جامع ترمذی: كتاب: مسنون ادعیہ واذکار کے بیان میں (باب: جو جائے اپنے بستر پرطہارت کے ساتھ اور یاد کرتا رہے اللہ تعالیٰ کو اس کی فضیلت)

ترجمۃ الباب:

3527.

معاذ بن جبل ؓ کہتے ہیں کہ نبی اکرم ﷺ نے ایک شخص کو دعا مانگتے ہوئے سنا وہ کہہ رہا تھا: اے اللہ! میں تجھ سے نعمت تامہ مانگ رہا ہوں، آپﷺ نے اس شخص سے پوچھا: ’’نعمت تامہ کیا چیز ہے؟‘‘ اس شخص نے کہا: میں نے ایک دعا مانگی ہے اور مجھے امید ہے کہ مجھے اس سے خیر حاصل ہو گی، آپﷺ نے فرمایا: ’’بے شک نعمت تامہ میں جنت کا دخول اور جہنم سے نجات دونوں آتے ہیں‘‘۔ آپﷺ نے ایک اور آدمی کو (بھی ) دعا مانگتے ہوئے سنا، وہ کہہ رہا تھا: (یَا ذَا الْجَلاَلِ وَالْاِ کْرَامِ) آپﷺ نے فرمایا: ’’تیری دعا قبول ہوئی تو مانگ لے (جو تجھے مانگنا ہو)‘‘ آپﷺ نے ایک شخص کو سنا وہ کہہ رہا تھا، اے اللہ! میں تجھ سے صبر مانگتا ہوں، آپﷺ نے فرمایا: ’’تو نے اللہ سے بلا مانگی ہے اس لیے تو عافیت بھی مانگ لے‘‘۔