تعریف:کسی شخص نے دیکھا یا سنا اس کو صحیح طور پر بیان کرنا ’’شہادت‘‘(گواہی دینا) ہے۔٭شہادت کی مشروعیت:گواہی قرآن و سنت  سے ثابت امر ہے ۔ اللہ تعالیٰ نے بنی نوع انسان پر رحمت کرتے ہوئے گواہی کو مشروع فرمایا ہے تا کہ لوگوں کے اختلافات اور خصوصیات کا فیصلہ اس کی روشنی میں کیا جا سکے ‘اسی لیے گواہی کوچھپانا اور اسے حق طور پر بیان نہ کرنا کبیرہ گناہ ہے کیونکہ اس حقدار پر ظلم ہوتا ہے اور ظالم کی تائید ہوتی ہے ارشاد باری تعالیٰ ہے:(وَلَا تَكْتُمُوا الشَّهَادَةَ وَمَنْ يَكْتُمْهَا فَإِنَّهُ آثِمٌ قَلْبُهُ) (البقرہ:2/283)’’رسول اکرم ﷺ شہادت کی خوبی بیان کرتے ہوئے فرماتے ہیں :[ألا أُخبركم بخير الشهدآء الذى يأتى بشهادته قبل أن يُسألها]’’کیا میں تمہیں میں تمھیں اچھے گواہ کی خبر نہ دوں ؟وہ جو سوال سے پہلے گواہی پیش کر دے۔‘‘(صحیح مسلم‘الأقضية باب بيان خيرالشهود ،حديث:1719)٭شہادت کے چند اہم احکام:گواہی صرف اسی چیز کی دی جائے جو آنکھوں سے دیکھی یا کانوں سے سنی ہو ۔ غیر یقینی گواہی نہ دی جائے ۔گواہ کے امین او ر دیانتدار ہونے کی شہادت  دو عادل شخص دیں گے۔جھوٹے گواہ کی تادیب ضروری ہے تا کہ وہ آئندہ لوگوں کے لیے نمونہ بنے۔٭گواہی کی اقسام :زنا کے ثبوت کے لیے چار مرد گواہوں کا ہونا ضروری ہے۔دیگر امور میں دو عادل گواہ کافی ہیں ۔اموال کے معاملات میں ایک مرد کے ساتھ دو عورتوں کی گواہی بھی درست ہے۔احکام میں ایک گواہ اور قسم سے فیصلہ کیا جا سکتا ہے ۔عورتوں کے بعض مخصوص مسائل میں ایک عورت کی گواہی بھی قابل قبول ہو گی مثلا:رضاعت کا اقرارکرنا۔