لغوی معنی : لغت میں رہن سے مراد (والثبوت والدوام]کسی چیز کا ثابت اوردائمی ہونا ہے جیسے کہاجاتاہے :[ماء راھن] یعنی ٹھہراہواپانی ۔یا اس کے معنی [الحبس واللزوم]ہیں یعنی کسی چیز کامحبوس اورلازمی ہونا جیسا کہ فرمان باری تعالی ہے (كُلُّ نَفْسٍ بِمَا كَسَبَتْ رَهِينَةٌ)المدثر74:38)ہر شخص اپنے اعمال کےبدلے میں گردی ہے۔ یعنی محسوس ہے۔ اوراس کااطلاق اس چیز پربھی ہوتا ہے جسے بطور ضمانت قرض خواہ کےحوالے کیاجاتاہے۔ اصطلاحی تعریف :[المال الذی یجعل وثيقه بالدین لیستوفی من ثمنه ان تعذر استیفاء ممن ھو عليه ]’’رہن وہ مال ہے جوقرض حاصل کرنے کےلیے بطور ضمانت دیا جاتا ہے تاکہ عدم ادائیگی کی صورت میں قرض دینے والا اپںا حق اس مال میں سے وصول کرلے۔‘‘رہن کی مشروعیت :رہن قرآن وسنت سےثابت ہے ۔ فرمان باری تعالی ہے (وان کنتم علی سفر ولم تجدوا کاتبا فرھن مقبوضة )البقرۃ 2:283)’’اگر تم سفرمیں ہواور(قرضے کی دستاویز)لکھنے والا نہ پاو تو گروی چیز قبضے میں لیاکرو۔‘‘حضرت انس نبی اکرمﷺ کاگروی کےمتعلق عمل بتاتےہوئے فرماتےہیں :[رھن رسول اللهﷺدرعا له عند يهودی فی المدينة فاخذ منه شعيرا لاهله ] (صحیح البخاری البیوع باب شراء النبیﷺ بالنسية حدیث :2069ومسند احمد :3۔123وللفظ له ) ’’رسول اللہ ﷺ نے مدینہ منورہ کےایک یہودی کے پاس اپںی زرہ گروی رکھ کر اپنے گھر والوں کےلیے جو (بطور قرض )حاصل کیے۔‘‘گروی رکھنے کےچند ضروری احکام :1۔ رہن (رہن رکھنے والا)وہ شخص ہے اپنی کوئی چیز رہن رکھ کرکسی سےقرض پررقم حاصل کرتاہے ۔2۔ مرتہن وہ شخص ہے جوکوئی چیز قبضے میں لےکر قرض کی رقم ضرورت مند کودیتاہے۔3۔ مرہونہ یا رہن ہ چیز (مکان دوکان یا سواری وغیرہ ) ہےجوبطور ضمانت مرتہن کی تحویل میں دے دی جائے۔4۔ قرض لینے کے ساتھ گروی رکھی جانے والی چیز مرتہن کے حوالے کرنا ضروری ہے الایہ کہ مرتہن خود واپس کردے۔5۔جن چیزوں کی فروخت جائز نہیں ان کا گروی رکھنا بھی درست نہیں ۔6۔ مدت ختم ہونے پر قرض واپس کیا جائے ورنہ مرتہن گروی چیز میں سے اپنا حق وصول کرے گا۔7۔ رہن مرتہن کےپاس بطور امانت ہوتا ہے اگر اس کی زیادتی یاغفلت سےوہ ضائع ہواتووہ ضامن ہوگا۔ 8۔ رہن کو مرتہن کے علاوہ کسی دوسری امانتدار شخص کےپاس بھی رکھا جاسکتاہے ۔9۔ اگر قرض کی مقدار میں اختلاف ہوجائے توراہن قسم کھائے گایا مرتہن ثبوت مہیا کرے گا۔10۔ اگررہن کی واپسی میں اختلاف ہوجائےتوبھی مرتہن ثبوت دے گا جبکہ راہن قسم کھائے گا۔11۔ مرتہن گروی رکھی ہوئی سواری یاجانور پرخرچ کرکے اس سے فائدہ لے سکتاہے ۔12۔ گروی رکھی ہوئی چیز کی آمدنی اجرت اورنسل وغیرہ میں اضافہ راہن کاہے ۔13۔ اگر راہن فوت ہوجائے تودیگر قرض خواہوں سےپہلےمرتہن دیاجائے گا ۔ والله اعلم