جامع ترمذی: كتاب: نکاح کے احکام ومسائل (باب: قابل اطمینان دیندارکی طرف سے شادی کا پیغام آنے پر شادی کردینے کاحکم​)

ترجمۃ الباب:

1084.

ابوہریرہ ؓ کہتے ہیں کہ رسول اللہ ﷺ نے فرمایا: ’’جب تمہیں کوئی ایسا شخص شادی کاپیغام دے، جس کی دین داری اور اخلاق سے تمہیں اطمینان ہوتو اس سے شادی کردو۔ اگر ایسا نہیں کروگے توزمین میں فتنہ اور فساد عظیم برپاہوگا‘‘۔
امام ترمذی کہتے ہیں:
۱۔ ابوہریرہ ؓ کی اس روایت میں عبدالحمید بن سلیمان کی مخالفت کی گئی ہے، اسے لیث بن سعد نے بطریق: (ابن عجلان، عن أبي هريرة، عن النبي ﷺ ' مرسلاً(منقطعاً) روایت کی ہے (یعنی: ابن وشیمہ کا ذکر نہیں کیا ہے)۔
۲۔ محمدبن اسماعیل بخاری کاکہناہے کہ لیث کی حدیث اشبہ (قریب تر) ہے، انہوں (بخاری) نے عبدالحمید کی حدیث کو محفوظ شمارنہیں کیا۔
۳۔ اس باب میں ابوحاتم مزنی اور عائشہ ؓ سے احادیث آئی ہیں۔