جامع ترمذی: كتاب: ایمان واسلام کے بیان میں (باب: موت کے وقت لا إلہ إلا اللہ کی گواہی دینے کی فضیلت کابیان​)

ترجمۃ الباب:

2638.

صنابحی سے روایت ہے کہ میں عبادہ بن صامت ؓ کے پاس اس وقت گیا جب وہ موت کی حالت میں تھے، میں (انہیں دیکھ کر) روپڑا، انہوں نے کہا: ٹھہرو ٹھہرو، روتے کیوں ہو؟ قسم اللہ کی! اگر مجھ سے گواہی طلب کی گئی تو میں (آخرت میں) تمہارے ایمان کی گواہی دوں گا، اور اگرمجھے شفاعت کا موقع دیا گیا تو میں تمہاری سفارش ضرور کروں گا اوراگر مجھے کچھ استطاعت نصیب ہوئی تو میں تمہیں ضرورفائدہ پہنچاؤں گا۔ پھرانہوں نے کہا: قسم اللہ کی! کوئی ایسی حدیث نہیں ہے جسے میں نے رسول اللہ ﷺ سے سنا ہو اور اس میں تم لوگوں کے لیے خیر ہو مگر میں نے اسے تم لوگوں سے بیان نہ کردیا ہو، سوائے ایک حدیث کے اور آج میں اسے بھی تم لوگوں سے بیان کیے دے رہا ہوں جب کہ میری موت قریب آ چکی ہے، میں نے رسول اللہ ﷺ کو فرماتے ہوئے سنا ہے: ’’جو گواہی دے کہ کوئی معبود (برحق) نہیں سوائے اللہ کے اور گواہی دے کہ محمد (ﷺ) اللہ کے رسول ہیں تو اللہ اس پر آگ کو حرام کر دے گا‘‘۔
امام ترمذی کہتے ہیں:
۱۔ اس سند سے یہ حدیث حسن صحیح غریب ہے۔
۲۔ میں نے ابن ابی عمر کو کہتے ہوئے سنا کہ ابن عیینہ کہتے تھے کہ محمد بن عجلان ثقہ آدمی ہیں اور حدیث میں مامون (قابل اعتماد) ہیں۔
۳۔ صنابحی سے مراد عبدالرحمن بن عسیلہ ابوعبداللہ ہیں (ابوعبداللہ کنیت ہے)۔
۴۔ اس باب میں ابوبکر، عمر، عثمان، علی ، طلحہ، جابر ، ابن عمر، اور زید بن خالد‬ ؓ س‬ے بھی احادیث آئی ہیں۔
۵۔ زہری سے مروی ہے کہ ان سے نبی اکرم ﷺ کے فرمان: (مَنْ قَالَ لاَ إِلَهَ إِلاَّ اللهُ دَخَلَ، الْجَنَّةَ) (جس نے لاَ إِلَهَ إِلاَّ اللهُ کہا وہ جنت میں داخل ہوگا) کے متعلق پوچھا گیا (کہ اس کا مطلب کیا ہے؟) تو انہوں نے کہا: یہ شروع اسلام کی بات ہے جب کہ فرائض اور امرو نہی کے احکام نہیں آئے تھے۔
۶۔ بعض اہل علم کے نزدیک اس حدیث کی توجیہ یہ ہے کہ اہل توحید (ہرحال میں) جنت میں جائیں گے اگرچہ انہیں ان کے گناہوں کی وجہ سے آگ کی سزا سے بھی کیوں نہ دوچار ہوناپڑے، کیوں کہ وہ جہنم میں ہمیشہ نہیں رہیں گے۱؎۔
۷۔ عبداللہ بن مسعود، ابوذر، عمران بن حصین، جابر بن عبداللہ ، ابن عباس، ابوسعید خدری، انس بن مالک ؓ سے روایت ہے کہ نبی اکرم ﷺنے فرمایا: ’’عنقریب ایسا ہوگا کہ توحید کے قائلین کی ایک جماعت جہنم سے نکلے گی اور جنت میں داخل ہوگی‘‘ ۲؎، ایسا ہی سعید بن جبیر ابراہیم نخعی اور دوسرے بہت سے تابعین سے مروی ہے، یہ لوگ آیت ﴿رُبَمَا يَوَدُّ الَّذِينَ كَفَرُوا لَوْ كَانُوا مُسْلِمِينَ﴾۳؎ کی تفسیر میں بیان کرتے ہیں کہ جب اہل توحید جہنم سے نکالے اورجنت میں داخل کئے جائیں گے تو کافر لوگ آرزو کریں گے اے کاش! وہ بھی مسلمان ہوتے ۔