لغوی معنی : امام ابن قتیبہ  فرماتے ہیں : زکاۃ [الزکاء] سے مشتق ہے جس کے معنی اضافہ اور بڑھوتری کے ہیں ۔ زکاۃ کو زکاۃ اس لیے کہتے ہیں کہ یہ مال میں اضافے اور برکت کا باعث بنتی ہے ، اسی لیے جب کھیتی میں برکت حاصل ہو تو کہتے ہیں:[زکا الزرع]امام زہری  فرماتے ہیں : زکاۃ کو زکاۃ اس لیے کہتے ہیں کہ یہ[تزکّی الفقراء] فقراء کی نشوونما کرتی ہے اور انہیں  ترقی دیتی ہے ۔ اس کے دوسرے معنی پاکیزگی کے ہیں ۔ زکاۃ بقیہ مال کو پاکیزہ کر دیتی ہے ، یا زکاۃ دینے والے کو اخلاق رذیلہ سے پاک کر دیتی ہے جیسا کہ فرمان باری تعالیٰ ہے :(خُذْ مِنْ أَمْوَالِهِمْ صَدَقَةً تُطَهِّرُ‌هُمْ وَتُزَكِّيهِم بِهَا)(التوبۃ 9/110) ’’ آپ ان کے مالوں میں سے صدقہ لیجیے جس کے ذریعے سے آپ ان کو پاک صاف کردیں ۔ ‘‘ یعنی زکاۃ دینے والوں کو اخلاق رذیلہ جیسے بخل اور خود غرضی وغیرہ سے پاک کردیں۔ دیکھیے : ( لسان العرب :3؍1839، والمصباح المنیر : 1؍346)اصطلاحی تعریف: فقہائے کرام نےزکاۃ کی مختلف تعریفیں کی ہیں جن میں سے ایک مندرجہ ذیل ہے : [حق واجب فى مال مخصوص لطائفة فى وقت مّخصوص]’’ زکاۃ ایک واجب حق ہے جو خاص مال میں سے ایک خاص وقت میں مخصوص لوگوں کے لیے وصول کیا جاتا ہے ۔‘‘زکاۃ کی فرضیت : زکاۃ 2 ہجری میں شوال کے مہینے میں فرض ہوئی ۔ اس کی فرضیت رمضان المبارک کے روزوں اور صدقہ فطر کے بعد ہوئی ۔ زکاۃ کی فرضیت اور وجوب قرآن وسنت اور اجماع امت سے ثابت ہے ۔ قرآن مجید میں فرمان باری تعالیٰ ہے : (وَأَقِيمُوا الصَّلَاةَ وَآتُوا الزَّكَاةَ)( البقرۃ : 2:43) ’’ اور نماز قائم کرو اور زکاۃ ادا کرو۔‘‘جبکہ فرامین رسول ﷺ میں زکاۃ کو اسلام کا بنیادی اور اہم رکن شمار کیا گیا ہے ۔ رسول اللہ ﷺ کا ارشاد گرامی ہے : [ بنی الاسلام علی خمس : شهادۃ ان لا اله الا الله وان محمدا رسول الله واقام الصلاۃ وایتاءالزکاۃ والحج  وصوم رمضان ] ( صحیح البخاری ، الایمان ، باب دعاؤکم ایمانکم .. حدیث : 8،آ وصحیح مسلم ، الایمان ، باب بیان ارکان الاسلام...حدیث :16) ’’اسلام کی بنیاد پانچ چیزوں پر ہے : اس بات کی گواہی دینا کہ اللہ کے سوا کوئی معبود برحق نہیں اور حضرت محمد ﷺ اللہ تعالیٰ کے رسول ہیں ، نماز فائم کرنا ، زکاۃ ادا کرنا ، حج ادا کرنا اور رمضان المبارک کے روزے رکھنا۔‘‘ہر دور میں امت کا اجماع رہا ہے کہ زکاۃ فرض ہے اور جو شخص اس کے وجوب کا انکار کرے وہ کافر مرتد ہے ، اسی لیے حضرت ابوبکر صدیق ﷜ نے خلافت سنبھالتے ہی منکرین زکاۃ سے جہاد کا اعلان فرمایا تھا ، حالانکہ اس وقت کے حالات و واقعات کو دیکھتے ہوئے حضرت عمر فاروق جیسے اجل صحابہ کرام ﷢ نے بھی انہیں نرمی کا مشورہ دیا تھا ، لیکن بعد میں تمام صحابہ کرام ﷢ اس بات پر متفق ہو گئے کہ صدیق اکبر ﷜ کا موقف ہی درست اور برحق ہے ، لہذا انہوں نے حضرت ابوبکر صدیق ﷜ کی قیادت میں منکرین زکاۃ سے قتال کیا تا آنکہ وہ زکاۃ ادا کرنے پر رضامند ہوگئے یا تہ تیغ کر دیے گئے۔فرضیت زکاۃ کی حکمت : اللہ تعالیٰ  نے لوگوں کو رزق اور مال ودولت میں باہم متفاوت رکھا ہے جیسا کہ فرمان الہٰی ہے : (وَاللَّـهُ فَضَّلَ بَعْضَكُمْ عَلَىٰ بَعْضٍ فِي الرِّ‌زْقِ) ( النحل 61:71)’’ اللہ تعالیٰ ہی نے تم میں سے بعض کو بعض پر روزی میں فضیلت عطا کی ہے ۔‘‘ اسی لیے ہم دیکھتے ہیں کہ ایک طرف شاندار محلات کی قطاریں ، خوبصورت برق لباس زیب تن کیے ، مہنگی گاڑیوں میں گھومتے پھرتے رؤسائے شہر ہیں تو دوسری طرف سڑکوں پر سسکتے ہوئے بچے ہیں جو ایک وقت کی روٹی کے لیے دست سوال پھیلائے ہوئے ہیں ۔ ایک طرف دولت کے انبار ہیں جن کے مالک اس کو استعمال کر کے مزید کمانے کے قابل نہیں جبکہ دوسری طرف صحت مند ، توانا اور قوی لوگ مزدوری کے لیے ٹھوکریں کھا رہے ہیں ۔ اللہ تعالیٰ نے ان دو گروہوں کو باہم ملانے ، ان میں مودت و محبت کے جذبات قائم رکھنے  اور ان کو پر امن معاشرتی فرد رکھنے کے لیے زکاۃ کا نظام فرض کر دیا تاکہ غریب کو امیر کی دولت سے ایک خاصل حق مل جائے جس سے اس کی ضروریات زندگی پوری ہوں اور امیر کے دل میں دولت کی بے جا محبت ختم ہو سکے کیونکہ اس کی محبت انسان میں حرص ، لالچ ، بخل ، خود غرضی اور سنگ دلی جیسے مرکوہ جذبات پیدا کرتی ہے جب کہ زکاۃ کی ادائیگی سے یہ محبت اعتدال میں آجاتی ہے اور انسان میں ایثار وقربانی ، احسان ، سخاوت ، ہمدردی ، غم خواری اور غرباء سے محبت کے خوبصورت جذبات جنم لیتے ہیں ۔ اس طرح اسلام نے معاضی تفاوت کو ختم کرنے اور معاشرے کے افراد میں خوبصورت ومضبوط تعلقات کو فروغ دینے کے لیے  زکاۃ کا جامع نظام انسانیت کو دیا ۔ اسلام کا نظام زکاۃ ایک طرف غرباء و فقراء کے لیے باعث رحمت ہے تو دوسری طرف امراء کے لیے باعث برکت ہے جبکہ ان دو مقاصد کے علاوہ مالی نعمتوں کے حصول پر شکر الہیٰ کا شاندار ذریعہ بھی ہے ۔زکاۃ کی اہمیت و فضیلت: زکاۃ  دین اسلام کا ایک ایسا رکن ہے جو اس سے پہلے کے مذاہب میں بھی فرض رہا ہے جیسا کہ قرآن مجید میں حضرت اسماعیل علیہ السلام   کے بارے میں ارشاد باری تعالی ہے:(وَكَانَ يَأْمُرُ‌ أَهْلَهُ بِالصَّلَاةِ وَالزَّكَاةِ)(مریم 19:55)’’وہ اپنے گھر والوں کو نماز اور زکاۃ کا حکم دیا کرتے تھے ۔‘‘اسلام نے اس رکن کو مزید اہمیت دیتے ہوئے اسے ایک ایسا منفرد رکن بنا دیا جس کا تعلق حقوق اللہ کے ساتھ ساتھ حقوق العباد سے بھی ہے ، لہذا اس پر عمل کرنے کے تاکیدی حکم کو قرآن مجید میں تقریباً بیاسی ( 82)ے مقامات پر بیان فرمایا جبکہ رسول اللہ ﷺ نے اپنے فرامین میں زکاۃ ادا کرنے والوں کو عظیم خوش خبریاں دی ہیں ۔ آپ کی خدمت میں ایک اعرابی آیا اور اس نے عرض کیا : ’’ مجھے کوئی ایسا عمل بتائیے جسے کرنے سے میں جنت میں داخل ہو جاؤں ۔ آپ نے اس کی رہنمائی کرتے ہوئے ارشاد فرمایا : ’’ اللہ تعالیٰ کی عبادت کر اس کے ساتھ کسی کو شریک نہ بنانا ، فرض نماز قائم کر، فرض زکاۃ ادا کر اور رمضان المبارک کے روزے رکھ۔‘‘ اس نے یہ ارشاد سن کر کہا : اللہ کی قسم ! میں ان اعمال سے کچھ زیادہ نہ کروں گا۔ جب وہ اعرابی واپس ہوا تو آپﷺ نے فرمایا: ’’ جسے جنتی دیکھنا پسند ہو وہ اسے دیکھ لے۔‘‘(صحیح البخاری ، الزکاۃ ، باب وجوب الزکاۃ ، حدیث : 1397) زکاۃ ادا نہ کرنے والوں کو سخت وعید سناتے ہوئے آپ نے فرمایا : ’’ جس شخص کو اللہ تعالیٰ نے مال دیا اور اس نے زکاۃ ادا نہ کی ، قیامت کے دن اس کا مال گنجے سانپ کی شکل بن کر ، جس کی آنکھوں پر دو نقطے ہوں گے ، اس کے گلے کا طوق بن جائے گا ، پھر اس کی دونوں باچھیں پکڑ کر کہے گا : میں تیرا مال ہوں ، میں تیرا خزانہ ہوں ......‘‘ ( صحیح البخاری ، الزکاۃ ، باب اثم مانع الزکاۃ، حدیث : 1403) اللہ تعالیٰ تمام مسلمانوں کو اسلام کے اس عظیم رکن کی ادائیگی کی توفیق دے ۔آمین جن چیزوں میں زکاۃ واجب ہے : زکاۃ مندرجہ ذیل اشیاء میں واجب ہے:(1) سونا (2) چاندی (3) نقد رقم (4) اموال تجارت (5) غلہ اور پھل (6) شہد (7)معدنیات (8) مویشی ، ان اشیاء کے علاوہ دیگر اشیاء : مثلاً : گھریلو استعمال کے برتن ، سواری اور سبزیوں میں زکاۃ نہیں ہے۔زکاۃ کے مصارف : زکاۃ کے کل آٹھ مصار ف ہیں جنہیں اللہ تعالیٰ نے درج ذیل فرمان میں بیان کیا ہے :(إِنَّمَا الصَّدَقَاتُ لِلْفُقَرَ‌اءِ وَالْمَسَاكِينِ وَالْعَامِلِينَ عَلَيْهَا وَالْمُؤَلَّفَةِ قُلُوبُهُمْ وَفِي الرِّ‌قَابِ وَالْغَارِ‌مِينَ وَفِي سَبِيلِ اللَّـهِ وَابْنِ السَّبِيلِ ۖ فَرِ‌يضَةً مِّنَ اللَّـهِ ۗ وَاللَّـهُ عَلِيمٌ حَكِيمٌ) ( التوبۃ 9:60) اس آیت کریمہ کی روشنی میں زکاۃ کے مصارف حسب ذیل ہیں:(1) فقراء (2) مساکین (3) عاملین زکاۃ (4) مؤ لفۃ القلوب (5) غلام آزادکرانا (6) مقروض (7) جہاد فی سبیل اللہ (8) مسافر ۔