دعا لغت میں (دعا یدعو) سے مصدر ہے۔لغت میں اس سے مراد :طلب کرنا ، بلانا، پکارنا، مدد چاہنا، درخواست کرنا اور ترغیب دینا ہے، مثلاَ َ : (دعوت اللہ ) “ میں نے اللہ تعالیٰ سے (خیرو برکت کی ) درخواست کی ۔ ”قرآن مجید میں لفظ “متعدد معنوں میں استعمال ہوا ہے، مثلاَ َ:۱۔عبادت کےمعنی میں ، جیسے ارشاد باری تعالٰی ہے:﴿وَلا تَدعُ مِن دونِ اللَّـهِ ما لا يَنفَعُكَ وَلا يَضُرُّ‌كَ﴾(يونس 10: 106) “ اور آپ اللہ کے سوا ان کو مت پکاریں جو نہ آپ کو نفع دےسکتے ہیں اور نہ نقصان پہنچا سکتے ہیں۔”۲۔ مدد طلب کرنے کے لیے ، جیسے ارشاد باری تعالیٰ ہے : ﴿وَادعوا شُهَداءَكُم ﴾ (البقره 2: 23) ’’اور اپنے مدد گاروں کو بھی بلالو۔‘‘۳۔ بمعنی سوال کرنے کے ، جیسے ارشاد باری تعالٰی ہے : ﴿ادعوني أَستَجِب لَكُم﴾ (المؤمن 40: 60) ’’مجھ سے دعا کرو میں تمہاری دعائیں قبول کروں گا۔‘‘۴۔ ندا ، یعنی پکارنے کے لیے ، جیسے ارشاد باری تعالیٰ ہے : ﴿يَومَ يَدعوكُم فَتَستَجيبونَ بِحَمدِهِ ﴾(نبى اسرائيل 17: 52)’’جس دن وہ تمہیں بلائے گا تم  اس کی تعریف کرتے ہوئے تعمیل ارشاد کرو گے۔‘‘ ۵۔ ثنا، یعنی تعریف کےلیے ، جیسے ارشاد الہی ہے :﴿ قُلِ ادعُوا اللَّـهَ أَوِ ادعُوا الرَّ‌حمـٰنَ ﴾(بنى اسرائيل 17: 110) ’’تم اس کی ثنا‘‘اللہ”نے نام سے کرو یا“رحمٰن‘‘ کے نام سے ۔4۔قول ‘یعنی بات‘ جیسے ارشاد باری تعالیٰ ہے :جیسے ارشاد باری تعالیٰ ہے(دَعْوَاهُمْ فِيهَا سُبْحَانَكَ اللَّهُمَّ)(یونس10:10)٭ اصطلاحی تعریف: مندرجہ بلا نکات سے دعا کی تعریف مندرجہ ذیل الفاظ میں کی جا سکتی ہے :’’خیرو برکت کے حصول اور شر سے پناہ کے لیے اللہ تعالیٰ کے حضور گڑ گڑانا اور پکارنا“دعا” کہلاتا ہے۔‘‘٭ دعا کی فضیلت و اہمیت:دعامومن کا ہتھیار ہے۔ یہ ایسا  کارگر ، کامیاب اور مؤثر ہتھیار ہے جسے آپ کسی بھی وقت ، کسی بھی موقع پر بغیر کسی کی مدد کے چلا سکتے ہیں۔ جب انسان مشکلات و مصائب میں گھر جائے، حالات و واقعات اس کے خلاف ہو جائیں، دشمن یا مرض کا دباؤ شدید ہو جائے، اپنے پرائے سب ساتھ چھوڑ جائیں ، عالم اسبات کے تمام اسبات و ذرائع نا کا م ہو جائیں ، جب دنیوی سہارےاور امیدیں دم توڑ جائیں ، اس وقت اس ہتھیار کی کار کردگی دو چند نہیں بلکہ صد چند ہو جاتی ہیں۔ جب  کوئی پکار سننے والا نہ ہو ، تب اس ہتھیار کی کامیابی یقینی اور مسلم امر ہے۔ رسول اکرم ﷺ نے دعا کو عبادت قرار دیا ہے۔ آپ کے اسوۂ حسنہ پر نظر دوڑائی جائے تو آپ ﷺ کی حیات طیبہ اس عبادت سے خوب منور نظر آتی ہے۔صبح سے شام اور شام سے صبح تک ، خوشی اور غمی کے مواقع پر ، آندھی اور طوفان میں، زلزلوں اور گرہنوں کے وقت ، آپ کی زندگی کا لمحہ لمحہ ہمیں اس عبادت کی ترغیب دلاتا نظر آتا ہے کیونکہ جس مالک دو جہاں کی یہ عبادت ہے وہ گنج بخش ، مشکل کشا، حاجت روا اور دستگیر کامل ہے، لہذا ارشاد نبوی ہے: [إن ربكم حيي كريم يستحيي من عبده أن يرفع إليه يديه فيردهما صفرا] ( سنن ابن ماجه ، الدعا حديث :3865) ’’بے شک تمہارے پروردگار بڑا حیا والا اور سخی ہے، جب بندہ اس کے سامنے ہاتھ پھیلاتا ہے تو انہیں خالی لوٹاتے ہوئے اسے شرم آتی ہے۔‘‘بلکہ اس کی شان کریمی تو یہ ہے کہ جو اس سخاوت سےاعراض  کرتا ہے، وہ اس سے ناراض ہو جاتا ہے۔٭دعا کی قبولیت کے آداب و شرائط: دعا مومن کا کامیاب ترین ہتھیار ہے۔ اس ہتھیار کے ذریعے سے بہترین نتا ئج کے حصول کے لیے چند آداب و شرائط ہیں۔ اگر ان کو مد نظر رکھ کر اسے استعمال کیا جائے تو سو فیصد نتائج کا حصول یقینی ہو جاتا ہے۔ وہ آداب و شرائط درج ذیل ہیں: 1۔  دعا صرف اور صرف مالک دو جہاں اللہ ذوالجلال والا کرام سے مانگی جائے۔2۔پوری دلجمی ، نہایت خضوع و خشوع اور قبولیت کے یقین کامل کے ساتھ دعا مانگی جائے۔3۔دعا مانگنے والے کا لباس اور کھانا پینا حلال کا ہو۔4۔دعا مانگتے وقت قبلہ رخ ہو تو افضل ہے۔5۔ گناہ پر مبنی اور قطع رحمی کی دعا نہ کی جائے۔6۔دعا کی قبولیت میں تاخیر پر دعا ترک نہ کرے۔7۔دعا کی ابتدا اللہ تعالیٰ کی حمد و ثنا اور نبی ﷺ پر درود و شریف کرے۔8۔ اللہ تعالیٰ کے سامنے اپنے گناہوں کا اعتراف کرے اور بخشش کی درخواست کرے۔ 9۔ قبولیت دعا کے اوقت میں دعا مانگے، مثلاَ َ: رات کے آخری حصے میں، اذان اور اقامت کے درمیانی وقفے میں ، فرضی نماز کے بعد ، جمعہ کے دن نماز عصر کے بعد ، نفلی نماز کے سجدےمیں ، نزول بارش کے وقت اور زمزم پینے سے قبل ، وغیرہ۔10۔ رسول مقبول ﷺ سے غیر ثابت شدہ ادعیہ سے پرہیز کیاجائے، مثلاَ َ: دعائے نور ، دعائے حبیب ، دعائے گنج العرش ، دعائے منزل ، وغیرہ۔٭قبولیت  دعا کی مختلف صورتیں:اگر درج بالا آداب کو ملحوظ رکھ کر دعا مانگی جائے تو وہ ضرور قبول ہوتی ہے۔ بعض دفعہ مانگی گئی خیر وبرکت کا حصول دنیا میں نہیں ہوتا تو آدمی مایوس ہو جاتا ہے اور دعا کرنا ترک کر دیتا ہے۔ اس سلسلے میں رسول اکرم ﷺ کا درج ذیل ارشاد گرامی مومنوں کے لیے مشعل راہ ہونا چاہیے ۔ آپ کا ارشاد گرامی ہے:۔[ما من مسلم يدعو بدعوة ليس فيها إثم ولا قطيعة رحم إلا أعطاه الله بها إحدى ثلاث : إما أن تعجل له دعوته ، وإما أن يدخرها له في الآخرة ، وإما أن يصرف عنه من السوء مثلها . قالوا إذن تكثر . قال الله أكثر]( مسند احمد: 3/18)’’ جب بھی کوئی مسلمان دعا کرتا ہے جس میں گناہ یا قطع رحمی کی بات نہ ہو تو اللہ تعالیٰ اسے تین چیزوں میں سے ایک ضرور عطا کردیتا ہے۔ :1۔ دعا کے مطابق اس کی حاجت پوری کر دیتا ہے۔ 2۔ یا اس کی دعا کو آخرت کےلیے ذخیرہ بنا دیتا ہے۔ 3۔یا دعا کے برابر اس سے کوئی بلا ٹال دیتا ہے۔ ” صحابہ کرام ؓ نے عرض کیا: تب تو ہم بکثرت دعا کریں گے۔ آپ نے فرمایا: “اللہ تعالیٰ کے خزانے نے بھی بہت زیادہ ہیں۔‘‘