جامع ترمذی: كتاب: قرآن کریم کی تفسیر کے بیان میں (باب: سورہ ہودسے بعض آیات کی تفسیر​)

ترجمۃ الباب:

3113.

معاذ بن جبل ؓ کہتے ہیں: ایک شخص نبی اکرمﷺکے پاس آ کرعرض کیا:اللہ کے رسولﷺ! ایک ایسے شخص کے بارے میں مجھے بتائیے جو ایک ایسی عورت سے ملا جن دونوں کا آپس میں جان پہچان، رشتہ وناطہ (نکاح) نہیں ہے اور اس نے اس عورت کے ساتھ سوائے جماع کے وہ سب کچھ (بوس وکنار چوما چاٹی وغیرہ) کیا جو ایک مرد اپنی بیوی کے ساتھ کرتا ہے؟، (اس پر) اللہ تعالیٰ نے آیت: ﴿وَأَقِمْ الصَّلاةَ طَرَفَيَ النَّهَارِ وَزُلَفًا مِنَ اللَّيْلِ إِنَّ الْحَسَنَاتِ يُذْهِبْنَ السَّيِّئَاتِ ذَلِكَ ذِكْرَى لِلذَّاكِرِينَ﴾ نازل فرمائی، آپﷺ نے اسے وضو کرکے نماز پڑھنے کا حکم دیا، میں نے عرض کیا اللہ کے رسولﷺ! کیا یہ حکم اس شخص کے لیے خاص ہے یا سبھی مومنین کے لیے عام ہے؟ آپﷺ نے فرمایا: ’’نہیں، بلکہ سبھی مسلمانوں کے لیے عام ہے‘‘۔
امام ترمذی کہتے ہیں:
۱۔ اس حدیث کی سند متصل نہیں ہے، (اس لیے کہ ) عبدالرحمن بن ابی لیلیٰ نے معاذ سے نہیں سنا ہے، اورمعاذ بن جبل کا انتقال عمر ؓ کے دور خلافت میں ہوا تھا، اورعمر ؓ جب شہید کیے گئے تو اس وقت عبدالرحمن بن ابی لیلیٰ چھ برس کے چھوٹے بچے تھے۔ حالانکہ انہوں نے عمر سے (مرسلاً) روایت کی ہے (جبکہ صرف) انہیں دیکھا ہے۔
۲۔ شعبہ نے یہ حدیث عبدالملک بن عمیر سے اورعبدالملک نے عبدالرحمن بن ابی لیلیٰ کے واسطہ سے، نبی اکرمﷺسے مرسلاً روایت کی ہے۔