فوائد و مسائل:

(مذکورہ باب کی دونوں روایتیں ضعیف ہیں۔ جنھیں محققین نے ضعیف قرار دیا ہے۔ تاہم دوسرے دلائل کی رو سے عید کے دن غسل کرنامستحب ہے۔ جیسا کہ سنن ابن ماجہ ہی میں حضرت عبد اللہ ابن عباس رضی اللہ تعالیٰ عنہ سے مروی ہے کہ رسول اللہ صلی اللہ علیہ وسلم نے فرمایا۔ یقیناً اللہ تعالیٰ نے مسلمانوں کےلئے جمعے کے دن کو عید بنایا ہے۔ چنانچہ جو شخص جمعے کے لئے آئے۔ تو اسے چاہیے کہ ٖغسل کرے۔ اور اگر خوشبو ہوتو استعمال کرے۔ اور مسواک بھی ضرور اہتمام کرے۔ (سنن ابن ماجه، إقامة الصلوات، باب ما جاء فی الزینة یوم الجمعة، حدیث:1098) اس حدیث سے علمائے حدیث یہ استدلال کرتے ہیں۔ کہ جب حدیث میں جمعہ کے دن غسل کرنے، خوشبو استعمال کرنے اور مسواک کرنے کا سبب یہ بیان کیا گیا ہے کہ جمعے کو اللہ تعالیٰ نے اہل اسلام کے لئے عید بنایا ہے۔ تو عید کے دن ان تینوں کاموں کا کرنا اور زیادہ محبوب اور پسندیدہ ہوگا۔ علاوہ ازیں امام مالک رحمۃ اللہ علیہ حضرت نافع رحمۃ اللہ علیہ سے بیان کرتے ہیں۔ کہ حضرت عبد للہ بن عمررضی اللہ تعالیٰ عنہ عید الفطر کے دن عید گاہ جانے سے قبل غسل کیا کرتے تھے۔ (موطأ إمام مالک، العیدین:177/1) نیز شخ البانی رحمۃ اللہ علیہ نے بھی ’’إرواء‘‘ میں اس مسئلہ پر مفصل بحث کی ہے۔ اور لکھا ہے کہ اس مسئلہ پر کوئى صحیح مرفوع حدیث تو نہیں ہے البتہ موقوف روایت ہے۔ جو امام بیہقي سے مروی ہے انھوں نے آخر میں اس غسل کومستحب قرار دیا ہے اور اس کی تایئد میں حضرت علی رضی اللہ تعالیٰ عنہ کا قول نقل کیا ہے۔ لہٰذا ان تمام دلائل کی روشنی میں عید کے دن غسل کرنا ان شاء اللہ مستحب ہے۔ واللہ أعلم تفصیل کےلئے دیکھئے: (إرواء الغلیل:177،175/1، حدیث:146)