جامع ترمذی: كتاب: جنازے کے احکام ومسائل (باب: نمازِ جنازہ میں کیا دعا پڑھے؟​)

ترجمۃ الباب:

1024.

ابوابراہیم اشہلی کے والد ؓ کہتے ہیں کہ رسول اللہ ﷺ جب صلاۃِ جنازہ پڑھتے تو یہ دعا پڑھتے: (اللّهُمَّ! اغْفِرْ لِحَيِّنَا وَمَيِّتِنَا، وَشَاهِدِنَا وَغَائِبِنَا، وَصَغِيرِنَا وَكَبِيرِنَا، وَذَكَرِنَا وَأُنْثَانَا) (اے اللہ! بخش دے ہمارے زندوں کو ، ہمارے مردوں کو ،ہمارے حاضر کو اورہمارے غائب کو، ہمارے چھوٹے کو اورہمارے بڑے کو، ہمارے مردوں کو اورہماری عورتوں کو)۔
یحیی بن ابی کثیرکہتے ہیں: ابوسلمہ بن عبدالرحمن نے مجھ سے بیان کیا کہ ابوہریرہ ؓ نے نبی اکرمﷺ سے اسی کے مثل روایت کی ہے۔ البتہ اس میں اتنا زیادہ ہے: (اللّهُمَّ! مَنْ أَحْيَيْتَهُ مِنَّا فَأَحْيِهِ عَلَى الإِسْلاَمِ. وَمَنْ تَوَفَّيْتَهُ مِنَّا فَتَوَفَّهُ عَلَى الإِيمَانِ) (اے اللہ ! ہم میں سے جسے تو زندہ رکھ، اسے اسلام پر زندہ رکھ اور جسے موت دے اسے ایمان پر موت دے)
امام ترمذی کہتے ہیں:
۱۔ ابوابراہیم کے والد کی حدیث حسن صحیح ہے۔
۲۔ ہشام دستوائی اورعلی بن مبارک نے یہ حدیث بطریق: ’’يحيى بن أبي كثير، عن أبي سلمة، عن النبي ﷺ‘‘ مرسلاً روایت کی ہے، اور عکرمہ بن عمارنے بطریق: ’’يحيى بن أبي كثير، عن أبي سلمة، عن عائشة، عن النبي ﷺ‘‘ روایت کی ہے۔ عکرمہ بن عمار کی حدیث غیر محفوظ ہے۔ عکرمہ کو بسا اوقات یحییٰ بن ابی کثیرکی حدیث میں وہم ہوجاتا ہے۔ نیزیہ (يَحْيَى بْنِ أَبِي كَثِيرٍ) سے (عَنْ عَبْدِاللهِ بْنِ أَبِي قَتَادَةَ، عَنْ أَبِيهِ، عَنْ النَّبِيِّ ﷺ) کے طریق سے بھی مروی ہے، میں نے محمد بن اسماعیل بخاری کو کہتے سناکہ اس سلسلے میں یحییٰ بن ابی کثیر کی حدیث جسے انہوں نے بطریق: (أبي إبراهيم الأشهلي، عن أبيه) روایت کی ہے سب سے زیادہ صحیح روایت ہے۔ میں نے ان سے ابو ابراہیم کا نام پوچھا تووہ اُسے نہیں جان سکے۔
۲۔ اس باب میں عبدالرحمن، عائشہ، ابوقتادہ، عوف بن مالک اور جابر ؓ سے بھی احادیث آئی ہیں۔