنے والد سے کہا کہ جناب ابوطالب کے بارے میں یہ آیت مذکورہ نازل ہوئی۔ اور (سورۃ البقرہ میں) فرمایا کہ ”اللہ تمہارے ساتھ آسانی چاہتا ہے اور تمہارے ساتھ تنگی نہیں چاہتا۔‘‘ تشریح:اس باب کو لانے سے امام بخاری کی غرض یہ ہے کہ مشیت اور ارادہ دونوں ثابت  کریں کیونکہ دونوں ایک ہی ہیں جب کہ  آیت قرآنی لما فعال لما یرید اور فعل اللہ مایشاء سے ثابت ہوتا ہے مذکورہ آیات سے مشیت الٰہی اور ارادہ دونوں کو ایک ہی ثابت کیا گیا ہے۔

7473.

سیدنا انس بن مالک ؓ سے روایت ہے انہوں نے کہا: رسول اللہ ﷺ نے فرمایا: ”دجال، مدینہ طیبہ کا رخ کرے گا تو فرشتوں کو اس کی حفاظت کرتے ہوئے پائے گا اس لیے اگر اللہ نے چاہا تو دجال اس کے قریب نہیں ہوسکے گا اور نہ مرض طاعون ہی اس کا رخ کرے گا۔“ 

×
ترجمۃ الباب:

ارشاد باری تعالیٰ ہے: ”تو جسے چاہے بادشاہی دیتا ہے۔“ ”اور تم وہی کچھ چاہ سکتے ہو جو اللہ چاہے۔“ ”کسی چیز کے متعلق کبھی یہ نہ کہنا کہ میں کل یہ ضرور کروں گا مگر یہ کہ اللہ چاہے۔“ ”(اے نبی!) بے شک آپ ہدایت نہیں دے سکتے جسے آپ چاہیں بلکہ اللہ ہی ہدایت دیتا ہے جس کو چاہے۔“ 


حدیث ترجمہ:

ہم سے اسحاق بن ابی عیسیٰ نے بیان کیا، انہوں نے کہا ہم کو یزید بن ہارون نے خبر دی، انہیں شعبہ نے خبر دی، انہیں قتادہ نے اور انہیں انس بن مالک ؓ نے کہ رسول اللہ ﷺ نے فرمایا دجال مدینہ تک آئے گا لیکن دیکھے گا کہ فرشتہ اس کی حفاظت کر رہے ہیں پس نہ تو دجال اس سے قریب ہو سکے گا اور نہ طاعون، اگر اللہ نے چاہا۔

حدیث حاشیہ:

اس میں بھی لفظ ان شاء اللہ کےساتھ مشیت الہی کا ذکر ہے۔ یہی باب سے مطابقت ہے اور یہ حقیقت ہے کہ ہرچیز اللہ کی مشیت پرموقوف ہے۔
×
ترقیم کوڈاسم الترقيمنام ترقیمرقم الحديث (حدیث نمبر)
١.ترقيم موقع محدّث ویب سائٹ محدّث ترقیم7541
٢. ترقيم فؤاد عبد الباقي (المكتبة الشاملة)ترقیم فواد عبد الباقی (مکتبہ شاملہ)7473
٣. ترقيم العالمية (برنامج الكتب التسعة)انٹرنیشنل ترقیم (کتب تسعہ پروگرام)6919
٤. ترقيم فتح الباري (برنامج الكتب التسعة)ترقیم فتح الباری (کتب تسعہ پروگرام)7473
٥. ترقيم د. البغا (برنامج الكتب التسعة)ترقیم ڈاکٹر البغا (کتب تسعہ پروگرام)7035
٦. ترقيم شركة حرف (جامع خادم الحرمين للسنة النبوية)ترقیم حرف کمپنی (خادم الحرمین الشریفین حدیث ویب سائٹ)7196
٧. ترقيم دار طوق النّجاة (جامع خادم الحرمين للسنة النبوية)ترقیم دار طوق النجاۃ (خادم الحرمین الشریفین حدیث ویب سائٹ)7473
٨. ترقيم فؤاد عبد الباقي (دار السلام)ترقیم فواد عبد الباقی (دار السلام)7473
١٠.ترقيم فؤاد عبد الباقي (داود راز)ترقیم فواد عبد الباقی (داؤد راز)7473

الحكم على الحديث

×
اسم العالمالحكم
١. إجماع علماء المسلمينأحاديث صحيح البخاريّ كلّها صحيحة

تمہید باب

×

امام بخاری رحمۃ اللہ علیہ نے اللہ تعالیٰ کے لیے صفت کلام کے اثبات کے دوران میں ہی مشیت و ارادے کا ذکر اس لیے کیا ہے کہ اللہ تعالیٰ نے قرآن مجید میں صفت ارادہ کو اپنی صفت کلام کے ساتھ بیان کیا ہے۔ ارشاد باری تعالیٰ ہے۔"ہم جب کسی چیز کا ارادہ کرلیتے ہیں تو اسے بس اتنا ہی کہہ دیتے ہیں کہ وہ جا تو وہ ہو جاتی ہے۔"(النحل:16۔40)مشیت اور ارادے کے ایک ہی معنی ہیں اور یہ اللہ تعالیٰ کی ذاتی صفات میں سے ہیں ارشا دباری تعالیٰ ہے۔" وہ جس چیز کا ارادہ کر لے اسے کر ڈالتا ہے۔"(البروج85۔16)دوسرے مقام پر فرمایا:""بے شک اللہ تعالیٰ ہی کرتا ہے جو وہ چاہتا ہے۔"(الحج:22۔18)اللہ تعالیٰ کا ارادہ دو طرح کا ہے۔©ارادہ کونیہ۔©ارادہ شرعیہ۔ارادہ کونیہ میں مشیت کے معنی ہوتے ہیں جیسا کہ ارشادباری تعالیٰ ہے۔" "جس شخص کو اللہ ہدایت دینا چاہے اس کا سینہ اسلام کے لیے کھول دیتا ہے اور جسے گمراہ کرنا چاہے اس کے سینے میں سخت گھٹن پیدا کردیا ہے۔"(الانعام:6/125)ارادہ شرعیہ میں محبت کے معنی پائے جاتے ہیں۔ جیسا کہ ارشاد باری تعالیٰ ہے۔"اللہ تعالیٰ چاہتا ہے کہ تمھاری تو بہ قبول کر لے۔"(النساء:27)ان دونوں میں فرق یہ ہے کہ اللہ تعالیٰ کا ارادہ کونیہ لازمی طور پر واقع ہو کر رہتا ہے اور یہ ضروری نہیں ہوتا کہ وہ ارادہ اللہ تعالیٰ کا پسندیدہ بھی ہو جبکہ ارادہ شرعیہ کا واقع ہونا ضروری نہیں لیکن اللہ تعالیٰ کا پسندیدہ ضرورہوتا ہے۔ اس کا تعلق اطاعت و معصیت سےہے۔ کائنات میں جس قدر بھی حوادثات ہوتے ہیں وہ اللہ تعالیٰ کے کونی اور قدری ارادے کے تحت ہوتے ہیں حتی کہ کفار کا کفر اور مشرکین کا شرک بھی اس کے تحت ہوتا ہے لیکن اللہ تعالیٰ اس کفرو شرک کو پسند نہیں کرتا جیسا کہ اس نے خود اس کی وضاحت کی ہے۔ ارشاد باری تعالیٰ ہے۔" اگر تم کفر کرو گے تو یقیناً اللہ تعالیٰ تم سے بے پروا ہے اور وہ اپنے بندوں کے لیے کفر پر راضی نہیں اور اگر تم شکر کرو گے تو وہ اسے تمھارے لیے پسند کرتا ہے۔"(الزمر:39۔7)امام بخاری رحمۃ اللہ علیہ نے پیش کردہ آیات میں ارادے کی دونوں قسموں کی طرف اشارہ کیا ہے چنانچہ پہلی چار آیات میں ارادہ کونیہ کا ذکر ہے جس میں اللہ تعالیٰ کی مشیت عامہ کار فرماہے اس سے کائنات کی کوئی چیز خارج نہیں اور آخری آیت میں ارادہ شرعیہ کا ذکر ہے جواللہ تعالیٰ کی رضا اور اس کی محبت پر مشتمل ہے۔

تمہید کتاب

×

دین اسلام میں سب سے زیادہ اہم فرض عقائد کی درستی ہے۔تمام انبیائے کرام علیہ السلام  نے لوگوں کو سب سے پہلے اصلاح عقیدہ کی دعوت دی۔اس کے بعد عبادات واحکام اور فرائض وواجبات کی بجاآوری ،اس کے بعد معاملات،پھر ظاہری اور باطنی اخلاق کی اصلاح کا درجہ ہے۔مذکورہ شعبہ جات کو اپنے اپنے مقام پر رکھنا بہت ضروری ہے،چنانچہ اصول وعقائد اور فرائض وواجبات میں سے کسی ایک کا انکار انسان کو دائرہ اسلام سے خارج کردیتاہے،البتہ اخلاق میں گراوٹ اور عمل میں کوتاہی سے کوئی شخص ملتِ اسلام سے  خارج نہیں ہوتا۔لغوی طور پر لفظ توحید مصدر ہے۔اس کے معنی کسی ذات کے متعلق یکتا اور منفرد ہونے کایقین کرنا ہیں۔شرعی اصطلاح میں اس بات کا اقرارویقین کرناکہ اللہ تعالیٰ اپنی ذات وصفات،الوہیت وربوبیت،عبودیت وحاکمیت اور تمام اختیارات میں یکتا ویگانہ ہے،اسے توحید کہتے ہیں۔اس توحید کی کئی قسمیں ہیں۔ان میں سے ایک انتہائی اہم قسم توحید اسماء وصفات ہے کیونکہ اللہ تعالیٰ کی کامل معرفت،اللہ تعالیٰ کے اسماء وصفات اور اس کےافعال کا ذکر دیگراحکام کے ذکر سے کہیں زیادہ ہے۔حافظ ابن قیم رحمۃ اللہ علیہ  لکھتے ہیں:"بندے کی تمام ترسعادت اللہ تعالیٰ کی ذات وصفات کی معرفت کے ساتھ قائم ہے جبکہ اسماء وصفات سے جہالت ،شقاوت وبدبختی کی بنیاد ہے۔"(مفتاح دارالسعادۃ 1/86)توحید اسماء وصفات کی اہمیت کا اندازہ اس امر سے بھی بخوبی لگایا جاسکتا ہے کہ انسان کے لیے اس وقت تک مکمل طریقے کے مطابق اللہ تعالیٰ کی عبادت ممکن نہیں جب تک اسے اللہ تعالیٰ کے اسماء وصفات کا علم نہ ہو۔اس معرفت کی بدولت وہ بڑی بصیرت کے ساتھ اللہ تعالیٰ کی عبادت کرسکتا ہے۔ارشاد باری تعالیٰ ہے:"اللہ تعالیٰ ہی کے نام سب سے اچھے ہیں۔انھی ناموں سے اسے پکارو اور ایسے لوگوں کو چھوڑ دو جو اس کے ناموں کے بارے میں سیدھے راستے سے ہٹتے ہیں۔جوکچھ وہ کرتے ہیں جلد ہی انھیں اس کا  بدلہ مل جائے گا۔"(الاعراف 7/180)اس آیت کریمہ میں اللہ تعالیٰ کے ناموں کےساتھ دعا کرنے کا حکم ہے۔اس دعا سے مراد دعائے مسئلہ اور دعائے عبادت دونوں ہیں۔دعائے مسئلہ کی صورت یہ ہے کہ جب اللہ تعالیٰ کے سامنے اپنی ضروریات وحاجت  پیش کریں تو ایسے ناموں کا واسطہ دیں جو ہماری حاجت اور ضرورت کے مناسب ہوں جبکہ دعائے عبادت یہ ہے کہ ہم ان اسماء وصفات کے تقاضوں کو مد نظر رکھتے ہوئے اس ذات کی بندگی بجالاسکیں۔اس آیت میں اللہ تعالیٰ نے ان لوگوں کی مذمت فرمائی ہے جو اس کے ناموں میں کج روی اور بےدینی کا شکار ہیں۔اس کج روی کو الحاد کہا جاتا ہے۔اس کی کچھ قسمیں حسب ذیل ہیں:©۔جو صفات اللہ تعالیٰ کے لیے خاص ہیں انھیں کسی مخلوق میں تسلیم کرنا،جیسے:وہ داتا،روزی رساں،حاجت روا،مشکل کشا اور کارساز ہے۔ان صفات کا حامل کسی مخلوق میں تسلیم کرنا،جیسے:وہ داتا،روزی رساں،حاجت روا،مشکل کشا اور کارساز ہے۔ان صفات کا حامل کسی مخلوق کو قراردینا بدترین قسم کا الحاد ہے۔©۔ان ناموں سے استدلال کرکے باطل چیزوں کے امکان پر بحث کرنا،مثلاً:اللہ تعالیٰ سب کچھ جانتا ہے،لہذا وہ جادو کا علم بھی رکھتا ہے۔وہ ہرچیز قادر ہے ،لہذا وہ جھوٹ بولنے پر بھی قدرت رکھتا ہے۔العیاذباللہ۔©۔ان صفات میں فلسفیانہ موشگافیاں پیداکرنا،جیسے:اللہ تعالیٰ کی صفات حادث ہیں یا قدیم؟کلام کرنا اللہ تعالیٰ کی صفت ہے اور قرآن اللہ تعالیٰ کا کلام ہے،یہ مخلوق ہے یا غیر مخلوق؟©۔اللہ تعالیٰ ہر جگہ موجود ہے اور ہر شخص کی شہ رگ سے بھی قریب ہے تو وہ عرش پر کیسے مستوی ہوسکتا ہے؟©۔اللہ تعالیٰ کی صفات کا سرے سے انکار کردینا جیسا کہ جہم بن صفوان نے تشبیہ کے خود ساختہ مفروضے سے بچنے کے لیے اللہ تعالیٰ کی صفات کا انکار کردیا اور کہا:اللہ تعالیٰ کوئی چیز نہیں ہے۔اس انکار کو تعطیل کہتے ہیں۔اس عقیدے کے حاملین کو مُعَطْلہ اور جَہمیہ کہا جاتا ہے۔©۔اللہ تعالیٰ کی صفات کو مخلوق کی صفات جیسی قراردینا،حالانکہ ارشاد باری تعالیٰ ہے:"کوئی چیز اس کے مشابہ نہیں اور وہی سب کچھ سننے والا،سب کچھ دیکھنے والا ہے۔"(الشوریٰ 11/42)اس عقیدے کا بانی مقاتل بن سلیمان ہے۔اس کے پیروکار مُشتَبہ کہلاتے ہیں،جو اللہ تعالیٰ کی صفات کو مخلوق کی صفات کے مشابہ قراردیتے تھے۔©۔اللہ تعالیٰ کی صفات کو جوں کا توں ماننے کے بجائے ان کے متعلق تاویلات کا سہارالینا،اللہ تعالیٰ کی صفات کے متعلق تاویل کا فتنہ تعطیل سے زیادہ خطرناک ہے کیونکہ اس کے تسلیم کرلینے سے قرآن وحدیث کے ظاہری مفہوم سے انحراف لازم آتا ہے جو بدترین تحریف ہے۔اللہ تعالیٰ کے اسماء وصفات میں الحاد کی ان تمام صورتوں نے سلف صالحین کو حیرت میں مبتلا کردیا،چنانچہ انھوں نے ان ملحدین وبے دین لوگوں کے اقوال کو یہودونصاریٰ اور مشرکین کے اقوال سے بھی زیادہ خطرناک قراردیا ہے،پھر وہ ان مزعومہ عقائد ونظریات کی تردید کے لیے کمر بستہ ہوگئے۔اس تردید کی بنیاد درج ذیل فرمان نبوی ہے:"جس نے ہمارے دین میں کوئی نئی چیز  ایجاد کی وہ تردید کے قابل ہے۔"(صحیح البخاری الصلح حدیث 2697)چنانچہ امام بخاری رحمۃ اللہ علیہ  نے کتاب الایمان میں مرجیہ،کتاب القدر میں تقدیر کے منکرین قدریہ،کتاب الفتن اور کتاب الاحکام میں خوارج وروافض اور آخر میں جہمیہ ،مشبہ اور تمام اہل تاویل کی تردید کے لیے کتاب التوحید کا عنوان قائم کیا۔کتاب التوحید میں امام بخاری رحمۃ اللہ علیہ  کااسلوب یہ ہے کہ پہلے وہ قرآنی آیت کا حوالہ دیتے ہیں،پھر وہ احادیث بیان کرتے ہیں جن میں صفات باری تعالیٰ کاذکر ہے۔انھوں نے یہ اسلوب اس لیے اختیار کیا کہ کچھ لوگ عقائد کے باب میں خبر واحد کو حجت خیال نہیں کرتے۔ان کی تردید مقصود ہے کہ اس قسم کی اخبار آحاد قرآنی آیات کے ذیل میں آتی ہیں،جو شخص عقائد میں ان کی حجت سے انکار کرتا ہے وہ گویا قرآن وسنت دونوں کاانکار کرتا ہے۔امام بخاری رحمۃ اللہ علیہ  نے اس عنوان کے تحت چند ایک مسائل ذکر کیے ہیں جن کی تفاصیل حسب ذیل ہیں:1۔پہلے توحید باری تعالیٰ کو ثابت کیا ہے کیونکہ کچھ لوگوں نے اللہ تعالیٰ کی وحدانیت کا انکار کرکے(وحدة الوجود) کا نظریہ پیش کیا اورکہا کہ کائنات کی ہر چیز اللہ تعالیٰ ہے۔یہ نظریہ پیش کرنے والے ابن عربی اور حسین بن منصور حلاج ہیں۔©۔اسمائے حسنیٰ اور صفات علیا کا اثبات وصفات باری تعالیٰ کی چارقسمیں ہیں:©۔صفات ذاتیہ عقلیہ،مثلاً:حیات،علم ،قدرت،ارادہ ،سمع اور بصر وغیرہ©۔صفات فعلیہ عقلیہ ،مثلاً رحمۃ اللہ علیہ :پیدا کرنا،رزق دینا،زندہ کرنا،مارنا،معاف کرنا اور سزا دینا وغیرہ۔©۔صفات ذاتیہ سمعیہ،مثلاً:وجہ،ید،عین،نفس اور شخص وغیرہ۔©۔صفات فعلیہ سمعیہ،مثلاً:اتیان،مجئی اور نزول وغیرہ۔3۔مسئلہ علو اور (اسْتَوَى عَلَى العَرش)4۔روئیت باری تعالیٰ۔5۔مسئلہ تکوین6۔تلاوت اور مَتلُو میں فرق۔7۔خلق افعال العباد۔8۔صفت کلام۔اسے آخر میں بیان کیا ہے۔امام بخاری  رحمۃ اللہ علیہ  نے اس سلسلے میں 245 مرفوع احادیث پیش کی ہیں جن میں 55 معلق اور 190 موصول ہیں۔ان میں(71) مکرر ہیں جن کی تعداد 234ہے۔باقی صرف 11 احادیث خالص ہیں۔چار(4) احادیث کو امام مسلم  رحمۃ اللہ علیہ  نے بھی بیان کیا  ہے۔باقی 241 احادیث بیان کرنے میں امام بخاری رحمۃ اللہ علیہ  منفرد ہیں۔مرفوع احادیث کے علاوہ مختلف صحابہ کرام رضوان اللہ عنھم اجمعین  اور تابعین  رحمۃ اللہ علیہ  سے 36 آثار بھی بیان کیے ہیں،پھر ان احادیث وآثار پر اٹھاون(58) عنوان قائم کیے ہیں جن کی تفصیل آئندہ بیان کی جائےگی۔باذن اللہ تعالیٰ۔اسماء وصفات کے متعلق امام بخاری رحمۃ اللہ علیہ  کا موقف یہ ہے کہ کتاب وسنت میں جو اسماء وصفات وارد ہیں ان پر ایمان لانا واجب ہے اور انھیں بلاتکہیف وتمثیل ،اور بلاتعطیل وتحریف،اللہ تعالیٰ کے شایانِ شان مبنی برحقیقت تسلیم کیا جائے۔یہ اقرار وایمان کسی قسم کی بے جاتاویل کے بغیر ہو۔اس انداز اتباع سے آپ نے ہمیں یہ پیغام دیا ہے کہ قرآن وحدیث میں کسی قسم کی غلطی کا امکان نہیں،دونوں وضاحت کے ساتھ حق بیان کرتی ہیں۔اس حق سے وہی دور ہوئے ہیں جنھوں نے اپنے لیے اسلام کا راستہ چھوڑ کر ایک نئی راہ  کا انتخاب کیا ہے جو ان کی گمراہی کا باعث ہے،ایک مسلمان کو چاہیے کہ وہ ان دونوں کو مضبوطی سے تھام لےاور اس کے خلاف ہرچیز کوچھوڑ دے۔اللہ تعالیٰ نے ہماری طرف اپنا نمائندہ بھیجا ،جس نے ہر چیز کو کھول کر بیان کردیا،ہم اس کے بعد کسی چیز کے محتاج نہیں ہیں اگر ہم نے اس سے روگردانی کی تو شیاطین ہمیں گہری کھائیوں میں پھینک دیں گے جیسا کہ ارشاد باری تعالیٰ ہے:"جو شخص رحمٰن کے ذکر سے آنکھیں بند کرلیتا ہے ہم اس پر ایک شیطان مسلط کردیتے ہیں جو اس کا ساتھی بن جاتا ہے اور ایسے شیطان انھیں سیدھی راہ سے روک دیتے ہیں جبکہ وہ یہ سمجھ رہے ہوتے ہیں کہ وہ ٹھیک راستے پر جارہے ہیں۔"(الزخرف 43/36)امام بخاری رحمۃ اللہ علیہ  نےٹھیک ٹھیک اسلاف کی ترجمانی کی ہے لیکن شارحین نے اس سلسلے میں حق ادا نہیں کیا بلکہ انھوں نےاجماع اُمت کی آڑ میں صفات باری تعالیٰ کا انکارکیا یا انھیں مبنی برحقیقت تسلیم کرنے کے بجائے دوراز کارتاویلات کا سہارا لیا،چنانچہ امام بخاری رحمۃ اللہ علیہ  نے ایک عنوان ان الفاظ میں ذکر کیا ہے:)باب قَوْلِ النَّبِيِّ صَلَّى اللَّهُ عَلَيْهِ وَسَلَّمَ لَا شَخْصَ أَغْيَرُ مِنْ اللَّهِ("کوئی شخص اللہ تعالیٰ سے زیادہ غیرت مند نہیں۔"(صحیح البخاری الصلح حدیث 20)اس سے امام بخاری رحمۃ اللہ علیہ  نےثابت کیا ہے کہ لفظ"شخص" کا اطلاق ذات باری تعالیٰ پر ہوسکتا ہے،لیکن شارحین کی اکثریت اشعری مکتب فکر سے متعلق ہے،اس لیے ان کی تشریحات ملاحظہ فرمائیں:©۔شارح صحیح بخاری ابن بطال لکھتے ہیں کہ امت کا اس بات پر اجماع ہے یہ لفظ اللہ تعالیٰ کے حق میں نہیں بولا جاسکتا کیونکہ حدیث میں اس کی کوئی صراحت نہیں ہے۔(شرح ا بن بطال 10/442)©۔شارح صحیح بخاری علامہ خطابی  رحمۃ اللہ علیہ  فرماتے ہیں کہ اللہ تعالیٰ کے لیے لفظ شخص کا اطلاق صحیح نہیں کیونکہ شخص وہ ہے جو مرکب جسم رکھتا ہو۔اس طرح کی صفت اللہ تعالیٰ کی شان کے لائق نہیں۔جن احادیث میں یہ لفظ وارد ہے وہ راویوں کی تصحیف کا نتیجہ ہے۔(اعلام الحدیث 4/2344)©۔حافظ ابن حجر رحمۃ اللہ علیہ  چونکہ حافظ الدنیا ہیں،اس لیے کثرت روایات کے پیش نظر اس اطلاق کا انکار تو   نہیں کرتے،البتہ انھوں نے اس سلسلے میں دور اذکار کا سہارا لیا ہے۔( فتح الباری 13/491)©۔علامہ عینی نے متقدمین کے اقوال نقل کرنے اور حافظ ابن حجر رحمۃ اللہ علیہ  پر اعتراض کرنے کے علاوہ اپنی طرف سے اس صفت کے اثبات یا نفی میں کوئی تبصرہ نہیں کیا۔(عمدۃ  القاری 16/612)اللہ تعالیٰ استاذ محترم الشیخ عبداللہ بن محمد الغنیمان  رحمۃ اللہ علیہ  کو اجر عظیم عطا فرمائے،انھوں نے کتاب التوحید کی شرح کا حق ادا کیا۔ہم آئندہ احادیث کے فوائد اسی شرح سے مرتب کریں گے اور اس کےساتھ ساتھ دیگر شروعات سے بھی استفاذہ کیا جائے گا۔واللہ اعلم۔واضح رہے کہ برصغیر  میں تاویل صفات کے جمود کو توڑنے میں استاذ محترم ،شیخ العرب والعجم سید بدیع الدین شاہ راشدی  رحمۃ اللہ علیہ  نے نمایاں کردار اداکیا۔انھوں نے"توحید خالص" نامی کتاب لکھ کر توحید اسماء وصفات کا حق ادا کیا۔الغرض توحید اسماء وصفات کے متعلق عافیت کا راستہ یہی ہے کہ کتاب وسنت میں اللہ تعالیٰ کے متعلق جوصفات وارد ہیں انھیں بلاتکہیف وتمثیل اس کی شان کے لائق مبنی برحقیقت تسلیم کیا جائے۔انھیں ظاہر معنی پرمحمول کرتے ہوئے ان کے متعلق کسی بھی قسم کی تاویل سے گریز کیا جائے۔اس کے علاوہ الحاد کی جتنی بھی صورتیں ہیں سب کفر وشرک اور گمراہی کی طرف لے جانے والی ہیں،لہذا ایک مسلمان کو کبھی بھی اللہ تعالیٰ کی صفات کو زیر بحث لاکر ان کی تہ تک پہنچنے کی کوشش نہیں کرنی چاہیے کیونکہ یہ انسانی بساط سے باہر ہے۔پھر یہ اعتقادی بیماریاں ایک تو آگے منتقل ہوتی جاتی ہیں ،دوسرے زندگی کا رخ غلط راہوں پرڈال دیتی ہیں۔دعا ہے کہ اللہ تعالیٰ ہمیں اس سلسلے میں صراط مستقیم پر گامزن رکھے۔آمین۔

تمہید باب عربی

×

تمہید کتاب عربی

×