وصایا  جمع ہے وصیہ کی ،جیسے خطایا جمع خطیئۃ کی اور وصیت  اصل میں عہد و قرار اور نصیحت کو کہتے ہیں ،لغت اور اصطلاح میں وہ عہد و قرار و نصیحت ہے کہ جو قریب موت کے واقع ہو۔اور شرعاً تملیک بعد الموت کا نام ہے اور وصیت اسم ہے بمعنی مصدر کے اور موصیٰ بہ یعنی جس کی وصیت کی جائے اس کو بھی وصیت کہتے ہیں ،اور ایصاء عبارت ہے غیر کو وصی کرنے سے تا کہ غیر اس کی غیبت میں کام کرے خواہ موصی زندہ ہو یا مردہ ،مثلاً زید نے بکر سے کہا کہ خالد کو یہ مکان دینا تو زید موصی ہے اور بکر وصی ہے ، اور مکان موصیٰ بہ اور خالد موصیٰ لہ اور باقی مسائل وصیت کے ضمن ابواب میں مذکور ہوں گے یہاں اتنا جاننا ضرور ہے کہ وصیت مستحب ہے اور اہل ظواہر اس کے وجوب کی طرف گئے ہیں اور پیش ازنزول میراث واجب تھی بعد نزول میراث و جوب منسوخ ہوگیا اس لیے وصیت وارث کو درست نہیں۔اور فقہاء نے کہا ہے کہ جس پر دین ہو یا ودیعت کسی کی اس کے پاس ہے تو لازم ہے اس کو وصیت کر کے گواہ کرنا اس پر۔

(کذاذکرالشیخ فی شرح مشکوٰۃ)