جامع ترمذی: كتاب: فضائل و مناقب کے بیان میں (باب: مُعَاذِ بْنِ جَبَلٍ، وَزَيْدِ بْنِ ثَابِتٍ، وَأُبَيٍّ، وَأَبِي عُبَيْدَةَ بْنِ الجَرَّاحِ ؓ کے مناقب)

ترجمۃ الباب:

3796.

حذیفہ بن یمان ؓ کہتے ہیں: ایک قوم کا نائب اور سردار دونوں نبی اکرم ﷺ کے پاس آئے اور دونوں نے عرض کیا: ہمارے ساتھ آپﷺ اپنا کوئی امین روانہ فرمائیں، تو آپﷺ نے فرمایا: ’’میں تمہارے ساتھ ایک ایسا امین بھیجوں گا جو حق امانت بخوبی ادا کرے گا، تو اس کے لیے لوگوں کی نظریں اٹھ گئیں اور پھر آپﷺ نے ابوعبیدہ بن جراح ؓ کو روانہ فرمایا۔ راوی حدیث ابواسحاق سبیعی کہتے ہیں: جب وہ اس حدیث کو صلہ سے روایت کرتے تو کہتے ساٹھ سال ہوئے یہ حدیث میں نے ان سے سنی تھی۔
امام ترمذی کہتے ہیں:
۱۔ یہ حدیث حسن صحیح ہے ۔
۲۔ یہ حدیث ابن عمر اور انس ؓ کے واسطے سے بھی نبی اکرمﷺ سے آئی ہے، آپﷺ نے فرمایا: ’’ہرامت کا ایک امین ہوتا ہے اور اس امت کے امین ابوعبیدہ بن جراح ہیں‘‘۔