جامع ترمذی: كتاب: قرآن کریم کے فضائل ومناقب کے بیان میں (باب: سورہ اذا زلزلت کی فضیلت کابیان​)

ترجمۃ الباب:

2895.

انس بن مالک ؓ سے روایت ہے کہ رسول اللہ ﷺ نے اپنے ایک صحابی سے کہا: اے فلاں! کیا تم نے شادی کرلی؟ انہوں نے کہا: نہیں، قسم اللہ کی! اللہ کے رسول! نہیں کی ہے، اور نہ ہی میرے پاس ایسا کچھ ہے جس کے ذریعہ میں شادی کر سکوں۔ آپﷺ نے فرمایا: ’’کیا تمہارے پاس سورہ ﴿قُلْ هُوَ اللَّهُ أَحَدٌ﴾ نہیں ہے؟‘‘ انہوں نے کہا: کیوں نہیں، میرے پاس ہے۔ آپﷺ نے فرمایا: سورہ ﴿قُلْ هُوَ اللَّهُ أَحَدٌ﴾ ثواب میں ایک تہائی قرآن کے برابر ہے۔ آپﷺ نے کہا: کیا تمہارے پاس سورہ ﴿إِذَا جَاءَ نَصْرُ اللَّهِ وَالْفَتْحُ﴾ نہیں ہے؟‘‘ انہوں نے کہا: کیوں نہیں، (ہے) آپﷺ نے فرمایا: ’’یہ ایک چوتھائی قرآن ہے‘‘، آپﷺ نے فرمایا: ’’کیا تمہارے پاس سورہ ﴿قُلْ يَا أَيُّهَا الْكَافِرُونَ﴾ نہیں ہے؟‘‘ انہوں نے کہا: کیوں نہیں۔ (ہے) آپﷺ نے فرمایا: ’’(یہ) چوتھائی قرآن ہے‘‘۔ آپﷺ نے فرمایا: ’’کیا تمہارے پاس سورہ ﴿إِذَا زُلْزِلَتْ الْأَرْضُ﴾ نہیں ہے؟ انہوں نے کہا: کیوں نہیں (ہے) آپﷺ نے فرمایا: ’’یہ ایک چوتھائی قرآن ہے‘‘، آپﷺ نے فرمایا: ’’تم شادی کرو‘‘۔
امام ترمذی کہتے ہیں: یہ حدیث حسن ہے۔